ព័ត៍មានទាន់​ហេតុការណ៏
Search

សម្តេច​តេ​ជោ ហ៊ុន សែន ជំរុញ​ឲ្យ​ក្រុមហ៊ុន កួ ហុង បណ្តាក់ទុន​វិនិយោគ​នាំចេញ​នូវ​ផលិត​កសិកម្ម​ពី​ប្រទេស​កម្ពុជា​ឲ្យ​បាន​ច្រើន

ភ្នំពេញ ​៖ ​សម្ដេច​អគ្គមហាសេនាបតី​តេ​ជោ ហ៊ុន សែន ក្នុង​ឱកាស​ស្នាក់នៅ​ដើម្បី​ចូលរួម​ពិព័រណ៍​ពាណិជ្ជកម្ម អាស៊ាន ចិន លើក​ទី ១៥ នៅ​ទីក្រុង​ណាន់​នី​ង ប្រទេស​ចិន កាលពី​ល្ងាច​ថ្ងៃទី ១០ ខែកញ្ញា បានអនុញ្ញាត​ឲ្យ​លោក លី គាន (Li Qian) នាយក​សាជីវកម្ម​អភិវឌ្ឍន៍ កួ ហុង (Guangxi Guhong Develop ment Corporation) នៃ​តំបន់​ស្វយ័ត​ជនជាតិ​ជ័​ង​ក្វាង​ស៊ី ចូលជួប​សំដែង​ការគួរសម និង ពិភាក្សា​ការងារ។

ក្នុងជំនួប​លោក លី គាន (Li Qian)​បាន​មានប្រសាសន៍​ជំរាបជូន​សម្តេច​តេ​ជោ​នាយករដ្ឋមន្ត្រី​ថា​ក្រុមហ៊ុន​របស់ លោក បានធ្វើការ​បណ្តាក់ទុន​វិនិយោគ​លើ​វិស័យ​កសិកម្ម​ក្នុងប្រទេស​កម្ពុជា​មាន​រយៈពេល​៦​ឆ្នាំ​មកហើយ។ កាលពីពេល​កន្លងមក ក្រុមហ៊ុន បានធ្វើការ​នាំចូល​អង្ករ​ប្រមាណ ៥ ម៉ឺន​តោន​មកកាន​ទីក្រុង​ណាន​នី​ង។ ជាមួយគ្នានេះ​លោក​ប្រធាន​បានធ្វើ​ការស្នើសុំ​ការអនុញ្ញាត​ពីស​ម្តេច​តេ​ជោ​នាយករដ្ឋមន្ត្រី​លើ​ភាពអនុគ្រោះ​កូតា​ក្នុងការ​នាំចូល​ កសិផល​កសិកម្ម​វេច​ស្ងួត ដូចជា​គ្រាប់ស្វាយចន្ទី និង ស្វាយ​ក្រៀម មកកាន់​ទីក្រុង​ណាន​នី​ង​នៅពេល​ខាងមុខ​។​

ក្រុមហ៊ុន GUANXI GUOHONG DEVELOPMENT របស់​ខេត្ត​គង់​ស៊ី​ដែល​បាន​វិនិយោគ​បង្កើត​រោងចក្រ​កែច្នៃ​ស្រូវ​អង្ករ​នៅ​ផ្លូវជាតិ​លេខ​៥ លើ​ផ្ទៃដី​ប្រមាណ ៨ ហិកតា ហើយ​ដែល​បាន​កែច្នៃ​អង្ករ​សម្រាប់​នាំចេញ​និង​ផ្គត់ផ្គង់​ទីផ្សារ​កម្ពុជា ដែលមាន​សមត្ថភាព​កែច្នៃ​ក្នុង​១​ថ្ងៃ ១.៥០០ តោន ពិសេស​នាំ​ចេញទៅ​ប្រទេស​ចិន ហើយ​ថ្នាក់ដឹកនាំ និង​ប្រជាជន​ចិន​នៅ​ខេត្ត​គង់​ស៊ី ស្គាល់​អង្ករ​កម្ពុជា​យ៉ាងច្បាស់ គឺ “​ម្លិះ​សៀមរាប​”។

ជាការ​ឆ្លើយតប សម្តេច​តេ​ជោ​នាយករដ្ឋមន្ត្រី ធ្វើការ​វាយតម្លៃ​ខ្ពស់​ចំពោះ​គម្រោង​វិនិយោគ​របស់​ក្រុមហ៊ុន​សាជីវកម្ម​អភិវឌ្ឍន៍ កួ ហុង ដែល​បានធ្វើ​ការវិនិយោគ​ក្នុងប្រទេស​កម្ពុជា។ សម្តេច​បានស្នើ​ឲ្យ​មាន​ពិនិត្យ​លទ្ធភាព​និង​សិក្សា​ឲ្យ​កាន់តែ​ស៊ីជម្រៅ​ថែមទៀត​ក្នុងការ​បណ្តា​ទុនវិនិយោគ​នាំចេញ​នូវ​ផលិត​កសិកម្ម​ពី​ប្រទេស​កម្ពុជា​មកកាន់​ទីក្រុង​ណាន​នី​ង​នៃ​តំបន់​ស្វយ័ត​ជនជាតិ​ជ័​ង​ក្វាង​ស៊ី​ប្រទេស​ចិន៕