អ្នកមានឥទ្ធិពលលើប្រព័ន្ធផ្សព្វផ្សាយ ស្នើបន្តសាមគ្គីគ្នា កុំឱ្យការអាក់អន់ចិត្តមួយពេល ឈានដល់ការបែកបាក់ផ្ទៃក្នុង

បន្ទាប់ពីបទឈប់បាញ់នៃជម្លោះព្រំដែនកម្ពុជា-ថៃ បានចូលជាធរមានកាលពីពាក់កណ្តាលអធ្រាត្រថ្ងៃ២៨ ឈានចូលថ្ងៃទី២៩ កក្កដានេះ សាធារណជនខ្មែរមួយចំនួន ចាប់ផ្តើមងាកមកសម្តែងការមិនពេញចិត្ត ចំពោះភាពអសកម្មរបស់បុគ្គលមានឥទ្ធិពលលើបណ្តាញទំនាក់ទំនងសង្គម ខណៈហាក់ពុំបើកចិត្តស្តាប់ហេតុផលគ្នានិងគ្នានោះឡើយ។

សកម្មភាពនេះ បានធ្វើឱ្យមានក្តីព្រួយបារម្ភផងដែរក្នុងចំណោមមហាជនខ្មែរក្នុងស្រុកនិងក្រៅស្រុក ក៏ដូចជាមន្ត្រីរាជការ ជំរុញឱ្យអ្នកមានឥទ្ធិលលើប្រព័ន្ធផ្សព្វផ្សាយមួយចំនួនចេញមុខស្នើសុំឱ្យជនរួមជាតិខ្មែរ បើកចិត្ត អធ្យាស្រ័យ និងបន្តសាមគ្គីគ្នាដើម្បីជាតិ។

ដោយសង្កេតឃើញបែបនេះ លោក ឆេង សុភ័ក្ត្រ អ្នកផលិតមាតិកាល្បីឈ្មោះ ដែលសាធារណជនស្គាល់ ពូជ្រួញ ស្ថាបនិករៀនថត បានចេញមកស្នើឱ្យមហាជនកុំបន្តសកម្មភាពបន្ទោសនិងជេរប្រមាថគ្នា។ លោកថា “បើយើងបែកបាក់ផ្ទៃក្នុង គឺហានិភ័យខ្ពស់! យើងខ្លាំង ពេលដែលពួតដៃគ្នាជួយជាតិ”។

លោកបន្ថែមទៀតថា “អ្នកមិនខ្វល់ យើងទុកឲ្យគាត់រស់នៅបែបគាត់ទៅ ខ្ញុំជឿថា គាត់ក៏ចង់ធ្វើអ្វីដែរ តែអាចនឹងគាំងយោបល់គិតមិនទាន់ ឬមានហេតុផលផ្ទាល់ខ្លួន។ យើងគ្រាន់តែចាំទុកទៅថា អ្នកណាបានចូលរួម អ្នកណាគាត់បានធ្វើអ្វី! មិនចាំបាច់ដល់ថ្នាក់ជេរ ឬ ដាក់គំនាបលើគ្នាទេ”។

ជុំវិញរឿងរ៉ាវនេះ លោកស្រី មុីសន សុធារី ក្នុងកម្មវិធី KPTTalk កាលពីម្សិលមិញនេះ ក៏បានលើកយោបល់ជូនពីវ៊ចារណាចំណុចខុសគ្នានៃការប្រតិកម្មរបស់មនុស្សផងដែរ។ សូមស្តាប់ការលើកឡើងលម្អិតតាមរយៈវីដេអូខាងក្រោមនេះ៖

ក្នុងន័យនេះ ចង់សំដៅដល់ថា មិនថាក្នុងកាលៈទេសៈនេះ ឬនាពេលអនាគតទៅមុខ កម្លាំងរួបរួមសាមគ្គីជាតិ ពិតជាសំខាន់។ ជំនួសឱ្យការចំណាយពេលចំណាយចិត្តលើការដាក់គំនាបគ្នា ឬបន្ទោសបង្អាប់ជាន់ពន្លិចគ្នា លោកស្រី មុី សនសុធារី ក៏ដូចជាសាធារណជនខ្មែរ រួមនិងថ្នាក់ដឹកនាំផង ចង់មើលឃើញខ្មែរបន្តរួបរួមតម្កល់សាមគ្គីភាពជាតិជាធំ។ ដ្បិតអី កន្លងមកច្រើនជំនាន់មកហើយ ខ្មែរឆ្លងកាត់នូវភាពឈឺចាប់ ជូរចត់នៃការបែកបាក់ផ្ទៃក្នុងនេះ “កុំឱ្យប្រវត្តិសាស្ត្រច្រំដែល”។

ជាមួយគ្នានេះ សាធារណជនជាច្រើន បានបានចេញសារស្នើសុំកុំឱ្យសកម្មភាពជានៃការមិនពេញគ្នានេះ ធ្ងន់ធ្ងរឈានដល់ការបែកបាក់ផ្ទៃក្នុង ដោយចាត់ទុកថា ការបាត់សាមគ្គីភាពគ្នា ស្មើនឹងបើកឱកាសចោរឈ្លានពានមានឱកាសជាន់ខ្មែរ៕