ខ្មែរសាមគ្គី! ពលរដ្ឋនៅតែបន្តយុទ្ធនាការផ្ដល់ស្បៀងជួយទៅកាន់ជនភៀសសឹក និងកងទ័ពជួរមុខនៅតាមព្រំដែន

ស្មារតីជាតិនិយម ខ្មែរតែមួយ សំឡេងតែមួយរួបរួមគ្នាបន្តយុទ្ធនាការមូលនិធិសប្បុរសធម៌ដើម្បីឧបត្ថមគាំទ្រដល់វីរៈកង​ទ័ពជួរមុខឈរជើងការពារព្រំដែនកម្ពុជា-ថៃ និងប្រជាពលរដ្ឋរងគ្រោះដោយសារសង្រ្គាមឈ្លានពានរបស់ប្រទេសថៃ។

នៅស្តង់សម្រាប់ទទួលជំនួយពីបងប្អូនមហាជន ស្ថិតក្នុងតំបន់បឹងកក់ ក្បែរផ្សារទំនើប ខាឡែនឌើម៉ល សង្កាត់ស្រះចក ខណ្ឌដូនពេញ ជាទីតាំងសម្រាប់អោយបងប្អូនប្រជាពលរដ្ឋ ពីទីជិតឆ្ងាយយកស្បៀងគ្រប់ប្រភេទដើម្បីត្រៀមផ្ញើជូន ពលរដ្ឋភៀសសឹកជាច្រើននាក់ រួមនឹងកងទ័ពជួរមុខទៅតាមបណ្តោយខ្សែតំបន់ព្រំដែនកម្ពុជា-ថៃ។

អ្នកស្រី ម៉េង នី សំណាងយុទ្ធនាការមូលនិធិប្រមូលសម្ភារៈ និងស្បៀងអាហារបានអោយដឹងថា យុទ្ធនាការមនុស្សធម៌នេះ គឺធ្វើឡើងដើម្បីចូលរួមជួយដល់បងប្អូនគ្រួសារជនភៀស​សឹកកំពុងជួបវិបត្តិតាមព្រំដែន ដែលបណ្តាលឱ្យបងប្អូនជាច្រើនគ្រួសារត្រូវបានជម្លៀសចេញពីផ្ទះដោយបង្ខំ និងមិនអាចយកអ្វីតាមខ្លួនបាន។ ចំពោះសម្ភារៈមិនគិតច្រើន ឬក៏តិចនោះឡើយ អោយតែបងប្អូនប្រជាពលរដ្ឋទាំងអស់មានទឹកចិត្តជួយគ្នាក្នុងគ្រាលំបាកមួយនេះ។

អ្នកស្រីបានបន្ថែមថា គាត់មិននឹកស្មានថា ទឹកចិត្តរបស់បងប្អូនប្រជាពលរដ្ឋខ្មែរបានសម្រុកនាំគ្នាយកសម្ភារៈប្រើប្រាស់ ឬ ក៏ដូចជាស្បៀងច្រើនៗយ៉ាងខ្លាំងដែលលើសការរំពឹងទុក ដែលនេះសបញ្ជាក់ពីរួបរួមសាមគ្គីខ្មែរតែមួយ ជួយគ្នាក្នុងគ្រាលំបាក។

អ្នកនាំពាក្យក្រសួងការពារជាតិ បានបញ្ជាក់ថា គិតត្រឹមវេលាម៉ោង ០៥និង៤៥នាទីល្ងាចថ្ងៃទី៣០ ខែកក្កដា ឆ្នាំ២០២៥ មានជនភៀសសឹកសរុបរួម ១៧២០៩៤ នាក់ ដោយមានខេត្តចំនួន ០៥ ,ឧត្តរមានជ័យ ៣៩៥៤៦ នាក់ ,ខេត្តព្រះវិហារ ៣២៥៥៨ នាក់ ,ខេត្តបន្ទាយមានជ័យ ៣៥០៥៧ នាក់ ,ខេត្តពោធិ៍សាត់ ៣០២៦ នាក់ ,ខេត្តសៀមរាប ៦១៩០៧ នាក់ ដែលកំពុងភៀសសឹក រងគ្រោះពីការឈ្លានពានរបស់កងទ័ពថៃ តាមបណ្តាព្រំដែនកម្ពុជា-ថៃ៕

អត្ថបទ៖ រដ្ឋា