ព័ត៍មានទាន់​ហេតុការណ៏
Search

ពលរដ្ឋ​ត្រូវបាន​ប្រាប់​ឲ្យ​ជម្លៀស​ឥឡូវនេះ​ ខណៈ​ព្យុះ Florence សំដៅទៅ​រដ្ឋ Carolina

រថយន្ត​ជា​ជួរ​បាន​កកស្ទះ​តាមផ្លូវ​ចេញពី​ឆ្នេរសមុទ្រ​នៃ​រដ្ឋ South Carolina និង North Carolina កាលពី​ថ្ងៃ​អង្គារ​ ខណៈពេលដែល​ប្រជាពលរដ្ឋ​បានចាប់ផ្តើម​ភៀសខ្លួន​មុនពេល​ការមកដល់​នៃ​ព្យុះសង្ឃរា Florence ដែលជា​ព្យុះ​ប្រភេទ​៤​ដ៏​មាន​ឥទ្ធិពល​កំពុង​ឆ្ពោះទៅរក​រដ្ឋ​ភាគ​ខាងកើត​អាមេរិក​ទាំងពីរ​នេះ​។​

ខណៈដែល​អ្នករស់នៅ​ឆ្នេរសមុទ្រ​ជាច្រើន​បាន​ធ្វើតាម​ការបញ្ជា​ជម្លៀស​ជា​ចាំបាច់​នោះ អ្នក​មួយចំនួនទៀត​បា​ន​ស្នាក់នៅ​ក្នុងផ្ទះ​និង​ធ្វើ​អាជីវកម្ម​ហើយ​សម្រេចចិត្ត​តទល់​ជាមួយ​ព្យុះ​នេះ​។​

អភិបាលរដ្ឋ North Carolina លោក Roy Cooper បាន​ព្រមាន​ថា ការធ្វើ​បែបនេះ​នឹង​ក្លាយជា​កំហុស​ដ៏​ធ្ងន់ធ្ងរ​មួយ​ហើយ​និយាយថា​ពលរដ្ឋ​នៅក្នុង​តំបន់​ជម្លៀស​ចាំបាច់​ត្រូវ​ចាកចេញ​ឥឡូវនេះ​។​

លោក Cooper បាន​ប្រាប់​អ្នកយកព័ត៌មាន​ថា “​នេះ​មិនមែនជា​ព្យុះ​មួយ​ដែល​មនុស្ស​ចាំបាច់​ត្រូវ​គេចវេះ​ទេ​។ នេះ​គឺជា​ព្យុះ​ជា​ប្រ​វ​តិ្ត​សាស្ត្រ​ដែល​ប្រហែល​ជាមាន​តែម្តង​ប៉ុណ្ណោះ​ក្នុង​មួយជីវិត​”​។​

យោងតាម​មន្ត្រី​គ្រប់គ្រង​គ្រោះអាសន្ន​បាន​ឲ្យ​ដឹងថា មនុស្ស​រហូតដល់​១.៧​លាន​នាក់​នៅ​រដ្ឋ North Carolina, South Carolina និង Virginia ត្រូវ​បានផ្តល់​ការបញ្ជា​ឲ្យ​ជម្លៀស​ដោយ​ស្ម័គ្រចិត្ត​ឬ​ជា​ចាំបាច់​នៅពេលដែល​ព្យុះ​នេះ​ឆ្លងកាត់​មហាសមុទ្រ​អា​ត្ល​ង់​ទិ​ក​ឆ្ពោះទៅកាន់​ឆ្នេរសមុទ្រ​។​

លោក Jeff Byard ដែលជា​អ្នកគ្រប់គ្រង​រង​សម្រាប់​ការឆ្លើយតប​និង​ការស្តារ​ឡើងវិញ​នៅឯ​ទីភ្នាក់ងារ​គ្រប់គ្រង​គ្រោះមហន្តរាយ​សហព័ន្ធ (FEMA) បាន​និយាយថា “​យើង​បាន​ជួបប្រទះ​ការកកស្ទះ​ចរាចរ​យ៉ាងធ្ងន់ធ្ងរ​រួចទៅហើយ​នៅលើ​ផ្លូវ​មួយចំនួន​នៃ​ការជម្លៀស​”​។​

ក្រុម​អ្នក​ព្យាករណ៍​បាន​ទស្សន៍ទាយ​ថា ព្យុះ Florence នឹងធ្វើ​ឲ្យ​មានការ​បាក់​ដី​ក្នុង​រដ្ឋ Carolina ទាំងពីរ​នៅ​យប់​ថ្ងៃ​ព្រហស្បតិ៍​និង​ព្រឹក​ថ្ងៃ​សុក្រ​ក្នុងនាម​វា​នៅតែ​ជា​ព្យុះ​ប្រភេទ​៣​។​

មជ្ឈមណ្ឌល​ព្យុះ​ជាតិ (NHC) ដែលមាន​មូលដ្ឋាន​នៅ​ទីក្រុង​ម៉ៃ​អា​មី​បាន​និយាយថា នៅវេលា​ម៉ោង​៨​យប់ ព្យុះ Florence នឹង​ឡើង​ទៅជា​ព្យុះ​ប្រភេទ​៤​ដែលមាន​ខ្យល់​បក់​ខ្លាំង​ក្នុង​ល្បឿន​១៤០​ម៉ា​យល៍​ក្នុង​មួយ​ម៉ោង​។​

ស្ថានភាព​បន្ទាន់​ត្រូវបាន​ប្រកាស​នៅក្នុង​រដ្ឋ Maryland, North Carolina, South Carolina, Virginia និង​ទីក្រុង​វ៉ាស៊ីនតោន​ចំពេល​មានការ​ព្រួយបារម្ភ​អំពី​ភ្លៀង​ធ្លាក់​ខ្លាំង​និង​ទឹកជំនន់​។​
​ពេល​ចុងក្រោយ​បំផុត​ដែល​រដ្ឋធានី​របស់​អាមេរិក​បានប្រកាស​ភាពអាសន្ន​គឺ​ក្នុង​ខែមករា​ឆ្នាំ​២០១៦​នៅពេលដែល​ព្យុះ​ត្រូ​ពិ​ក “Snowzilla” គ្របដណ្តប់​រដ្ឋធានី​៕ AFP