រដ្ឋមន្ត្រីសុខាភិបាល ជំរុញថ្នាក់ដឹកនាំមន្ទីរពេទ្យ ឱ្យសហការជាមួយស្ថាប័នពាក់ព័ន្ធ ជាពិសេសបណ្តាខេត្តជាប់ព្រំដែន

រដ្ឋមន្ត្រីសុខាភិបាល លោក ឈាង រ៉ា បានណែនាំដល់ថ្នាក់ដឹកនាំមន្ទីរពេទ្យ ធ្វើការតាមដានឱ្យបានជាប់ជាប្រចាំ បង្កើនការសហការជាមួយស្ថាប័នពាក់ព័ន្ធ ជាពិសេសតាមបណ្តាខេត្តជាបបណ្តាព្រំដែន។ ការណែនាំនេះ ធ្វើឡើងក្នុងកិច្ចប្រជុំកម្រិតថ្នាក់ដឹកនាំលើកទី២ នៃខែមិថុនា ពិនិត្យវឌ្ឍនភាពការងារ និងលើកទិសដៅការងារបន្ត នារសៀលថ្ងៃទី២៣ ខែមិថុនា ឆ្នាំ២០២៥។

បន្ថែមពីនេះ លោករដ្ឋមន្រ្តី បានណែនាំដល់ថ្នាក់ដឹកនាំ ប្រធានអង្គភាព ត្រូវបង្កើនប្រសិទ្ធភាពការងារប្រចាំថ្ងៃឱ្យកាន់តែល្អប្រសើរឡើងបន្ថែមទៀត និងតាមបណ្តារាជធានី-ខេត្ត ជាពិសេសខេត្តជាប់ព្រំដែនកម្ពុជា-ថៃ លើសុខភាព និងសុខុមាលភាពប្រជាជន។ ក្នុងនោះថ្នាក់ដឹកនាំមន្ទីរពេទ្យ ត្រូវធ្វើការតាមដានឱ្យបានជាប់ជាប្រចាំ បង្កើនការសហការជាមួយស្ថាប័នពាក់ព័ន្ធ ជាពិសេសតាមបណ្តាខេត្តជាបបណ្តាព្រំដែន ទាំងបច្ចេកទេស និងការផ្គត់ផ្គង់ឱសថដែលត្រៀមបម្រុងតាមព្រំដែន ដោយត្រូវបង្កើនការគ្រប់គ្រងឱ្យបានត្រឹមត្រូវ ការបែងចែកឱ្យចំគោលដៅ និងមានប្រសិទ្ធភាព និងការរក្សាឱ្យបានគង់វង្ស។

លើសពីនេះ លោកបានប្រាប់ដល់ថ្នាក់ដឹកនាំ និងមន្រ្តីសុខាភិបាល បង្កើនប្រសិទ្ធភាពការងារឱ្យកាន់តែល្អប្រសើរ បង្កើនការទំនាក់ទំនងគ្នា និងសហការគ្នា ដោយមិនត្រូវធ្វើការងារដាច់ដោយឡែក ឬធ្វើការរៀងខ្លួនៗ។ រី​ឯការចុះមូលដ្ឋាន ត្រូវបង្កើនការយកចិត្តទុកដាក់ ក្នុងការចុះពិនិត្យ ដោយត្រូវបង្កើនការលើកទឹកចិត្ត ផ្តល់ភាពស្និតស្នាល។ ក្នុងនោះមន្រ្តីសុខាភិបាល ត្រូវមានឥរិយាបថឱ្យបានសមរម្យថ្លៃថ្នូ ក្លាយជាអ្នកដឹកនាំ និងឯកសណ្ឋានឱ្យបានស្អាត។ ត្រូវស្វែងរកចំណុចដែលខ្សោយ ឬអនុវត្តមិនទាន់បានល្អ ដោយត្រូវធ្វើការវាយតម្លៃខ្លួនឯង។

ដើម្បីបង្កើនប្រសិទ្ធភាពការងារ ឱ្យកាន់តែល្អប្រសើរ លោករដ្ឋមន្ត្រីថា ត្រូវបំពេញការងារឱ្យដូចជាការអ៊ុំទូក, ពង្រឹងសមត្ថភាពរបស់ខ្លួន តើសមស្រប ឬនៅ, ត្រូវធ្វើការជឿនលឿនទៅមុន។ ត្រូវពង្រឹងការងាររបស់ខ្លួន កុំឱ្យមានការបាត់បង់ ឬធ្លាក់ចុះដោយការព្យាបាលដែលបណ្តាឱ្យអ្នកជំងឺចំណាយទាំងថវិកា និងអាចបង់បាត់ដល់អាយុជីវិត ជាដើម៕