ព័ត៍មានទាន់​ហេតុការណ៏
Search

សុគន្ធ នីសា បញ្ចេញ​សារ​ក្តុកក្តួល​ក្នុង​ចិត្ត​អាណិត​បុរស​វ័យ​ចំណាស់​ចុះ​បា​រសំរាម​ចេញពី​លូទឹកស្អុយ

ភ្នំពេញ​ ៖​ តារា​ចម្រៀង​ស្រី​ទឹកមុខ​ស្រងូតស្រងាត់​ និង​មាន​សំឡេង​ពីរោះ​ស្រទន់​អ្នកនាង សុគន្ធ នីសា បន្ទាប់ពី​បាន​ឃើញ​រូបភាព​ដ៏​កំសត់ និង គួរ​ឲ្យ​​​សង្វេគ​របស់​បុរស​មាន​វ័យ​ចំណាស់​ម្នាក់​ស្ថិត​ក្នុង​សភាព​កំពុង​ចុះ​បា​សំរាម​ចេញពី​ចំណុច​លូទឹកស្អុយ​នោះ ​នាង​ក៏បាន​បង្ហាញ​អារម្មណ៍​ក្តុកក្តួល​ចិត្ត​អាណិត​ខ្លាំង​ដល់​ជីវិត​កម្មករ​រូបនោះ​។​

បញ្ចេញ​អារម្មណ៍​ពិត​ផ្ទាល់ខ្លួន​ចូលរួម​បំផុសស្មារតី​របស់​ប្រជាពលរដ្ឋ​ឲ្យ​មានការ​ទុកដាក់​សំរាម​ឲ្យ​មាន​សណ្ដាប់ធ្នាប់​ផង​នោះ ​អ្នកនាង សុគន្ធ នីសា បានលើកឡើង​ថា ​មើល​វីដេអូ​នេះហើយ​មាន​អារម្មណ៍​ថា អាណិត​ពួកគាត់ ជីវិត​ពួកគាត់​ពិតជា​អស្ចារ្យ​ណាស់​ការងារ​ដែល​គ្រប់គ្នា​ខ្ពើមរអើម តែ​ពួកគាត់​ធ្វើ​ជិត​៣០​ឆ្នាំ​ហើយ។ តាមពិតទៅ​យើង​គ្រាន់តែ​កាន់​សំរាម​មួយ​កញ្ចប់​ឬ​ថង់​មួយ​ទៅ​ដាក់​ក្នុង​ធុងសំរាម​ក៏​មិនជា​រឿង​ពិបាក​ដែរ​។​

​អ្នកនាង សុគន្ធ នីសា បញ្ជាក់ថា ​ពួកយើង​ទាំងអស់គ្នា​មានការ​ងារ​ធ្វើ និង​រស់នៅក្នុង​បរិស្ថាន​ដ៏​ល្អ​ណាស់​យើង​ក៏​អាច​ចាប់ផ្តើម​ពី​ខ្លួន​យើង​ជួយ​ថែរក្សា​ឬ​សម្អាត​បរិស្ថាន​ជុំវិញខ្លួន ក៏ដូចជា​ជួយ​ពួកគាត់​ដែរ​ព្រោះ​ការងារ​ពួកគាត់​គឺជា​ជីវិត​មួយបែប​ដែល​យើង​មិន​ធ្លាប់​គិតដល់​ហើយ​ជីវិត​បែបនេះ​នឹងមិន​សូវ​ជា​ពិបាក​ប៉ុន្មាន​ទេ​ប្រសិនបើ​យើង​គ្រប់គ្នា​ចូលរួមចំណែក​ប្រព្រឹត្ត​និង​ទទួលខុសត្រូវ​រៀងៗ​ខ្លួន​ចំពោះ​សំរាម និង​កាកសំណល់​ផ្សេងៗ​ឲ្យ​មាន​របៀប​ត្រឹមត្រូវ​។​



តារាចម្រៀង​ហង្ស​មាស​អ្នកនាង សុគន្ធ នីសា និយាយ​បន្តទៀតថា បែបនេះ​អាចជួយ​សម្រាល​ដល់ការងារ​គាត់ ហើយ​បាន​បរិស្ថាន​ស្អាត​ទាំងអស់គ្នា​។​សង្ឃឹមថា មើលរូប​ភាព​មួយ​នេះហើយ យើងទាំងអស់គ្នា​នឹង​បង្អង់​គិត​មុននឹង​ចោល​សំរាម​ថា​សំរាម​វា​ត្រូវតែ​នៅ​កន្លែង​សម្រាប់​ដាក់​សំរាម ប្រសិនបើ​យើង​ខ្លួនឯង​មិនបាន​ដាក់​វា​ឲ្យ​ត្រូវ​កន្លែង​ទេ នោះ​ប្រាកដជា​តម្រូវ​ឲ្យ​អ្នកផ្សេង​ទៅតាម​រើស​សំរាម​របស់​យើង ដែល​ធ្លាក់​ប៉ើង​គ្រប់កន្លែង​នោះ​ដល់​ក្នុង​លូ​ឲ្យ​យើង​ហើយ​។​

បន្ថែម​ពីលើ​នេះ​តារាចម្រៀង​ចង្កា​ស្រួច​ដែល​ទទួលបាន​ការគាំទ្រ​និង​មាន​ប្រជាប្រិយភាព​អ្នកនាង សុគន្ធ នីសា បាន​លើកឡើងថា សន្យា​ចូលរួម​ទាំងអស់គ្នា​ណា​នាង​ខ្ញុំ​ក៏​សន្យា​ដែរ​ថា​នឹង​ថែរក្សា​សណ្ដាប់ធ្នាប់ កុំ​ចោល​សំរាម​ផ្តេសផ្តាស ដើម្បី​មនុស្ស​គ្រប់គ្នា​ក្នុងសង្គម​យើង។ មាន​ទស្សនៈ​ជាច្រើន​បាន​សម្តែង​ការគាំទ្រ​និង​លើកសរសើរ​ចំពោះ​ទឹកចិត្ត​បំផុស​របស់​តារា​ស្រី​អ្នកនាង សុគន្ធ នីសា៕