បង់ក្លាដែស ព្រមានថាខ្លួនគ្មានធនធាន​ជួយ​ជន​ភៀស​ខ្លួនរ៉ូហ៊ីងយ៉ាទៀតទេ

ប្រធានទីប្រឹក្សារដ្ឋាភិបាលបណ្តោះអាសន្នបង់ក្លាដែស លោក Muhammad Yunus បាននិយាយថា បង់ក្លាដែសមិនមានធនធានបន្ថែមទៀតសម្រាប់ជនភៀសខ្លួនរ៉ូហ៊ីងយ៉ា ១.៣ លាននាក់របស់ខ្លួននោះទេ ដោយជំរុញសហគមន៍អន្តរជាតិឱ្យស្វែងរកដំណោះស្រាយប្រកបដោយនិរន្តរភាពចំពោះវិបត្តិនេះ។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី២៥ខែសីហា។

លោក Yunus បាននិយាយថា វិបត្តិនេះបានធ្វើឱ្យប៉ះពាល់យ៉ាងធ្ងន់ធ្ងរដល់សេដ្ឋកិច្ច បរិស្ថាន និងអភិបាលកិច្ចរបស់ប្រទេសបង់ក្លាដែស ដោយទាមទារឲ្រស្វែងរកជំនួយក្នុងស្រុកបន្ថែមទៀត។ នៅថ្ងៃគម្រប់ខួបប្រាំបីឆ្នាំនៃការរត់គេចខ្លួនដ៏ច្រើនរបស់ពួកគេ ជនជាតិរ៉ូហ៊ីងយ៉ារាប់ម៉ឺននាក់នៅ Cox’s Bazar បានប្រមូលផ្តុំគ្នាដោយទាមទារឱ្យត្រឡប់ទៅផ្ទះវិញ ហើយនិយាយថា `ពួកគេយើងមិនចង់រស់នៅជាជនភៀសខ្លួនទៀតទេ។

អង្គការសហប្រជាជាតិបានហៅការធ្វើទុក្ខបុកម្នេញនៅក្នុងប្រទេសមីយ៉ាន់ម៉ាថាការបោសសម្អាតជនជាតិភាគតិច ដោយសារតែពាក់កណ្តាលនៃជនភៀសខ្លួនគឺជាកុមារ។

គួរបញ្ជាក់ថាការប៉ុនប៉ងបញ្ជូនជនភៀសខ្លួនទៅប្រទេសមីយ៉ាន់ម៉ាវិញក្នុងឆ្នាំ ២០១៨ និង២០១៩បានបរាជ័យដោយសារការភ័យខ្លាចនៃការធ្វើទុក្ខបុកម្នេញ ខណៈដែលការប្រយុទ្ធគ្នាថ្មីៗនៅក្នុងរដ្ឋRakhine របស់មីយ៉ាន់ម៉ាបានជំរុញឱ្យមនុស្ស ១៥ ម៉ឺននាក់ផ្សេងទៀតភៀសខ្លួនទៅកាន់ប្រទេសបង់ក្លាដែសកាលពីឆ្នាំមុន។ លោក Yunus បានសង្កត់ធ្ងន់ថាការធ្វើមាតុភូមិនិវត្តន៍នៅតែជាដំណោះស្រាយប្រកបដោយនិរន្តរភាពតែមួយគត់ ហើយបានជំរុញសហគមន៍ពិភពលោកឱ្យធ្វើសកម្មភាព៕

អត្ថបទ៖ ប៊ុន សុភាព