ព័ត៍មានទាន់​ហេតុការណ៏
Search

សម្តេច​តេ​ជោ ហ៊ុន សែន ស្នើ​ឲ្យ​អ្នក​ក្រៅ​តំបន់​នៅ​ឲ្យ​ឆ្ងាយ​ពី​បញ្ហា​ផ្ទៃក្នុង​របស់​ប្រទេស​តាម​ដង​ទន្លេមេគង្គ

ភ្នំពេញ ៖ សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​កម្ពុជា​បានស្នើ​ឲ្យ​អ្នក​ក្រៅ​តំបន់​នៅ​ឲ្យ ឆ្ងាយ​ពី​បញ្ហា​នយោបាយ​ឬ​ពី​កិច្ចការ​ផ្ទៃក្នុង​នៃ​បណ្តា​ប្រទេស​នៅក្នុង​តំបន់​ទន្លេមេគង្គ​ដែល​រួមមាន​កម្ពុជា ថៃ ឡាវ វៀតណាម និង​មី​យ៉ាន់​ម៉ា​។ ការ​លើកឡើង​របស់​ស​ម្តេច​តេជោ​នាយករដ្ឋមន្ត្រី​នៅក្នុង​កិច្ចប្រជុំ​កំពូល​ពេញអង្គ​ស្តីពី​ចក្ខុវិស័យ​ថ្មី​សម្រាប់​តំបន់​មេគង្គ​ដែល​បាន​រៀប​ចំ​ធ្វើឡើង​នៅ​ទីក្រុង​ហាណូយ​ប្រទេស​វៀតណាម កាលពី​ថ្ងៃទី ១៣ កញ្ញា​។

​គឺ​ឆ្លើយតប​ទៅ​នឹង​សំណួរ​របស់​អ្នកសម្របសម្រួល​នៅក្នុង​កិច្ចប្រជុំ​កំពូល​ពេញអង្គ​ស្តីពី​ចក្ខុវិស័យ​ថ្មី​សម្រាប់​តំបន់​មេគង្គ​នៅ​ថ្ងៃទី​១៣ កញ្ញា ប្រមុខ​រដ្ឋាភិបាល​កម្ពុ​ជាស​ម្តេច​តេ​ជោ ហ៊ុន សែន បាន​ស្នើ​សុំ​ឲ្យ​ប្រទេស​នៅក្រៅ​តំបន់ ពិសេស​ប្រទេស​នៅ​តំបន់​អឺរ៉ុប​កុំ​លូកដៃ​ចូល​ទៅ​ក្នុង​កិច្ចការ​ផ្ទៃ​ក្នុង​នៃ​បណ្តា​ប្រទេស​នៅក្នុង​ក្របខ័ណ្ឌ​ទន្លេមេគង្គ​ដោយ​ទុក​លទ្ធភាព​ឲ្យ​ប្រទេស​ទាំង​នោះបាន​សេចក្តី​សុខ​ខាង​នយោបាយ​ខ្លះ​ដើម្បី​ជំរុញ​ទៅដល់​ការកសាង​ប្រទេស​។ សម្តេច​តេ​ជោ​នាយករដ្ឋមន្ត្រី​បាន​លើកឡើងថា​ប្រទេស​នៅក្រៅ​តំបន់​ពិតជា​មិន​យល់​ពី​ស្ថានភាព​ផ្ទៃក្នុង​របស់​ប្រទេស​នៅក្នុង​តំបន់​នោះទេ​។

​សម្តេច​តេ​ជោ​នាយករដ្ឋមន្ត្រី​បាន​មានប្រសាសន៍ថា «​យើង​គួរតែ​ខិតខំ​ដក​ឧបសគ្គ​នយោបាយ​ខ្លះ​ចេញពី​បណ្ដា​ប្រទេស​នៅក្នុង​ក្របខណ្ឌ​ទន្លេមេគង្គ​បើ​មិន​ដូច្នោះ​ទេ​អ្នក​ទាំង​ប្រាំ​នាក់​ដែល​អង្គុយ​នៅទីនេះ​មិន​គ្រប់​លក្ខណៈ​សម្បត្តិ​តាម​ពួក​អឺរ៉ុប​នោះ​ទេ​។ វៀតណាម​មាន​បក្ស​តែមួយ​មិនមែន​ជា​ប្រទេស​សេរី​ពហុបក្ស​ដែល​ពួក​អឺរ៉ុប​ចង់បាន​នោះ​ទេ​។ ឡាវ​ក៏​មាន​បក្ស​តែមួយ​។ ឯ​កម្ពុជា​បោះឆ្នោត​ទើបតែនឹង​ចប់​ខ្ញុំ​ទើបតែ​ធ្វើ​នាយករដ្ឋមន្ត្រី​បា​៧​ថ្ងៃ សម្រាប់​រាជរដ្ឋាភិបាល​ថ្មី​ដែល​ខ្ញុំ​បាន​ធ្វើ​នាយក​មន្ត្រី​អស់ ៣៣ ឆ្នាំ​រួច​មក​ហើយ​។ ឯ​មី​យ៉ាន់​ម៉ា​ក៏​កាន់តែ​ធ្ងន់ធ្ងរ​ទៅទៀត​ត្រូវ​គេ​ចោទថា ​ជា​អ្នក​ប្រល័យពូជសាសន៍​ ប៉ុន្តែ​អ្នក​បាន​យល់​ពី​ប្រទេស​មី​យ៉ាន់​ម៉ា អ្នក​ស្គាល់ពី​ប្រទេស​មី​យ៉ាន់​ម៉ា​ទេ​ដែល​ត្រូវ​ដោះស្រាយ​បញ្ហា​ប្រឈម​ជាច្រើន​ទាក់ទង​នឹង​បញ្ហា​សន្តិសុខ​ជាតិ​និង​ជម្លោះ​រវាង​ក្រុម​មួយ​និង​ក្រុម​មួយទៀត​ជាដើម​ ដែល​ត្រូវ​មាន​ការយោគយល់​ចំពោះ​ប្រទេស​មី​យ៉ាន់​ម៉ា​។ ក៏ប៉ុន្តែ​ប្រទេសក្រៅ​តំបន់​របស់​យើង​គេ​តែងតែ​ទះ​ក្បាល​របស់​យើង​ហើយ​ប្រាប់​យើង​ឲ្យ​ធ្វើ​អ្វី ដែល​ពួកគេ​ចង់បាន​។

ចំណែក​ប្រទេស​ថៃ​កាន់តែ​ធ្ងន់ធ្ងរ​ទៅទៀត​ត្បិត​បាន​ប្រកាស​ការបោះឆ្នោត​នៅ​ខែ​កុម្ភៈ​ខាង​មុខតែ​ទោះ​បី​យ៉ាងណា​ក៏ដោយ​វា​ជា​សិទ្ធិ​ជ្រើសរើស​របស់​ប្រទេស​នីមួយៗ​។ ទុក​លទ្ធភាព​ឲ្យ​ប្រទេស​ទាំងនេះ​បាន​សេចក្តី​សុខ​ខាង​នយោបាយ​ខ្លះ​ទេ​ដើម្បី​ជំរុញ​ទៅដល់​ការ​កសាង​ប្រទេស​។ ខ្ញុំ​លើក​បញ្ហា​នេះ​មិនមែន​ដើម្បី​ជូន​សារ​ទៅ​ប្រទេស​ណា​ទាំងអស់​។ ក៏ប៉ុន្តែ​ខ្ញុំ​គិតថា​ ពួក​មេដឹកនាំ​ប្រទេស​ទាំង៥​នាក់​នេះ​ សុទ្ធតែ​ជា​អ្នករងគ្រោះ​ខាង​នយោបាយ​ទាំងអស់។ ខ្ញុំ​ស្នើ​ថា​ ពួក​អ្នក​ក្រៅ​តំបន់​ដែល​មិនដឹង​រឿង​របស់​យើង​សូម​ទុក​ឲ្យ​យើង​ដោះស្រាយ​បញ្ហា​របស់​យើង​បានទេ​»​។

បន្ទាប់ពី​ការ​ថ្លែង​ចប់​របស់​សម្តេច​តេ​ជោ ហ៊ុន សែន គេ​ឮសូរ​សម្លេង​ទះដៃ​ប្រ៉ា​វ​ពី​អ្នកចូលរួម​នៅក្នុង​វេទិកា​នេះ ដែល​បាន​បង្ហាញថា​ ប្រសាសន៍​របស់​សម្តេច​តេ​ជោ ហ៊ុន សែន ត្រឹមត្រូវ ហើយ​ពួកគេ​ពិតជា​គាំទ្រ​ឲ្យ​មាន​បែបនេះ​។

ការ​ថ្លែង​របស់​សម្តេចនាយករ​ដ្ឋ​មន្ត្រី ហ៊ុន សែន ធ្វើឡើង​កាលពី​ថ្ងៃទី ១៣ កញ្ញា នៅក្នុង​កិច្ចប្រជុំ​កំពូល​ពេញអង្គ​ស្តី​ពី​ចក្ខុវិស័យ​ថ្មី​សម្រាប់​តំបន់​មេគង្គ ដោយមាន​ការចូលរួម​ពី​មេដឹកនាំ​វៀតណាម កម្ពុជា ឡាវ ម៉ី​យ៉ាន់​ម៉ា និង​តំណាង​ពី​ប្រទេស​ថៃ​៕