តើគ្រាប់បែក MK-84 ដែលថៃ ទម្លាក់លើកម្ពុជា មានកម្លាំងខ្លាំងកម្រិតណា?

អគ្គនាយកស៊ីម៉ាក់ លោក ហេង រតនា បានបញ្ជាក់ពីការរកឃើញគ្រាប់បែក MK-84 មួយគ្រាប់ដែលទម្លាក់ពីយន្តហោះចម្បាំង F-16 របស់ថៃ មកលើផ្ទះប្រជាពលរដ្ឋកម្ពុជា ក្នុងឃុំជាំក្សាន្ត ស្រុកជាំក្សាន្ត ខេត្តព្រះវិហារ។

តាមការបញ្ជាក់របស់លោកនៅលើទំព័រហ្វេសប៊ុក នេះជាប្រភេទគ្រាប់បែក MK-84​ មានទម្ងន់ជិត១តោន​ មានប្រវែងសរុបប្រមាណ៣.៥ម៉ែត្រ​ មានជាតិផ្ទុះជាង៥០០គីឡូក្រាម​ ជាគ្រាប់បែកមានទំហំធំជាងបំផុតក្នុងចំណោមប្រភេទគ្រាប់បែកក្នុងក្រុមគ្រាប់បែក MK (MK-81, MK82, MK-83 និងMK-84) ដែលបានទម្លាក់ដោយកងទ័ពអាកាសសៀមកាលពីកន្លងទៅថ្មីៗនេះ។ 

តើគ្រាប់បែកនេះខ្លាំងកម្រិតណា?

ការផ្ទុះរបស់ MK-84 អាចបង្កើតរណ្ដៅមានទទឹងធំរហូតដល់១៥ម៉ែត្រ និងជម្រៅ៧.៣ម៉ែត្រ ហើយអាចជ្រាបចូលទៅក្នុងលោហៈរហូតដល់៣៨សង់ទីម៉ែត្រ ឬស៊ីម៉ង់ត៍រហូតដល់៣.៤ម៉ែត្រ អាស្រ័យលើកម្ពស់ដែលវាត្រូវបានទម្លាក់។

MK-84 អាចបង្កការខូចខាតយ៉ាងធ្ងន់ធ្ងរដល់អគារក្នុងរង្វង់ ជាង ៣០០ ម៉ែត្រពីចំណុចផ្ទុះ។ ចំណែកការផ្ទុះរបស់វា បណ្តាលឲ្យបំណែកដែកខ្ទាតទៅក្នុងរង្វង់រាប់រយម៉ែត្រ បង្កគ្រោះថ្នាក់ដល់អាយុជីវិត។

មានរបាយការណ៍ខ្លះអះអាងថា អ្នកដែលស្ថិតនៅចម្ងាយជិតជាង១៨០ម៉ែត្រ ពីចំណុចផ្ទុះនៅពីលើដី មានលទ្ធភាពខ្ពស់ក្នុងការរងរបួសធ្ងន់ធ្ងរ ឬស្លាប់៕

អត្ថបទ៖ សុខ សុវណ្ណ

ចុចអាន៖ អនាគតឯកអគ្គរដ្ឋទូតអាមេរិក ប្រចាំទីក្រុងបាងកក បន្ទោស ថៃ ក្នុងជម្លោះព្រំដែនជាមួយកម្ពុជា