តុលាការ​ឃុំខ្លួន​អតីតប្រធានាធិបតីប្រេស៊ីល​ ខណៈ​ទំនាក់​ទំនង​​ប្រេស៊ីល-អាមេរិកល្អក់​កករ​​

តុលាការកំពូលរបស់ប្រទេសប្រេស៊ីលបានដាក់អតីតប្រធានាធិបតី Jair Bolsonaro ឱ្យស្ថិតក្រោមការឃុំខ្លួនក្នុងផ្ទះ ខណៈដែលលោករង់ចាំការកាត់ទោសពីបទប៉ុនប៉ងផ្តួលរំលំការបោះឆ្នោតឆ្នាំ ២០២២​ របស់ប្រធានាធិបតីបច្ចុប្បន្នលោក Luiz Inacio Lula da Silva។ នេះបើយោងតាមការចេញផ្សាយរបស់សារព័ត៌មាន ​CNA នៅថ្ងៃទី០៥ខែសីហា។

បើតាមតុលាការប្រេស៊ីល លោក Bolsonaro បានបំពានលើការហាមឃាត់ពីមុន ដោយព្យាយាមពាក់ព័ន្ធនឹងប្រធានាធិបតីអាមេរិក លោក ដូណាល់ ត្រាំ ក្នុងបញ្ហាផ្លូវច្បាប់របស់ខ្លួន។ ដីកាចាប់ខ្លួននេះត្រូវបានផ្តល់ដោយចៅក្រម Alexandre de Moraes ដែលថ្មីៗនេះត្រូវបានសហរដ្ឋអាមេរិកដាក់ទណ្ឌកម្មដោយសហរដ្ឋអាមេរិកនិងមិនអនុញ្ញាតឱ្យមានការបញ្ចេញមតិដោយសេរីនៅក្នុងប្រទេសប្រេស៊ីលនោះទេ។

ក្រោមដីកាថ្មីរបស់តុលាការលោក Bolsonaro មិនត្រូវបានអនុញ្ញាតឱ្យប្រើទូរស័ព្ទ ឬទទួលភ្ញៀវទេ លើកលែងតែមេធាវីរបស់លោក ឬមនុស្សដែលត្រូវបានអនុញ្ញាតដោយតុលាការ។ ប៉ូលិសបានទៅពិនិត្យផ្ទះរបស់លោកនៅ Brasilia កាលពីថ្ងៃចន្ទដើម្បីដាក់លោកឱ្យស្ថិតនៅក្រោមការឃុំខ្លួនជាផ្លូវការនៅក្នុងផ្ទះនិងយកទូរស័ព្ទរបស់លោកចេញ ខណៈមេធាវីរបស់លោក Bolsonaro បាននិយាយថា ពួកគេមានគម្រោងប្តឹងឧទ្ធរណ៍លើការសម្រេចចិត្តនេះ ដោយលើកហេតុផលថា លោកមិនបានបំពានច្បាប់ណាមួយឡើយ។

ករណីនេះកើតចេញពីការស៊ើបអង្កេតដ៏ធំមួយដែលចោទប្រកាន់លោក Bolsonaro ក្នុងការរៀបចំកិច្ចខិតខំប្រឹងប្រែងដើម្បីបដិសេធលទ្ធផលនៃការបោះឆ្នោតឆ្នាំ ២០២២ និងជាកិច្ចខិតខំប្រឹងប្រែងដែលនាំឱ្យមានកុប្បកម្មហិង្សានៅ ទីក្រុងBrasilia ក្នុងខែមករាឆ្នាំ ២០២៣ ស្រដៀងទៅនឹងកុបកម្មកាពីតូលថ្ងៃទី ០៦ ខែមករានៅទីក្រុងវ៉ាស៊ីនតោនឌីស៊ី។

ជាការឆ្លើយតបទៅនឹងសកម្មភាពរបស់តុលាការ លោក ដូណាល់ ត្រាំ បានហៅការកាត់ក្តីនេះថាអយុត្តិធម៌ និងបានដាក់ពន្ធថ្មីលើទំនិញប្រេស៊ីល រួមទាំងទង់ដែង និងការនាំចូលផ្សេងទៀត។ លោក ត្រាំ ក៏បានផ្ញើលិខិតគាំទ្រដល់ Bolsonaro ដោយរិះគន់ប្រព័ន្ធច្បាប់របស់ប្រេស៊ីល និងជំរុញឱ្យការកាត់ក្តីបញ្ឈប់។

លោក Bolsonaro នៅតែមានការគាំទ្រខ្លាំងក្នុងចំណោមក្រុមស្តាំនិយមជ្រុលនៅក្នុងប្រទេសប្រេស៊ីល។ កាល​ពី​ចុង​សប្តាហ៍ អ្នកគាំទ្រ​របស់​លោក​បាន​ធ្វើ​ការ​តវ៉ា​ទ្រង់ទ្រាយ​ធំ​នៅ​ក្នុង​ទីក្រុង​ដូចជា Rio de Janeiro។

ឥឡូវនេះមន្ត្រីប្រេស៊ីលមួយចំនួនព្រួយបារម្ភថា ការចូលរួមរបស់លោក ត្រាំ កំពុងធ្វើឱ្យស្ថានភាពលោក Bolsonaro កាន់តែអាក្រក់ៗទៅ និងរឹតតែជំរុញការគាំទ្រសាធារណៈចំពោះប្រធានាធិបតី Lula។ អ្នកជំនាញក៏បានព្រមានថា ស្ថានភាពនេះអាចបំផ្លាញទំនាក់ទំនងរវាងប្រេស៊ីល និងសហរដ្ឋអាមេរិកបន្ថែមទៀត។

គួរបញ្ជាក់ថាលោក Bolsonaro ត្រូវបានតុលាការហាមឃាត់រួចហើយពីការឈរឈ្មោះចំពោះតំណែងនាយករដ្ឋមន្រ្តីរហូតដល់ឆ្នាំ ២០៣០ ហើយករណីថ្មីនេះអាចបញ្ចប់អនាគតនយោបាយរបស់លោកទាំងស្រុង៕

អត្ថបទ៖ ប៊ុន សុភាព