ព័ត៌មានអន្ដរជាតិ

ណេតាន់យ៉ាហ៊ូ ពុលចំណី លុបចោលការផ្ដល់សក្ខីកម្មនៅតុលាការ ពាក់ព័ន្ធនឹងអំពើពុករលួយ

បានផុស

១២ ខែ មុន

នៅ

ថ្ងៃចន្ទ ២១ កក្កដា ២០២៥

ដោយ

Chheang

ការិយាល័យនាយករដ្ឋមន្ត្រីអ៊ីស្រាអែល បានបញ្ជាក់កាលពីថ្ងៃអាទិត្យទី២០ខែកក្កដាថា លោក បេនចាមីន ណេតាន់យ៉ាហ៊ូ ត្រូវបានគេធ្វើរោគវិនិច្ឆ័យថាពុលអាហារ ដោយបង្ខំឲ្យគាត់ត្រូវលុបចោលការផ្ដល់សក្ខីកម្មនៅតុលាការដែលបានគ្រោងទុក ក្នុងសំណុំរឿងពុករលួយ និងត្រូវសម្រាកនៅផ្ទះជាច្រើនថ្ងៃ។

លោក បេនចាមីន ណេតាន់យ៉ាហ៊ូ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីថ្លែងការណ៍ លោក ណេតាន់យ៉ាហ៊ូ អាយុ ៧៥ឆ្នាំ បានចាប់ផ្តើមមានរោគសញ្ញានៃការរលាកពោះវៀន និងខ្សោះជាតិទឹក កាលពីល្ងាចថ្ងៃសៅរ៍។ បច្ចុប្បន្នគាត់កំពុងត្រូវបានព្យាបាលដោយការចាក់ទឹកតាមសរសៃ ហើយត្រូវបានគ្រូពេទ្យណែនាំឲ្យធ្វើការពីចម្ងាយ និងសម្រាកយ៉ាងហោចណាស់បីថ្ងៃ។

សេចក្តីថ្លែងការណ៍ដដែល បានលើកឡើងថា «គាត់នឹងបន្តមើលការខុសត្រូវកិច្ចការរដ្ឋាភិបាលពីគេហដ្ឋានរបស់គាត់នៅក្រុងយ៉េរូសាឡឹម»។

លោក ណេតាន់យ៉ាហ៊ូ បានខកខានកិច្ចប្រជុំគណៈរដ្ឋមន្ត្រីប្រចាំសប្តាហ៍កាលពីថ្ងៃអាទិត្យ ហើយបានពន្យារពេលការបង្ហាញខ្លួនរបស់គាត់នៅក្នុងតុលាការនាថ្ងៃទី២១និង២២កក្កដា ដែលគាត់ត្រូវផ្តល់សក្ខីកម្មនៅក្នុងករណីមួយក្នុងចំណោមករណីជាច្រើនដែលពាក់ព័ន្ធនឹងការចោទប្រកាន់ពីបទស៊ីសំណូក ការក្លែងបន្លំ និងការរំលោភលើទំនុកចិត្ត។

សវនាការរបស់លោក ណេតាន់យ៉ាហ៊ូ នឹងត្រូវលើកដល់ថ្ងៃទី៥ខែកញ្ញា ដោយសារបន្ទាប់ពីសវនាការលើកនេះ ប្រព័ន្ធតុលាការអ៊ីស្រាអែលនឹងបិទសម្រាកសម្រាប់រដូវក្ដៅរហូតដល់ខែកញ្ញាទើបដំណើរការឡើងវិញ។

សូមរឭកថា សវនាការរបស់លោក ណេតាន់យ៉ាហ៊ូ ទាក់ទងនឹងការកាត់ក្តីពុករលួយ ត្រូវបានពន្យារពេលជាច្រើនដងរួចមកហើយ បន្ទាប់ពីត្រូវចោទប្រកាន់ជាផ្លូវការកាលពីថ្ងៃទី២១ខែវិច្ឆិកាឆ្នាំ២០១៩។ មូលហេតុចម្បងៗសម្រាប់ការខកខាន មានដូចជា បញ្ហាសុខភាព សង្រ្គាមនៅតំបន់ហ្គាហ្សាស្ទ្រីប ជម្លោះអ៊ីរ៉ង់-អ៊ីស្រាអែល និងការធ្វើដំណើរទៅបរទេស ជាដើម៕

ដោយ៖ ឈាង