សមរភូមិផ្លូវច្បាប់ចំនួនបីនៅខែសីហាខាងមុខនឹងកែប្រែជោគវាសនាត្រកូល ស៊ីណាវ៉ាត្រ ក្នុងនយោបាយថៃ

យោងតាមការចេញផ្សាយរបស់សារព័ត៌មាន The Nation ក្នុងខែសីហាខាងមុខនេះគឺជាពេលវេលាដ៏សំខាន់មួយសម្រាប់ជោគវាសនាគ្រួសារ ស៊ីណាវ៉ាត្រ (Shinawatra )ដ៏មានឥទ្ធិពលរបស់ប្រទេសថៃ ជាមួយនឹងការសម្រេចសាលក្រមសំខាន់ៗចំនួន ៣ ដែលអាចផ្លាស់ប្តូរទិដ្ឋភាពនយោបាយរបស់ប្រទេសនេះយ៉ាងខ្លាំង។

សាលក្រមប្រមាទព្រះមហាក្សត្រ របស់លោកថាក់ស៊ីន

អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រ (Thaksin Shinawatra) នឹងប្រឈមមុខនឹងសាលក្រមនៅថ្ងៃទី ២២ ខែសីហា លើការចោទប្រកាន់ក្នុងមាត្រា១២២ (ប្រមាថព្រះមហាក្សត្រ) ដែលភ្ជាប់ទៅនឹងបទសម្ភាសន៍កាលពីឆ្នាំ ២០១៥ ទៅឲ្យសារព័ត៌មានប្រទេសកូរ៉េខាងត្បូង។ តុលាការថៃចោទប្រកាន់ថា បទសម្ភាសន៍នោះ លោកថាក់ស៊ីន​បានប្រមាថព្រះមហាក្សត្រ។ តុលាការបានបញ្ចប់សវនាការសាក្សីរួចហើយ។ ក្នុងករណីនេះ ប្រសិនបើលោកថាក់ស៊ីន ត្រូវបានគេរកឃើញថាមានពិរុទ្ធ វាអាចប៉ះពាល់ដល់មុខមាត់នយោបាយរបស់គាត់ ទោះបីជាលោកនៅតែអាចប្តឹងឧទ្ធរណ៍ការសម្រេចនេះក៏ដោយ។ នេះ​ជា​ករណីធ្ងន់ធ្ងរ​ជា​ពិសេស​ព្រោះ​ការ​លើក​លែង​ទោស​ចំពោះ​មាត្រា​១១២ មិនមាននោះទេ។

ការស៊ើបអង្កេតលើការស្នាក់នៅមន្ទីរពេទ្យរបស់ថាក់ស៊ីន

ករណីទីពីរគឺអំពីថាតើការស្នាក់នៅរយៈពេលយូររបស់ ថាក់ស៊ីន នៅមន្ទីរពេទ្យប៉ូលិសគឺពិតជាដោយសារលក្ខខណ្ឌសុខភាពឬគ្រាន់តែជាវិធីមួយដើម្បីគេចចេញពីការជាប់ពន្ធនាគារ។ តុលាការនៅតែបើកសវនាការដដែល ដោយវគ្គចុងក្រោយនៅថ្ងៃទី ៣០ខែកក្កដា។ ការសម្រេចចិត្តសាលក្រមមួយត្រូវបានរំពឹងទុកនៅក្នុងខែសីហាខាងមុខផងដែរ ។

ការព្យួរតំណែង លោក ស្រី ផែថងថាន ជុំវិញការបែកធ្លាយឃ្លីបសំឡេង

នាយករដ្ឋមន្ត្រីថៃបច្ចុប្បន្ន លោកស្រី ផែថងថាន ស៊ីណាវ៉ាត្រ (Paetongtarn Shinawatra ) ជាកូនស្រីរបស់លោកថាក់ស៊ីន កំពុងតស៊ូដើម្បីជីវិតនយោបាយរបស់លោកស្រីនៅពេលនេះ។ តុលាការ​ធម្មនុញ្ញ​សម្រេច​ព្យួរ​តំណែងលោកស្រី​ជា​បណ្ដោះអាសន្ន​ជុំវិញ​រឿង​អាស្រូវ​ពាក់ព័ន្ធ​នឹង​ការ​បែកធ្លាយ​ឃ្លីប​សំឡេង​ជាមួយ​សម្ដេចតេជោ ហ៊ុន សែន ហើយ​លោកស្រី​ត្រូវ​បញ្ជូន​មេធាវី​ការពារ​ក្តី​ឲ្យ​បាន​មុន​ថ្ងៃ​ទី ៣១ ខែ​កក្កដា ដោយ​នឹង​មាន​សាលដីកា​នៅ​ចុង​ខែ​សីហា។ ប្រសិនបើ លោកស្រីត្រូវបានដកចេញ គណបក្សភឿថៃអាចនឹងត្រូវបង្ខំឱ្យតែងតាំងនាយករដ្ឋមន្ត្រីថ្មី អាចជាលោក Chaikasem Nitisiri ឬឥស្សរជនផ្សេងទៀតជំនួស។

ករណីទាំងបីនេះបានគម្រាមកំហែងជារួមដល់អនាគតនយោបាយនៃត្រកកូល ស៊ីណាវ៉ាត្រ រារាំងការពង្រឹងអំណាចរបស់ពួកគេ ឬបង្ខំឱ្យមានការបង្កើតឡើងវិញនៅក្នុងគណបក្សភឿថៃដែលកំពុងកាន់អំណាច៕

អត្ថបទ៖ ប៊ុន សុភាព