ព័ត៍មានទាន់​ហេតុការណ៏
Search

ឃួន ឡា​បូ​រ៉ាវី លើកទឹកចិត្ត​កីឡាករ​ក្នុងស្រុក​ឲ្យ​ចេញ​ទៅ​បង្ហាញ​សមត្ថភាព​ក្នុង​លី​គ​ក្រៅប្រទេស

កីឡាករ ឃួន ឡា​បូ​រ៉ាវី ដែល​សម្រេចចិត្ត​ចេញទៅ​បន្ត​អាជីព​ក្នុង​ក្រុម Surat Thani FC​សមាជិក​ក្នុង​ពានរង្វាន់​លី​គ​លំដាប់​ទី​៣​របស់​ប្រទេស​ថៃ (T3-League) ឆ្នាំ​២០១៨​មុន​កាលកំណត់ បាន​អះអាង​លើកទឹកចិត្ត​កីឡាករ​ក្នុងស្រុក​ថា​ឲ្យ​ចេញទៅ​បង្ហាញ​សមត្ថភាព​ក្នុង​លី​គ​ប្រ​ទេស​ដទៃ ដើម្បី​សក្តានុពល​របស់ខ្លួន​។

​កីឡាករ​រូប​នេះ​បាន​បន្ត​ថា «​ល្អ​ចំពោះ​កីឡាករ ព្រោះ​បើ​មានឱកាស គាត់​អាច​ទៅ​ដកស្រង់​បទពិសោធ ទោះ​កន្លះ​រដូវ​កាល ឬមួយ​រដូវ​កាល​តាមតែ​គាត់​អាចធ្វើ​ទៅ​បាន​។ ជួនកាល​យើង​គិតថា យើង​លេង​នៅ​លី​គ​យើង​វា​ល្អ​ដែរ​ហើយ តែបើ​បាន​ទៅ​ក្រៅប្រទេស​ទៀត យើង​នឹង​អាច​ឃើញ​អ្វី​ប្លែកៗ មួយដង​ក្នុង​ឆាកជីវិត​ក៏​ល្អ​ដែរ​»​។ កីឡាករ ឃួន ឡា​បូ​រ៉ាវី ដែល​ធ្វើដំណើរ​ទៅ​ប្រកប​អាជីព​នៅ​ក្រៅ​ប្រទេស​តាំងពី​ចុងខែ​មិថុនា កន្លងមក​ធ្លាប់​រកបាន​គ្រាប់​បាល់​១​គ្រាប់​ក្នុងចំណោម​៥​ប្រកួត​ដែល​បង្ហាញខ្លួន​ផ្លូវការ​ជាមួយ​ក្រុម​ថៃ​មួយ​នេះ​។

ក្រោយពេល​ធ្វើដំណើរ​មក​ដល់​ប្រទេស​កម្ពុជា វិញ ឃួន ឡា​បូ​រ៉ាវី បាន​ចូលរួម​ជាមួយ​ក្រុម​បឹងកេត តែ​មិនអាច​បង្ហាញខ្លួន​លើ​ទីលាន​បាន​នោះទេ ដោយសារតែ​ពានរង្វាន់​លី​គ​កំពូល​កម្ពុជា និង​ពានរង្វាន់​សម្តេច​តេ​ជោ ហ៊ុន សែន ផុតកំណត់​កាលបរិច្ឆេទ​ចុះឈ្មោះ​កីឡាករ​ចូល​តាម​ក្រុម​នីមួយៗ​ហើយ​។ ដូច្នេះ ឡា​បូ​រ៉ាវី ត្រូវ​រង់ចាំ​ការប្រកួត​នានា​នៅ​រដូវ​កាល​ក្រោយ​។

គេ​ចាំ​បាន​ថា​ កីឡាករ ឃួន ឡា​បូ​រ៉ាវី ជា​អ្នក​រកបាន​គ្រាប់​បាល់​ច្រើន​ជាងគេ​ប្រចាំ​ព្រឹត្តិការណ៍​ពានរង្វាន់​សម្តេច​តេ​ជោ ហ៊ុន សែន ពោល​គឺ​ឈ្នះ​៤​លើក​ច្រើនជាង​កីឡាករ​ដទៃ គិត​តាំង​បង្កើត​ឡើង​ដំបូង​នៅ​ឆ្នាំ​២០០៧ មក​ពោល​គឺ​នៅ​ឆ្នាំ​២០១១ និង​២០១២ ជាមួយ​ក្រុម​ខេត្តស្វាយរៀង (​ព្រះខ័ន​រាជ​ស្វាយរៀង បច្ចុប្បន្ន​) នៅ​ឆ្នាំ​២០១៤ និង​២០១៧ ជាមួយ​បឹងកេត​។ កីឡាករ​វ័យ​២៩​ឆ្នាំ​រូប​នេះ​បាន​ចាប់​អាជីព​បាល់ទាត់​ដំបូង​ពី​ឆ្នាំ​២០០៨ មក​ម្ល៉េះ​ដោយ​កាលនោះ​ចូលរួម​ជាមួយ​ក្លិប​ព្រះខ័ន​រាជ​ស្វាយរៀង ហើយ​ដល់​ឆ្នាំ​២០១៤ រូបគេ​បាន​ចេញទៅ​ចូល​រួម​ជាមួយ​ក្រុម​បឹងកេត រហូតដល់ បច្ចុប្បន្ន។ ចំពោះ​ក្នុង​ក្រុម​ជម្រើសជាតិ​វិញ រូបគេ​បាន​បង្ហាញ​ខ្លួន​ជាមួយ​ក្រុម U23 កម្ពុជា ចាប់ពី​ឆ្នាំ​២០០៩ ដល់​២០១១ ខណៈ​ចាប់ពី​ឆ្នាំ​២០០៨ ដល់​បច្ចុប្បន្ន​រូបគេ​ក៏មាន​ឈ្មោះ​លេង​ជាមួយ​ក្រុម​ជម្រើសជាតិ​កម្ពុជា ផងដែរ។

កីឡាករ​កម្ពុជា ១,៨១​ម៉ែត្រ​រូប​នេះ​ ធ្លាប់​ឈ្នះ​ពានរង្វាន់​លី​គ​កំពូល​កម្ពុជា ៣​លើក​គឺ​នៅ​ឆ្នាំ​២០១៣ ជាមួយ​ក្លិប​ព្រះខ័ន​រាជ​ស្វាយរៀង ហើយ​នៅ​ឆ្នាំ​២០១៦ និង​២០១៧ ឈ្នះ​ជាមួយ​ក្រុម​បឹងកេត​ខណៈ​ធ្លាប់​ឈ្នះ​ពានរង្វាន់​សម្តេច​តេ​ជោ ហ៊ុន សែន នៅ​ឆ្នាំ​២០១១,២០១២ ផងដែរ​។ អ្វី​ដែល​គួរ​ឲ្យ​ចាប់អារម្មណ៍​កីឡាករ ឃួន ឡា​បូរ៉ា​រី ធ្លាប់​ឈ្នះ​ពានរង្វាន់​កីឡាករ​ដែល​ទា​ត់ប​ញ្ចូល​ទី​បាន​ច្រើន​ជាង​គេ​ដល់​ទៅ​៥​លើក​ គឺ​ក្នុង​លី​គ​កំពូល​កម្ពុជា ឆ្នាំ​២០១៣ និង​ឈ្នះ​ក្នុង​ពានរង្វាន់​សម្តេច​តេ​ជោ ហ៊ុន សែន ក្នុង​ឆ្នាំ​២០១១,២០១២,២០១៤​និង​២០១៧៕