បណ្ឌិត គិន ភា ថា​ ពលរដ្ឋខ្មែរគ្រប់ទិសទីមិនភ្លេចឡើយ ចំពោះសុវត្ថិភាព អាយុជីវិតកងទ័ពនៅជួរមុខ និងថៃចាប់ទៅ

ប្រធានវិទ្យាស្ថានទំនាក់ទំនងអន្តរជាតិកម្ពុជា នៃរាជបណ្ឌិត្យសភាកម្ពុជា បណ្ឌិត គិន ភា បានលើកឡើងថា ប្រជាជនកម្ពុជានៅគ្រប់ទិសទី មិនភ្លេចឡើយចំពោះសុវត្ថិភាព និងអាយុជីវិតកងទ័ពកម្ពុជាដែលកំពុងឈរនៅជួរមុខក្នុងសមរភូមិយ៉ាងអង់អាចតទល់ជាមួយការឈ្លានពានរបស់ថៃ និងកងទ័ពកម្ពុជាដែលថៃចាប់យកទៅដោយខុសច្បាប់ បន្ទាប់ពីបទឈប់បាញ់ចូលជាធរមាន។

ការលើកឡើងរបស់លោកបណ្ឌិត តាមរយៈការចែករំលែកបន្តនូវការផុសរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅយប់ថ្ងៃទី៦ ខែសីហា ឆ្នាំ២០២៥ ដែលបង្ហោះពីរូបភាពប្រជាជនខ្មែរនៅក្រៅប្រទេសប្រមូលផ្តុំគ្នាគាំទ្រចំពោះកងទ័ពខ្មែរ ក្នុងកិច្ចការពារបូរណភាពទឹកដីពីការឈ្លានពានរបស់ថៃ និងទាមទារឱ្យដោះលែងទាហានកម្ពុជា ១៨រូប ដែលថៃបានចាប់ខ្លួនកាលពីថ្ងៃទី២៩ ខែកក្កដា បន្ទាប់ពីបទឈប់បាញ់ចូលជាធរមានកាលពីថ្ងៃទី២៨ ខែកក្កដា។

លោកបណ្ឌិត គិន ភា សរសេរថា៖ “ប្រជាពលរដ្ឋខ្មែរយើងគ្រប់ច្រកល្ហក ក៏មិនដែលភ្លេចមួយវិនាទីណាឡើយ ចំពោះសុវត្ថិភាព និងអាយុជីវិត នៃវីរកងទ័ពយើងដែលទាហានឈ្លានពានសៀមចាប់ជម្រត់យកទៅដោយខុសច្បាប់ ក៏ដូចជាវីរកងទ័ពយើងដែលកំពុងឈរជើងយ៉ាងរឹងមាំក្លាហាននៅសមរភូមិមុខ និងវីរកងទ័ពដែលពលី ពិការ ដើម្បីការពារទឹកដីដែលជាដំណក់ឈាមដូនតា។ ទឹកដីនេះ មួយមីលីម៉ែត្រណាក៏មានដំណក់ឈាមដូនតាយើងដែរ”។

សូមជម្រាបថា នៅក្នុងការផុសរបស់សម្តេចធិបតី បានបង្ហាញពីប្រជាជនខ្មែរជាច្រើនដែលរស់នៅប្រទេសផ្សេងៗ ប្រមូលផ្តុំគ្នាគាំទ្រដល់កងទ័ពកម្ពុជាការពារបូរណភាពទឹកដី និងទាមទារឱ្យដោះលែងទាហានខ្មែរដែលថៃចាប់ទៅ។ សម្តេច ថាសកម្មភាពទាំងអស់នេះ គឺបង្ហាញយ៉ាងច្បាស់នូវស្មារតីស្នេហាជាតិ សាមគ្គីឯកភាពជាតិ ដែលជាកត្តាសំខាន់របស់ជាតិខ្មែរ ជាពិសេស គឺបង្ហាញយ៉ាងច្បាស់នូវស្មារតីស្រឡាញ់សន្តិភាព ដេីម្បីឈានទៅបញ្ចប់សង្គ្រាម។ នាយករដ្ឋមន្ត្រីកម្ពុជា បញ្ជាក់ថា៖ “រាជរដ្ឋាភិបាលនៅតែប្រកាន់ជំហរដាច់ខាតក្នុងកិច្ចការពារបូរណភាពភាពទឹកដី និងការដោះស្រាយបញ្ហាជម្លោះដោយសន្តិវិធី ដើម្បីបញ្ចប់ជម្លោះរវាងកម្ពុជានិងថៃអោយបានឆាប់រហ័ស”។

ក្នុងការផុសដដែល សម្តេចធិបតី ហ៊ុន ម៉ាណែត បញ្ជាក់បន្ថែមថា កម្ពុជាមិនភ្លេចយោធិនកម្ពុជាទាំង១៨រូប ដែលកំពុងស្ថិតក្រោមការឃុំគ្រងរបស់កងទ័ពថៃនោះទេ។ ទន្ទឹមនោះ រាជរដ្ឋាភិបាលកម្ពុជា បាននិងកំពុងបន្តព្យាយាមគ្រប់យន្តការ ដើម្បីទាមទារឱ្យមានការដោះលែងទាហានខ្មែរមកកម្ពុជាវិញឆាប់រហ័សបំផុត៕