ព័ត៍មានទាន់​ហេតុការណ៏
Search

ក្រសួង​ការងារ​ផ្តល់​អាហារូបករណ៍​ជិត​១៤០០០​កន្លែង​សម្រាប់​សិក្សា​នៅតាម​គ្រឹះស្ថាន​បណ្តុះបណ្តាល​នានា​នៅ​ទូទាំង​ប្រទេស

ភ្នំពេញ ​៖ ​សម្រាប់​ឆ្នាំ​សិក្សា​២០១៨​និង​២០១៩​នេះ​ក្រសួង​ការងារ​និង​បណ្តុះបណ្តាល​វិជ្ជាជីវៈ​នឹង​ផ្តល់​អាហារូបករណ៍​ថ្នាក់​បរិញ្ញាបត្រ​ជាន់ខ្ពស់​/​អនុបណ្ឌិត បរិញ្ញាបត្រ​បច្ចេកវិទ្យា​/​ឯកទេស​សញ្ញាបត្រ​វិស្វករ សញ្ញាបត្រ​ជាន់​ខ្ព ស់​/​បរិញ្ញាបត្ររង​បច្ចេកទេស​/​ឯកទេស សញ្ញាប​ត្រ​បច្ចេកទេស និង​វិជ្ជាជីវៈ​ចំនួន ១៣៧៨៧ កន្លែង​នៅតាម​គ្រឹះស្ថាន​បណ្តុះបណ្តាល​បច្ចេក​ទេស​និង​វិជ្ជាជីវៈ​ចំនួន​៦៤​នៅ​ទូទាំងប្រទេស​លើ​មុខជំនាញ​ដែល​ទីផ្សារការងារ​កំពុងមាន​តម្រូវការ​ខ្ពស់​ក្នុងពេល​បច្ចុប្បន្ន និង​អនាគត​។

យោង​តាម​សេចក្តី​ជួន​ដំណឹង​របស់​ក្រសួង​ការងារ​និង​បណ្តុះបណ្តាល​វិជ្ជាជីវៈ​បាន​ឲ្យ​ដឹង​ថា មុខជំនាញ​ដែល​សិស្សានុសិស្ស​ទទួលបាន​អាហារូបករណ៍​ដោយ​ឥតគិតថ្លៃ​នោះ​រួមមាន​ជំនាញ​ជួសជុលរ​យន្ត អគ្គិសនី សំណង់​ស៊ីវិល អេ​ឡេច​ត្រូ​និ​ច ជួសជុល​ម៉ាស៊ីនត្រជាក់ វិស្វកម្ម​រថយន្ត ជាងកំបោរ​និង​ជំនាញ​ទូទៅ​ដទៃ​ទៀត​។

លោក​បណ្ឌិត អ៊ិត សំហេង រដ្ឋមន្ត្រីក្រសួង​ការងារ​និង​បណ្តុះបណ្តាល​វិជ្ជាជីវៈ​បាន​ណែនាំ​ដល់​សិស្សានុសិស្ស​ទាំងអស់​ពិសេស​ទាំង​សិស្ស​ប្រឡង​ជាប់​ និង ​ធ្លា​ក់បាក់​ឌុប​នៅ​ឆ្នាំនេះ​អាច​ទៅ​ចុះឈ្មោះ​ចូលរួម​ប្រឡង​នៅ​តាម​គ្រឹះស្ថាន​បណ្តុះបណ្តាល​បច្ចេក​ទេស​និង​វិជ្ជាជីវៈ​នៅ​ទូទាំង​ប្រទេស​ដើម្បី​ទទួលបាន​អាហារូបករណ៍​សិក្សា​លើ​ជំនាញ​បច្ចេកទេស ផ្សេងៗ​ដើម្បី​មាន​ជំនាញ​ច្បាស់លាស់​ងាយស្រួល​រកប្រាក់​ចំណូល​ចិញ្ចឹមជីវិត​។

ជា​មួយ​គ្នា​នេះ​ដែរ ​លោករ​ដ្ឋ​មន្ត្រី​បាន​អំពាវនាវ​ឲ្យ​សិស្សានុសិស្ស យុវជន មាតាបិតា អាណាព្យាបាល​និង​សាធារណជន​ធ្វើការ​ទំនាក់ទំនង​ចុះឈ្មោះ​សិក្សា​ដោយ​ផ្ទាល់​តាម គ្រឹះស្ថាន​អប់រំ​បណ្តុះបណ្តាល​បច្ចេកទេស​និង​វិជ្ជាជីវៈ​រាជធានី ខេត្ត​ទៅតាម​ការ​ជ្រើសរើស​គឺ​ចំពោះ​សញ្ញាបត្រ​បច្ចេកទេស​និង​វិជ្ជាជីវៈ​គឺ​តម្រូវ​ឲ្យ​បេក្ខជន​រៀន​ចប់​សញ្ញាបត្រ​មធ្យមសិក្សា​បឋមភូមិ​ថ្នាក់​ទី​៩​។

សញ្ញាបត្រ​ជាប់​ខ្ពស់​រួមមាន​បរិញ្ញាបត្ររង បច្ចេកទេស​/​ឯកទេស​បេក្ខជន​ដែល​បាន​ប្រឡង​ជាប់​ឬ​ធ្លា​ក់​បាក់​ឌុប​ឬ​មាន​សញ្ញាបត្រ​បច្ចេកទេស​និង​វិជ្ជាជីវៈ​ឬ​សញ្ញាបត្រ​ដែល​មាន​ត​ម្លៃ​សមមូល។

​រីឯ​សញ្ញាបត្រ​បច្ចេកវិទ្យា​ឯកទេស​ឬ​សញ្ញាបត្រ​វិស្វករ​និង​បរិញ្ញាបត្រ​បេក្ខជន​ត្រូវមាន​សញ្ញាបត្រ​បាក់​ឌុប​មាន​សញ្ញាបត្រ​បច្ចេកទេស​និង​វិជ្ជាជីវៈ​ឬ​សញ្ញាបត្រ​ដែលមាន​ត​ម្លៃ​សមមូល​និង​បរិញ្ញាបត្រ​ជាន់ខ្ពស់​បច្ចេកវិទ្យា​ឯកទេស​អនុបណ្ឌិត​បេក្ខជន​ត្រូវមាន​សញ្ញាបត្រ​បច្ចេកវិទ្យា​ឯកទេស​ឬ​សញ្ញាបត្រ​វិស្វករ​និង​បរិញ្ញាបត្រ​។

លោក ឌី​ខាំ បូ​លី អ្នកនាំពាក្យ​ក្រសួង​អប់រំ​យុវជន​និង​កីឡា​បាន​ណែនាំ​ឲ្យ​សិស្ស​ដែល​ប្រឡង​ធ្លាក់​បាក់​ឌុប​នៅ​ឆ្នាំ​២០១៨​នេះ​កុំ​បាក់​ទឹកចិត្ត​ឬ​អស់សង្ឃឹម​ត្រូវ​បន្ត​ខិតខំ​ប្រឹងប្រែង​រៀនសូត្រ​បន្ថែមទៀត​ដើម្បី​ចូលរួម​ប្រ​ឡង​នៅ​ឆ្នាំក្រោយ​បន្តទៀត​។

ជាមួយគ្នានេះដែរ​ លោក​បាន​បន្ត​ថា ​ចំពោះ​សិស្ស​ណា​ដែល​មានបំណង​ចង់​សិក្សា​នូវ​មុខជំនាញ​ប​ច្ចេក​ទេស​វិជ្ជាជីវៈ​ក៏​អាច​សិក្សា​ទៅតាម​ឧបនិស្ស័យ​របស់ខ្លួន​ផង​ដែរ​នៅ​តាម​សាលា​បណ្តុះបណ្តាល​នានា​នៅ​ទូទាំងប្រទេស​។

លោក​បាន​បន្ថែម​ថា ​«​កុំ​គិតថា ​ការ​រៀន​មុខជំនាញ​វិជ្ជាជីវៈ​បច្ចេកទេស​មិនល្អ​ដូច​រៀន​តាម​មហាវិទ្យាល័យ​ទូទៅ​ព្រោះថា​បច្ចុប្បន្ន​នេះ​សង្គម​ត្រូវការ​អ្នកជំនាញ​បច្ចេកទេស​ច្រើនតែ​យ៉ាងណាក៏ដោយ​ប្អូនៗ​ត្រូវ​សិក្សា​ជំនាញ​ឲ្យ​ចេះ​ពិតប្រាកដ​និង​ច្បាស់លាស់​ដើម្បី​ជា​មូលដ្ឋានគ្រឹះ​សម្រាប់​អនាគត​ខ្លួនឯង​ផង​និង​ចូលរួម​កសាង​អភិវឌ្ឍន៍​សង្គមជាតិ​ផង​»៕