គម្រោងសាងសង់ខុនដូ តម្លៃសមរម្យ កើនឡើងខ្ពស់នៅឆមាសទី១

នៅឆមាសទី១ ឆ្នាំ ២០២៥ គម្រោងខុនដូបើកការសាងសង់ថ្មីចំនួន ៣ ៩០០ យូនីត ក្នុងនោះមាន​ខុនដូ តម្លៃសមរម្យ​ជាង ៣ ៥០០ យូនីត កើនឡើងខ្ពស់ធៀបនឹងឆ្នាំមុនៗ។ នេះបើយោង​តាមរ​បាយ​ការណ៍​របស់ក្រុមហ៊ុន CBRE Cambodia។

លោកស្រី ​គឹម គិនកេសា នាយិកា​ក្រុមហ៊ុន​អចលនទ្រព្យ CBRE Cambodia បានឱ្យដឹងថា សកម្មភាពជួលមានភាពប្រសើរឡើង ជាមួយនឹងការកើនឡើងនូវតម្រូវការ ប្រភេទយូនីត​ដែលមាន ២ បន្ទប់គេង និងធំជាងនេះ។ ហើយថា ការ​បើក​សាងសង់ថ្មីផ្ដោតលើខុនដូ ដែលមានតម្លៃសមរម្យ ច្រើនជាងខុនដូប្រណីត។

លោកស្រីបន្ថែមថា គម្រោងចាស់ៗ ក៏កំពុងតែបញ្ចប់ ហើយក៏មានគម្រោង​ខ្លះពិបាក​ក្នុងការ​បញ្ចប់ដោយសារតែអត្រានៃការ​ជួលមិនទាន់ល្អ ពោលគឺ​តម្លៃជួល សម្រាប់ អាគារ និងការិ​យាល័យ និងទីផ្សារតម្លៃមិនទាន់ត្រឡប់មកវិញ ហើយនឹងនៅតែបន្តធ្លាក់​ចុះទៀតក្នុង​ទំហំតិចតួច។

លោកស្រី ​គឹម គិនកេសា បានបន្តទៀតថា ផ្នែកទីផ្សារលំនៅឋាន និងដីធ្លី ការផ្គត់ផ្គង់នៅ​មានច្រើនទាំងបុរី និងខុដូ ដែលមិនទាន់លក់អស់ នៅឆ្នាំ ២០២៤ តម្លៃនៅបន្តទាបនៅឡើយ ហើយម្ចាស់​គម្រោង​គាត់នៅបន្តលក្ខខណ្ឌបង់រំលោះ ឬក៏ប្រមូសិនផ្សេងៗ។ គម្រោងបើកលក់ថ្មីយឺតជាងមុន វាធ្វើឱ្យទីផ្សារចាប់ផ្ដើមទិញយក គម្រោងដែល​នៅសល់ចាស់ៗ ដែលជាសញ្ញាវិជ្ជមាន។

លោកស្រីបន្ថែមថា៖ «យើងមិនគិតថាតម្លៃ វានឹងហក់ឡើងភ្លាមៗទេ ប៉ុន្តែ ការ​ដែលវាធ្លាក់ចុះ កំពុង​តែយឺតជាងមុន អាហ្នឹងជាពេលមួយមានភាពច្បាស់លាស់ ទាំងអ្នកលក់ និងអ្នកទិញ គាត់ដឹងតម្លៃនៅកន្លែងណា ប្រតិបត្តិការទិញ-លក់ នៅក្នុងឆ្នាំ ២០២៥ អាចនឹងកើត​ឡើងច្រើនជាងឆ្នាំមុន ប៉ុន្តែតម្លៃប្រហែលមិនខ្ពស់ទេ»។

លោក ច្រឹក សុខនីម អគ្គនាយកក្រុមហ៊ុន Century21 Mekong មានប្រសាសន៍ថា ដោយសារនៅប៉ុន្មានឆ្នាំកន្លងមក មានការរងផលប៉ះពាល់ច្រើនទៅលើវិស័យអចលនទ្រព្យ ខណៈថ្មីៗនេះ មានក្រុមហ៊ុនអភិវឌ្ឍន៍ធំចាប់ផ្ដើមសកម្មភាពសាងសង់ឡើងវិញ ដែលដំណើរការដើម្បីជួយជំរុញឱ្យទីផ្សារមានចរន្តឡើងវិញ។

លោក ច្រឹក សុខនីម យល់ឃើញថា៖ «ខ្ញុំគិតថា វាជាដំណើរការដើម្បីជួយជំរុញឱ្យទីផ្សារមាន​ចរន្តឡើងវិញ បើយើអត់មានធ្វើអីខ្លះទេ អញ្ចឹងទីផ្សារវាកាន់តែលំបាក តែបញ្ហាដែលយើងអាច​ត្រូវការជំនួយធំបំផុតគឺការចាក់ចូលវិស័យហិរញ្ញវត្ថុទៅក្នុងទីផ្សារអចលនទ្រព្យឱ្យបានកាន់តែច្រើនជាងនេះបន្ថែមទៀត ទើបអាចឱ្យអ្នកអភិវឌ្ឍដំណើរការអាជីវកម្មបានស្រួល»។

លោក ច្រឹក សុខ នីម បន្ថែមថា បច្ចុប្បន្នតម្លៃបុរី ខុនដូ មិនមានការកើនឡើងទេ ខណៈគម្រោង​ដែលមានសម្រាប់កំពុងដំណើរការលក់ ហើយគម្រោងថ្មីជាជម្រើស​ដែលខកខានការសាងសង់​ប្រហែ​ល​មួយឆ្នាំ ឬ២ ឆ្នាំកន្លងមក។

លោក Tom O’Sullivan នាយកប្រតិបត្តិនៃ Realestate.com.kh ប្រាប់ថា ការស្ទុះងើបឡើងវិញនៃទីផ្សារខុនដូ ក្រោយជំងឺរាតត្បាតកូវីដ១៩ បានជំរុញឱ្យមានតម្រូវការជាថ្មី ប៉ុន្តែលោកបានព្រមានពីកំហុសកន្លងមកថា៖ «ខណៈពេលដែលឱកាសមានពិតប្រាកដ ហានិភ័យក៏មានផងដែរ។ អ្នកទិញថ្ងៃនេះត្រូវតែស្វែងរកទីផ្សារដោយប្រុងប្រយ័ត្ន និងផ្តល់អាទិភាពដល់គុណភាពនៃសំណង់អគារ»។

ក្នុងឆមាសទី១ ឆ្នាំ ២០២៥ តម្លៃខុនដូតម្លៃសមរម្យ ១៦០០ ដុល្លារ ក្នុងមួយម៉ែត្រការ៉េ ធ្លាក់ចុះ ២,៦% និងខុនដូកម្រិតមធ្យមតម្លៃជិត ២ ដុល្លារ ក្នុងមួយម៉ែត្រការ៉េ ខណៈខុនដូប្រណីត​តម្លៃ​ជាង ២ ៦០០ ក្នុងមួយម៉ែត្រការ៉េ កើនឡើង ៧,១%។

យោងតាម CBRE នៅឆមាសទី១ ឆ្នាំ ២០២៥ គម្រោងខុនដូចំនួន ៣ ៦០០ យូនីត បានបញ្ចប់ការសាងសង់ និងរំពឹងថា នឹងមានខុនដូចំនួនជិត ១ ម៉ឺន ២ ពាន់ យូនីត ចាក់បញ្ចូលក្នុងទីផ្សារនៅក្នុងឆ្នាំ ២០២៥។

គិតត្រឹមឆ្នាំ ២០២៤ ការផ្គត់ផ្គង់ខុនដូនៅកម្ពុជា​ បានកើនដល់ ៧ ម៉ឺន ២ ពាន់យូនីត និងបុរីចំនួន ១៦ ម៉ឺន ៧ ពាន់យូនីត។ នេះបើយោងតាម CBRE៕

អត្ថបទ៖ ឡេង ដេត