ព្យុះនៅហ្វីលីពីនសម្លាប់មនុស្ស​ ២៥នាក់ ខណៈ ២៧ម៉ឺននាក់ត្រូវជម្លៀសចេញ

ព្យុះត្រូពិក Co-may ដែលហ្វីលីពីនហៅថា Emong បានវាយប្រហារភាគខាងជើងប្រទេសហ្វីលីពីនក្នុងសប្តាហ៍នេះ ដោយធ្វើឱ្យមានភ្លៀងធ្លាក់មូសុងកាន់តែអាក្រក់ឡើង បង្កជាទឹកជំនន់សម្លាប់មនុស្សរាប់សិបនាក់និងរាប់ម៉ឺននាក់ត្រូវបង្ខំជម្លៀសចេញ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​AP នៅថ្ងៃទី២៥ខែកក្កដា។

ចាប់តាំងពីចុងសប្តាហ៍មុនមក ទឹកជំនន់ភ្លាមៗ បំណាក់ដី បាក់រលំដើមឈើ និងការឆក់អគ្គិសនី ដែលបណ្ដាលមកពីឥទ្ធិពលរបស់ព្យុះ Co-may បានបណ្តាលឱ្យមនុស្សស្លាប់សរុបកើនដល់ ២៥នាក់ ខណៈដែលមនុស្ស ៨ នាក់ទៀតនៅតែបាត់ខ្លួន។

ព្យុះនេះបានបោកបក់មកលើហ្វីលីពីន កាលពីយប់ថ្ងៃព្រហស្បតិ៍ក្នុងខេត្ត Pangasinan ជាមួយនឹងខ្យល់បក់ខ្លាំង តែបានចុះខ្សោយនៅថ្ងៃសុក្រនេះ។ ថ្វីត្បិតតែព្យុះ Co-may មិនបណ្តាលឱ្យមានអ្នកស្លាប់ដោយផ្ទាល់ក៏ដោយ ប៉ុន្តែផលប៉ះពាល់របស់វាបានធ្វើឱ្យមានភ្លៀងធ្លាក់ខ្លាំង ដែលបានញាំញីប្រទេសហ្វីលីពីនអស់រយៈពេលជាងមួយសប្តាហ៍មកហើយ។

មនុស្សជាង២៧ ម៉ឺននាក់ត្រូវបានបង្ខំឱ្យជម្លៀសចេញពីផ្ទះ ហើយផ្ទះជិត ៣ ពាន់ខ្នង ត្រូវរងការខូចខាត។ ជាមួយគ្នានេះតំបន់ជាង ៨០ ដែលភាគច្រើននៅក្នុងទីក្រុង Luzon បានប្រកាសពីស្ថានភាពនៃគ្រោះមហន្តរាយ ហើយសាលារៀននៅទូទាំង ៣៥ ខេត្ត និងទីក្រុងម៉ានីលត្រូវបានបិទរយៈពេល៣ថ្ងៃហើយ។

ជាឆ្លើយតបរាជរដ្ឋាភិបាលហ្វីលីពីនបានដាក់ពង្រាយបុគ្គលិកសង្គ្រោះរាប់ពាន់នាក់ រួមទាំងទាហាន និងអ្នកស្ម័គ្រចិត្តដើម្បីជួយសហគមន៍ដែលរងគ្រោះដោយទឹកជំនន់។ ជាមួយគ្នានេះ សហរដ្ឋអាមេរិកបានសន្យាផ្តល់ជំនួយចំនួន ២៥ ម៉ឺនដុល្លារ តាមរយៈកម្មវិធីស្បៀងអាហារពិភពលោក និងផ្តល់យន្តហោះយោធាសម្រាប់បេសកកម្មសង្គ្រោះ ប្រសិនបើស្ថានភាពកាន់តែអាក្រក់ទៅៗ។

ប្រធានាធិបតីហ្វីលីពីនលោក Ferdinand Marcos Jr. បន្ទាប់ពីបានទៅមើលដល់ជំរកប្រជាពលរដ្ឋការពារព្យុះ បានសង្កត់ធ្ងន់លើតម្រូវការបន្ទាន់ក្នុងការសម្របខ្លួនទៅនឹងការប្រែប្រួលអាកាសធាតុ និងការគំរាមកំហែងកាន់តែខ្លាំងឡើងពីបញ្ហាអាកាសធាតុ។

គួរបញ្ជាក់ថាប្រទេសហ្វីលីពីន ដែលងាយនឹងទទួលរងនូវព្យុះទីហ្វុង ការរញ្ជួយដី និងការផ្ទុះភ្នំភ្លើង ប្រឈមនឹងព្យុះត្រូពិកប្រហែល ២០ ក្នុងមួយឆ្នាំឯណោះ៕

អត្ថបទ៖ ប៊ុន សុភាព