កីឡា

អ្នកគាំទ្រកំពុងពេញចិត្ត ខ្សែបម្រើ ៣ នាក់នៅក្រុម U23 កម្ពុជា តែត្រូវបង្កើនខ្សែប្រយុទ្ធ

បានផុស

១២ ខែ មុន

នៅ

ថ្ងៃចន្ទ ២១ កក្កដា ២០២៥

ដោយ

អ្នកគាំទ្រកីឡាបាល់ទាត់កម្ពុជា បានពេញចិត្តចំពោះសមត្ថភាពរបស់ខ្សែបម្រើកណ្តាល ៣ នាក់នៅក្នុងក្រុមបាល់ទាត់ជម្រើសជាតិកម្ពុជាអាយុក្រោម ២៣ ឆ្នាំ (U23) ដែលកំពុងក្លាយជាកម្លាំងសំខាន់សម្រាប់ព្រឹត្តិការណ៍អន្តរជាតិ ៣ ក្នុងឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជូ ស៊ីនទិ អាយុ ២២ ឆ្នាំ កម្ពស់ ១.៦០ម៉ែត្រ មកពីក្លិប ព្រះខ័នរាជស្វាយរៀង ជាខ្សែបម្រើកណ្តាលដ៏ល្អតាមរយៈបច្ចេកទេស និងស្មារតី បានធ្វើឲ្យរូបគេតែងតែគ្រប់គ្រងបាល់ និងចែកបាល់ឲ្យមិត្តរួមក្រុម។ រូបគេមានបទពិសោធច្រើនទាំងក្នុងកីឡាស៊ីហ្គេម កីឡាបាល់ទាត់អាស៊ាន កីឡាបាល់ទាត់អាស៊ី និងជម្រុះបាល់ទាត់ពិភពលោក។

ស៊ីន សុវណ្ណមករា អាយុ ២០ ឆ្នាំ កម្ពស់ ១.៧៥ម៉ែត្រ មកពីក្លិបបាល់ទាត់ វិសាខា ជាកម្លាំងបម្រើកណ្តាលដ៏សំខាន់ទាំងនៅក្រុមបាល់ទាត់យុវជនកម្ពុជា និងក្រុមជម្រើសទី១។ រូបគេបានជាប់ជម្រើសជាតិកម្ពុជាក្នុងក្រុមធំតាំងពីឆ្នាំ ២០២១ និងមានបទពិសោធច្រើនសម្រាប់ការបង្ហាញខ្លួនលើឆាកអន្តរជាតិ។

លឹម លោកា អាយុទើប ១៨ ឆ្នាំមកពីក្លិប Auckland United របស់ប្រទេសនូវែលហ្សេឡង់ ពិតជាទទួលបានការកោតសរសើរពីអ្នកគាំទ្រខ្លាំងមែនទែនសម្រាប់ទម្រង់លេងយ៉ាងសកម្មភាពនៅតំបន់បម្រើការពារ លើកបាល់ពីជ្រុង និងចែកបាល់នៅតំបន់កណ្តាល។ រូបគេមិនទាន់ធ្លាប់បានចូលរួមជាមួយក្រុមធំជម្រើសជាតិកម្ពុជាទេ ប៉ុន្តែធ្លាប់បានចូលរួមជាមួយក្រុម U22 និង ក្រុម U18 សម្រាប់ការប្រកួតជម្រុះពានរង្វាន់យុវជនអាស៊ាន និងអាស៊ី។

កីឡាករទាំង ៣ នាក់នេះ កំពុងជួយក្រុម U23 កម្ពុជា ក្នុងពានយុវជនអាស៊ាន ASEAN U23 Championship នៅប្រទេសឥណ្ឌូណេស៊ី។ ពួកគេក៏នឹងក្លាយជាកម្លាំងមិនអាចខ្វះបានសម្រាប់ការប្រកួតជម្រុះពានយុវជនអាស៊ី 2026 AFC U23 Asian Cup ដែលកម្ពុជាធ្វើម្ចាស់ផ្ទះពូល G ដែលមានអ៉ីរ៉ាក់ អូម៉ង់ និង ប៉ាគីស្ថាន ចាប់ពីថ្ងៃទី ៣ ដល់ទី ៩ ខែកញ្ញា ឆ្នាំ ២០២៥ និងកីឡាស៊ីហ្គេម លើកទី៣៣ នាខែធ្នូ នៅប្រទេសថៃ។

ទោះបីជាយ៉ាងណា ការមានខ្សែបម្រើល្អមិនគ្រប់គ្រាន់ទេក្នុងការស្វែងរកជ័យជម្នះលើដៃគូ។ រហូតដល់ពេលនេះ អ្នកគាំទ្រសង្កេតឃើញពីកង្វះខាតនៅតំបន់ប្រយុទ្ធ។ កម្ពុជាមានកីឡាករនៅតំបន់ប្រយុទ្ធច្រើន ប៉ុន្តែមិនទាន់មានកីឡាករណាម្នាក់លេចធ្លោខ្លាំងឡើយ ហើយនៅតំបន់ការពារក៏មិនសូវរឹងមាំដែរ។ កម្ពុជាត្រូវស្វែងរកកីឡាករប្រយុទ្ធតែមានទេពកោសល្យ បច្ចេកទេស និងកាយសម្បទាដើម្បីបង្កើនភាពមុតស្រួចនៅតំបន់ប្រយុទ្ធឲ្យគ្រោះថ្នាក់៕