គិតត្រឹមម៉ោង ២:០០ រសៀលនេះ ជំនន់ទន្លេមេគង្គប៉ះពាល់​ឃុំចំនួន​ ៥ ឃុំ​ ​ក្នុង​ស្រុកចិត្របុរី

យោងតាមការឱ្យដឹងពីលោក យិន វណ្ណៈ អភិបាលស្រុកចិត្របុរីបានឱ្យដឹងថា គិតត្រឹមម៉ោង ២:០០ នាទីរសៀល ថ្ងៃទី៣០ ខែកក្កដា ឆ្នាំ២០២៥​ ស្ថានភាពអាកាសធាតុពុំមានភ្លៀង និងខ្យល់កន្ត្រាក់ឡើយ។

ស្ថានភាពជំនន់ទឹកទន្លេមេគង្គក្រចេះបានប៉ះពាល់​ឃុំចំនួន​ ៥ ឃុំ​ ស្មើ​ ១៧ភូមិ​ ក្នុងស្រុកចិត្របុរីក្នុងនោះមាន៖ ឃុំបុសលាវ​ ប៉ះពាល់ ចំនួន​ ៥ភូមិ​ រួមមាន៖ ភូមិព្រែកតាអាំ ភូមិព្រែកតាថឹង ភូមិបុសលាវលើ ភូមិបុសលាវក្រោម​ និងភូមិព្រះគន្លង ដោយលិចដំណាំស្រូវពង្រោះលើកទី២ ចំនួន ២១១ ហិកតា ស្មើនឹង ១៨៩ គ្រួសារ, លិចដំណាំពោតក្រហម ចំនួន​ ២៣ ហិកតា ​​ស្មើនឹង ១៤ គ្រួសារ, លិចក្រោមផ្ទះ ៣០ ខ្នងផ្ទះ, លិចផ្លូវលំ ៣.១០០ ម៉ែត្រ, លិចទំនប់ប្រវែង ៦.០០០ ម៉ែត្រ​។

ឃុំសំបុក​ ប៉ះពាល់ចំនួន​ ៣ ភូមិ គឺភូមិសំបុក ភូមិកាំពី និងភូមិក្បាលជួរ ដោយលិចដំណាំស្រូវ ១១១ ហិកតា ស្មើនឹង​ ៨០ គ្រួសារ លិចផ្លូវលំ​ប្រវែង​ ១.៥០០ ម៉ែត្រ។ ឃុំគោលាប់​ ប៉ះពាល់ ចំនួន​ ១ភូមិ​ គឺភូមិសំរិទ្ធ ដោយលិចដំណាំស្រូវចំនួន ២ ហិកតា​ ស្មើនិង​ ៤គ្រួសារ។

ឃុំដារ ប៉ះពាល់ ចំនួន​ ០៣ភូមិ គឺភូមិម្រើម​ ភូមិតាងួន និងភូមជួរជ្រៃ ដោយលិចដំណាំស្រូវ​សរុប​ ២៧ ហិកតា​ ស្មើនិង​ ៤៥ គ្រួសារ​, លិចដំណាំពោត ១៣ ហិកតា​ ស្មើនិង ៣៦ គ្រួសារ ជម្លៀសសត្វគោ ២០០ ក្បាល សត្វក្របី​ ៩៥ ក្បាល។
ឃុំកោះច្រែង​ ប៉ះពាល់ ចំនួន​ ៥ ភូមិ លិចដំណាំពោត សរុបចំនួន ២៨ ហិកតា​ ស្មើនិង​ ១៣៦ គ្រួសារ។

លោក យិន វណ្ណៈ ឱ្យដឹងបន្តថា តាមផែនការ គឺលោក ហឿ ស៊ីយ៉ែម ប្រធានក្រុមប្រឹក្សាខេត្ត ស្អែកនេះ និងចុះទៅ ពិនិត្យមើលនៅស្ថានភាពទឹក នៅក្នុងភូមិសាស្ត្រឃុំ បុសលាវ ហើយបន្តទៅពិនិត្យមើលទីពួរសុវត្ថិភាព តាឃីន ដើម្បីត្រៀមទុកជាមុនរួចហើយ ក្នុងករណីកម្ពស់ទឹកឡើងខ្ពស់ អាជ្ញាធរមូលដ្ឋានមានទួលសុវត្ថិភាព សម្រាប់ឱ្យប្រជាពលរដ្ឋ ស្នាក់នៅ និងជម្លៀសសត្វគោក្របី ជាដើម។

លោកក៏បានណែនាំដល់លោកមេឃុំបុសលាវ ឱ្យរៀបចំចាត់ចែងបោសសម្អាតទីលានទីទួលសុវត្ថិភាព ទួលតាឃីន និយាយ​រួមទៅតាមបណ្ដាឃុំ ដែលមានបញ្ហាប្រឈម និងមានទីទួលសុវត្ថិភាព ចាត់ចែងទួលសុវត្ថិភាព តាមទីតាំងសំខាន់ៗឱ្យហើយ ព្រោះត្រូវដឹងថា ឱ្យតែដល់ខែវស្សា រដូវទឹកឡើង ដូច្នេះត្រូវត្រៀមទុកឲ្យហើយ។

ចំពោះ ស្ថានភាពទឹកទន្លេមេគង្គ ក្នុងខេត្តក្រចេះ នៅថ្ងែទី៣០ ខែកក្កដា ឆ្នាំ២០២៥ នេះ ទឹកទន្លេមេគង្គក្រចេះ បានហក់ឡើងដល់កម្ពស់ ២០,២២ម៉ែត្រ ខណៈដែលកម្ពស់ទឹកប្រកាសឱ្យប្រុងប្រយ័ត្នក្នុងខេត្តមួយនេះ ស្ថិត​នៅកម្រិត​កម្ពស់ទឹក ២២,០០ម៉ែត្រ៕

អត្ថបទ ប្រុញ វិធិន