ព័ត៌មានជាតិ

សម្តេច ម៉ែន សំអន បួងសួងដល់ព្រះអង្គធំ រមណីយដ្ឋានទេសចរណ៍ប្រាសាទបាសាក់ ដើម្បីសុំសេចក្តីសុខ សេចក្តីចម្រើន ជូនប្រទេសកម្ពុជា

បានផុស

១១ ខែ មុន

នៅ

ថ្ងៃសុក្រ ១ សីហា ២០២៥

ដោយ

សម្តេចកិត្តិសង្គហបណ្ឌិត ម៉ែន សំអន អ្នកតំណាងរាស្ត្រមណ្ឌលស្វាយរៀង បានប្រារព្ធពិធីបួងសួងអុជធូប និងថ្វាយគ្រឿងសក្ការៈព្រះអង្គធំ រមណីយដ្ឋានទេសចរណ៍ប្រាសាទបាសាក់ ដើម្បីសុំសេចក្តីសុខ សេចក្តីចម្រើន ជូនប្រទេសជាតិកម្ពុជាទាំងមូល ដែលស្ថិតក្នុងភូមិបាសាក់ ឃុំបាសាក់ ស្រុកស្វាយជ្រុំ ខេត្តស្វាយរៀង នាព្រឹកថ្ងៃសុក្រ ៧ កើត ខែស្រាពណ៍ ឆ្នាំម្សាញ់ សប្តស័ក ព.ស. ២៥៦៩ ត្រូវនឹង ថ្ងៃទី ១ ខែសីហា ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួររំលឹកផងដែរថា ទួលប្រាសាទបាសាក់ស្ថិតក្នុងតំបន់ទួលព្រៃបុរាណ មានទទឹងប្រមាណជា ២៧ ម៉ែត្រ។ តំបន់នេះ មានចម្ងាយប្រមាណជា ៩ គ.ម ពីទីរួមខេត្តស្វាយរៀងបច្ចុប្បន្ន។ នៅតំបន់ទួលព្រៃបុរាណនេះ ជារមណីយដ្ឋានទេសចរណ៍ធម្មជាតិមួយយ៉ាងល្អប្រណិត គេឃើញមានទួលបុរាណ ២ ទៀត គឺ ទួលគោកសំពៅ ដែលស្ថិតនៅប៉ែកខាងត្បូង នៃទួលប្រាសាទបាសាក់ ហើយមានទទឹងប្រមាណជា ១៥០ ម៉ែត្រ និងទួលតាចង ដែលមានទំហំតូចជាងបន្តិច។

ប្រាសាទបាសាក់ដែលមានបណ្តោយប្រមាណជា ៥ ម៉ែត្រ គឺជាប្រាសាទទោល សាងសង់អំពីឥដ្ឋ ក្នុងសម័យវប្បធម៌ចេនឡា ដូចវត្តមានរបស់ក្បាច់ថ្ម ខ្លោងទ្វារជាភស្តុតាងស្រាប់។ ថ្វីត្បិតតែប្រាសាទបុរេអង្គរនេះ ត្រូវខ្ទេចខ្ទាំដោយការបំផ្លិចបំផ្លាញក្តី ក៏ប៉ុន្តែទីនោះនៅសល់តួប្រាង្គមួយចំហៀង ដែលមានកម្ពស់ ២ ម៉ែត្រ នៅសល់តែសសរខ្លោងទ្វារមួយតែប៉ុណ្ណោះដែលជាអ្វីមួយអាចបញ្ជាក់នូវកាលបរិច្ឆេទបានយ៉ាងប្រាកដ៕

អត្ថបទ ៖ វិមាន