ចំណូលរបស់រោងចក្រ Grand Twins ថយចុះបន្តិចក្នុងត្រីមាសទី១ឆ្នាំនេះ

ក្រុមហ៊ុនរោងចក្រកាត់ដេរសម្លៀកបំពាក់ Grand Twins (International) បានរាយការណ៍ពីការសម្រេចបានប្រាក់ចំណូលក្នុងត្រីមាសទី១ ឆ្នាំ២០២៥ ​ មាន​ចំនួន ១៤,៧៥ លាន ដុល្លារអាមេរិកថយចុះ​  ៨,៥៦% ធៀបនឹងត្រីមាសទី១ឆ្នាំ២០២៤  ខណៈខ្លួនទទួលបានចំណេញសុទ្ធ​សរុបចំនួន ៧៤ ៦៩៥ ដុល្លារអាមេរិកកើនចំនួន ​ ៤ ២៤៩​% បើធៀបនឹងត្រីមាសទី១ ឆ្នាំ២០២៤។

​យោងតាមរបាយការណ៍របស់ក្រុមហ៊ុនដែលបានចុះបញ្ជីនៅផ្សារមូលបត្រកម្ពុជាកាលពីចុងស​ប្តាហ៍នេះ នាថ្ងៃទី៣១ ខែ មីនា ឆ្នំា២០២៥ នេះដែរ ទ្រព្យសកម្មសរុបរបស់ក្រុមហ៊ុនមានចំនួន ៣៨១,៥០៤ ពាន់លានរៀល ថយចុះ ០,៧៦% និងមូលធនសរុប មានចំនួន ២៨១ ពាន់លានរៀល ថយចុះ០,៥២%។

លោក Yang Po Yu ប្រធានក្រុមប្រឹក្សាភិបាល បានថ្លែងនៅក្នុងរបាយការណ៍នោះថាចាប់តាំងពីបង្កើតក្រុមហ៊ុននៅឆ្នាំ២០០៧ ក្រុមហ៊ុនរបស់លោកបានបង្កើត និង ពង្រីកផលិតផលរបស់ខ្លួនតាមតម្រូវការរបស់អតិថិជន ហើយដែលអាចចាត់ទុកថា ជារោងចក្រកាត់ដេរមួយដែលឈានមុខគេនៅ​កម្ពុជា។

លោកថា៖«ក្រុមហ៊ុនជឿជាក់ទៅលើសមត្ថភាពក្នុងការបង្កើត អភិវឌ្ឍ និងចែកចាយ ផលិតផលទៅអតិថិជនរបស់ខ្លួននៅជុំវិញពិភពលោក។​ ក្រុមប្រឹក្សាភិបាលនៅតែខិតខំប្រឹងប្រែងរក្សាទំនាក់ទំនងយ៉ាងល្អជាមួយអតិថិជនរបស់ខ្លួន ជាពិសេសអតិថិជន ចម្បងរបស់ក្រុមហ៊ុន ក្នុងគោលបំណងទទួលបានការកើនឡើងនៃការបញ្ជាទិញសម្រាប់ឆ្នាំ២០២៥ និងព្យាយាមក្នុងការ សហការជាមួយដៃគូនានា ដើម្បីទទួលបានចំណូលាផ្សេងៗទៀត ដូចជា តាបរយៈការទទួលដេរបន្ត ការកាត់ដេរ និងវេចខ្ចប់ ដើម្បីរក្សាស្ថេរភាព និងបង្កើនចំណូលឲ្យបានច្រើនជាងបណ្តាឆ្នាំកន្លងទៅសម្រាប់ក្រុមហ៊ុន»។

បើយោងតាមលោក ​ Yang Po Yu ចំពោះត្រីមាសនានា ឆ្នាំ២០២៥ ក្រុមហ៊ុន នឹងខិតខំប្រឹងប្រែងបន្ថែមទៀត ដើម្បីធ្វើឲ្យកាន់តែប្រសើរ ឡើងក្នុងការពង្រឹងអភិបាលកិច្ចសាជីវកម្មល្អលស់ក្រុមហ៊ុន ហើយនៅតែប្រកាន់ខ្ជាប់នូវទស្សនវិស័យ និងបេសកកម្ម ដែលបានកំណត់ពីឆ្នាំមុនៗ។

«ជាទិសដៅសម្រាប់ត្រីមាសនានា ឆ្នាំ២០២៥ ក្រុមហ៊ុន ​ សង្ឃឹមថា នឹងទទួលបានប្រាក់ ចំណេញល្អប្រសើរជាងត្រីមាសនានា នាឆ្នាំកន្លងទៅ» នេះបើតាមលោក Yang Po Yu៕