ព័ត៍មានទាន់​ហេតុការណ៏
Search

លោក មាស ចាន់ណា នៅតែមាន​ជំនឿ​ចិត្ត​ចំពោះ​កីឡាករ គួច សុ​គុ​ម្ភៈ ដែល​ដណ្តើម​កៅអី​ក្នុង​ក្រុម​ជម្រើសជាតិ​កម្ពុជា ជាច្រើន​ឆ្នាំ​ទៀត

លោក មាស ចាន់ណា គ្រូបង្វឹក​ណាហ្គា​វើ​ល​សមាជិក​ក្នុង​លី​គ​កំពូល​កម្ពុជា (Metfone Cambodian League 2018) បានបង្ហាញ​ពី​ទស្សនៈ​​​មាន​មួយ​ថា​ កីឡាករ​ប្រធាន​​​ក្រុម​របស់​ក្លិប​ខ្លួន​គឺ គួច សុ​កុម្ភៈ អាច​នឹង​បន្ត​រក្សា​កៅអី​ក្នុង​បញ្ជី​ឈ្មោះ​ក្រុម​ជម្រើសជាតិ​កម្ពុជា បើទោះបី​ពេលនេះ​​ ​​​រូបគេ​មាន​វ័យ​រហូត​៣១​ឆ្នាំ​ហើយ​ក្ដី​។

លោក មាស ចាន់ណា បានលើកឡើង​ក្រោយ​ការសង្កេត​របស់ខ្លួន​ថា ​៖ «​ចំពោះ កុម្ភៈ គេ​មើ​ល​ម​កថា​គាត់​អាយុ​ច្រើន​បន្តិច​មែន តែ​គាត់​ជា​កីឡាករ​ម្នាក់​ដែល​ខ្ញុំ​អាច​និយាយថា នៅ​ស្រុក​ខ្មែរ​ពិបាក​រក ព្រោះថា​គាត់​អត់​ចេះ​ដើរលេង​ខូចខិល អត់​ចេះ​សេព​គ្រឿង​ស្រវឹង បើ​ធៀប​នឹង​កីឡាករ​១​ភាគ​ធំ​។ គាត់​គិតតែ​ហ្វឹកហាត់​ឲ្យ​អស់ពី​ចិត្ត ផុតពេល​ហាត់ គាត់​សម្រាក​យក​កម្លាំង​វិញ ដើម្បី​ត្រឡប់មក​ហ្វឹកហាត់ ឬ ប្រកួត​វិញ​។ ខ្ញុំ​គិតថា ប្រសិនបើ​គាត់​នៅតែ​រៀបចំខ្លួន​បានល្អ​បែបនេះ គាត់​អាច​ជាប់​ជម្រើសជាតិ​មិន​ក្រោម ៥​ឆ្នាំ​ទៀត​ទេ​»​។​

​កីឡាករ គួច សុ​កុម្ភៈ ត្រូវបាន​អ្នកចាត់ការ​ថ្មី Keisuke Honda ក្នុង​ក្រុម​ជម្រើសជាតិ​កម្ពុជា កោះហៅ​ឱ្យចូល​រួមជាមួយ​ក្រុម​ហើយ​តែងតាំង​ឱ្យធ្វើជា​ប្រធាន​ក្រុម​ក្នុង​ក្រុម​ជម្រើសជាតិ​កម្ពុជា​ផងដែរ​ពេល​លេង​តទល់​ជាមួយ​ក្រុម​ជម្រើសជាតិ​ម៉ាឡេស៊ី កាលពីពេល​ថ្មីៗ​។ អ្នកចាត់ការ​ទូទៅ​ជនជាតិ​ជប៉ុន​រូបនេះ​ធ្លាប់បាន​លើកឡើង​ជុំ​ការ​តែង​តាំង​ឱ្យ គួច សុ​កុម្ភៈ ធ្វើជា​ប្រធាន​ក្រុម​ជម្រើសជាតិ​កម្ពុជា​ថ្មីៗ​នេះ​ថា​ ៖«​ពួកយើង​មាន​កីឡាករ​ល្អៗ​ច្រើន ក៏ដូចជា​កីឡាករ​មាន​បទពិសោធន៍​ផងដែរ ប៉ុន្តែ គួច សុ​កុម្ភៈ ខ្ញុំ​គិតថា​គាត់​គឺជា​កីឡាករ​ល្អ​ម្នាក់ មាន​បទពិសោធន៍​ល្អ ដែល​ស័ក្តិសម​ធ្វើជា​ប្រធាន​ក្រុម​ជម្រើសជាតិ​កម្ពុជា​»​។​

កីឡាករ គួច សុ​កុម្ភៈ បានចាប់ផ្តើម​លេង​បាល់ទាត់​នៅពេល​រូបគេ​ជា​សិស្សសាលា​បឋមសិក្សា កំពង់ធំ និង​បន្ត​លេង​ឲ្យ​ក្រុម​វិទ្យាល័យ​ប​ល្ល័​ង្គ​។ ឆ្នាំ​២០០២ រូបគេ​បាន​ជួយ​ឲ្យ​វិទ្យាល័យ​ប​ល្ល័​ង្គ ជាប់​ចំណាត់ថ្នាក់​លេខ​១​ក្នុងការ​ប្រកួត​ជ្រើសរើស​បាល់ទាត់​ទូទាំង ប្រទេស​។ ដោយសារ​តែមាន​ទម្រង់​លេង​គួរ​ឲ្យ​ចាប់អារម្មណ៍ និង លេចធ្លោ​អ្នកគ្រប់គ្រង​ក្លិប ខេមរា​កីឡា លោក លាស់ សា​ឡាក់​ខាន់ បាន​យក គួច ស​កុម្ភៈ មក​ធ្វើតេស្ត ហើយក៏​ជាប់​លេង​ក្រុម​ខេមរា​កីឡា​នៅ​ឆ្នាំ ២០០៦​។ ក្រោយមក​រូបគេ​បាន​លេង​ឲ្យ​ក្លិប​ភ្នំពេញ​ក្រោ​ន​ឆ្នាំ​២០១១ មុនពេល​ប្តូរ​មកលេង​ឲ្យ​ក្លិប​ណាហ្គា​វើ​ល​ក្នុង​ឆ្នាំ​២០១៥​រហូតដល់​បច្ចុប្បន្ន​៕ ​