កោះហាវ៉ៃ គេចផុតពីការបំផ្លាញធ្ងន់ធ្ងររបស់រលកដំបូងនៃរលកយក្សស៊ូណាមិ

រលកយក្សស៊ូណាមិបានមកដល់កោះហាវ៉ៃបន្ទាប់ពីការរញ្ជួយដីខ្លាំងបំផុតមិនធ្លាប់មានកម្រិត ៨.៨ រ៉ីចទ័រវាយប្រហារនៅឧបទ្វីប Kamchatka របស់រុស្ស៊ី តែកោះនេះបានជៀសផុតពីការខូចខាតធ្ងន់ធ្ងរនៅរលកដំបូង។ នេះបើយោងតាមការចេញផ្សាយរបស់ USA Today នៅថ្ងៃទី៣០ខែកក្កដានេះ។

ការរញ្ជួយដីនៅរុស្ស៊ីនេះបានបង្កឱ្យមានការព្រមានអំពីរលកយក្សស៊ូណាមិពាសពេញប៉ាស៊ីហ្វិក រួមទាំងតំបន់ឆ្នេរខាងលិចរបស់សហរដ្ឋអាមេរិក អាឡាស្កា ប្រទេសជប៉ុន និងនូវែលសេឡង់។

សម្រាប់នៅរដ្ឋហាវ៉ៃ អាជ្ញាធរភ័យខ្លាចរលកសមុទ្រអាចឡើងដល់កម្ពស់ជិត៣ម៉ែត្រជាង និងបានចេញបញ្ជាជម្លៀសជាបន្ទាន់សម្រាប់អ្នកនៅតំបន់ឆ្នេរ។ សំឡេងស៊ីរ៉ែនបានបន្លឺឡើងពាសពេញកោះនេះ ហើយអ្នកស្រុកបានឡើងទៅទីខ្ពស់ សាលារៀនបានលុបចោល ហើយក្រុមសង្គ្រោះបន្ទាន់ត្រូវបានដាក់ឱ្យមានការប្រុងប្រយ័ត្នខ្ពស់។

ទោះយ៉ាងណាអភិបាលរដ្ឋហាវ៉ៃលោក Josh Greenបាននិយាយថា រលកដំបូងរបស់ស៊ូណាមិហាក់ដូចជាមានការបំផ្លិចបំផ្លាញតិចជាងការរំពឹងទុក និងមិនប៉ះពាល់ធ្ងន់ធ្ងរដល់ប្រជាជននោះទេ។ ទោះជាយ៉ាងណាក៏ដោយ លោកបានសង្កត់ធ្ងន់ថា គ្រោះថ្នាក់អាចមានរយៈពេលរាប់ម៉ោង ដោយសារធម្មជាតិនៃរលកយក្សស៊ូណាមិ ដែលជារលកជាច្រើនដែលអាចជន់លិចតំបន់ឆ្នេរសមុទ្រដែលមិនអាចទាយទុកជាមុនបាន។

ទន្ទឹមនឹងនេះ ការព្រមានអំពីរលកយក្សស៊ូណាមិត្រូវបានពង្រីកទៅផ្នែកខ្លះនៃរដ្ឋកាលីហ្វ័រញ៉ា និងអាឡាស្កា រួមទាំងមានការប្រកាសឲ្យប្រយ័ត្នចំពោះរដ្ឋ British Columbia, Washington និង Oregon ។ ទោះបីជាតំបន់ភាគច្រើនត្រូវបានគេរំពឹងថានឹងឃើញរលកទាបៗក៏ដោយ ក៏អាជ្ញាធរបានព្រមានអំពីគ្រោះថ្នាក់ និងបានជំរុញឱ្យប្រជាជនគេចចេញពីតំបន់ឆ្នេរសមុទ្រ ។

ខណៈនៅប្រទេសរុស្ស៊ីការខូចខាតត្រូវបានគេរាយការណ៍នៅ Kamchatka ប៉ុន្តែមិនមានអ្នករងរបួសធ្ងន់ធ្ងរទេ។ ការរញ្ជួយដីនេះមានជម្រៅរាក់ ជម្រៅត្រឹមតែ១៩គីឡូម៉ែត្រ ដែលបង្កើនសក្តានុពលរបស់វាក្នុងការបង្កឲ្យមានសកម្មភាពរលកយក្សស៊ូណាមិ ខណៈរុស្ស៊ីក៏បានជំរុញឱ្យមានការជម្លៀសខ្លួនពលរដ្ឋចេញពីសហគមន៍ឆ្នេរសមុទ្ររុស្ស៊ីផងដែរ។

ទោះបីកោះហាវ៉ៃបានជៀសផុតពីការខូចខាតយ៉ាងសំខាន់ ប៉ុន្តែគ្រោះមហន្តរាយនេះបង្ហាញអំពីភាពងាយរងគ្រោះរបស់តំបន់នានចំពោះការរញ្ជួយដីនៅប៉ាស៊ីហ្វិក។ អាជ្ញាធរនៅតែ​បន្ត​តាមដាន​ស្ថានភាព​យ៉ាង​ដិតដល់ និង​បាន​ជំរុញ​ឲ្យ​សាធារណជន​មាន​ការ​ប្រុង​ប្រយ័ត្ន និង​ត្រៀម​ខ្លួនបន្ថែមទៀត៕

អត្ថបទ៖ ប៊ុន សុភាព