ព័ត៍មានទាន់​ហេតុការណ៏
Search

ប៉ូលិស​ប្រឆាំង​បទល្មើស​សេដ្ឋកិច្ច​ខេត្ត​បង្ក្រាប​ឈើ​ទម្លាក់​ពី​ទូក​ដាក់​ក្នុង​ទឹក​ប្រគល់​ឲ្យ​មេព្រៃ

ស្ទឹងត្រែង​ ៖ ​កម្លាំង​នគរបាល​ប្រឆាំង​បទល្មើស​នៃ​ស្នងការដ្ឋាន​នគរបាល​ខេត្តស្ទឹងត្រែង​ បាន​ចុះ​បង្ក្រាប​ឈើ​មួយ​កន្លែង ​ដែល​ទូក​ដឹក​យក​មក​ទម្លាក់​ប្រមាណ​ជិត​១០​ ម៉ែត្រគូប​ប្រគល់​ទៅ​ឲ្យ​សង្កាត់​រដ្ឋបាល​ព្រៃឈើ​ក្បាល​រមាស​ស្រែគរ។

ឈើ​ ដែល​សមត្ថកិច្ច​បង្ក្រាប​បាន​ធ្វើឡើង​កាលពី​វេលា​ម៉ោង​មុន​មាន​១១​និង​៣០​នាទី​ ថ្ងៃ​ត្រង់ ​ថ្ងៃទី១០​ ខែសីហា ​ឆ្នាំ២០១៨​ ចំណុច​ស្រែ​តា​ចាន់​ ស្ថិត​ក្នុង​ភូមិ​ច្រប់ ​ឃុំ​ក្បាល​រមាស ​ស្រុក​សេសា​ន​ខេត្តស្ទឹងត្រែង។

លោក​វ៉ា​ សាន់​ នាយការិយាល័យ​ប្រឆាំង​បទល្មើស​ខេត្ត​បាន​ឲ្យ​ដឹង​ថា ​ឈើ​ ដែល​សមត្ថកិច្ច​បង្ក្រាប​ត្រូវ​បាន​ក្រុម​ឈ្មួញ​ដឹក​តាម​ទូក​យក​មក​ទម្លាក់​នៅ​ចំណុច​ខាងលើ​ ហើយ​ត្រូវ​បាន​គេ​រាយការណ៍​ដល់​សមត្ថកិច្ច​របស់​លោក ​​រហូត​ធ្វើការ​ចុះ​មក​បង្ក្រាប​តែម្ដង។ តែ​ចំណែក​ទូក​ដឹកឈើ​ ត្រូវ​បាន​បើក​រត់គេច​បាត់​ស្រមោល។

ប្រភព​បាន​ឱ្យ​ដឹង​ថា ​ឈើ​ទាំងនេះ​ ត្រូវបាន​ក្រុម​ឈ្មួញ​ធ្វើការ​កាប់​នៅ​តំបន់​ភូមិសាស្ត្រ​ស្រុក​សេសា​ន​រួច​ដឹក​តាម​ទូក​ជា​រៀងរាល់ថ្ងៃ​មកកាន់​ចំណុច​ខាងលើ ​ហើយ​ធ្វើការ​លក់​ទៅ​ឲ្យ​ក្រុម​ឈ្មួញ​ធ្វើការ​ដឹកជញ្ជូន​តាម​រ៉ឺម៉ក​រថយន្ត​សាំ​យ៉ុង​ទៅកាន់​ដេប៉ូ​ឈើ​ក្នុង​ខេត្ត​ត្បូងឃ្មុំ​ខេត្តកំពង់ចាម​និង​ខេត្តព្រៃវែង​។​

ប្រភព​បន្តថា​ ឈើ​ដែល​គេ​បង្ក្រាប​នេះ​គឺជា​ប្រភេទ​ឈើ​លេខ 1 និង​ឈើ​លេខ 2​ ដែល​គេ​អារច្រៀក​ជា​សន្លឹក​តូច​ធំ​នៅ​តាម​ទីផ្សារ​ ដែល​ក្រុម​ឈ្មួញ​កុម្ម៉ង់។

ក្រោយ​ការ​បង្ក្រាប​ កម្លាំង​នគរបាល​ប្រឆាំង​បទល្មើស​សេដ្ឋកិច្ច​ខេត្ត​ធ្វើការ​ប្រគល់​ទៅ​ឲ្យ​សង្កាត់​រដ្ឋបាល​ព្រៃឈើ​ក្បាល​រមាស​ស្រែគរ​ធ្វើការ​ដឹកជញ្ជូន​តាម​គោយន្ត​ដើម្បី​យក​ទៅ​រក្សាទុក​ចាត់ការ​ទៅតាម​នីតិវិធី​៕