អាជ្ញាធរខណ្ឌ៧មករា ចុះពិនិត្យ និងសម្អាត​បរិវេណ​វិទ្យាល័យបាក់ទូក ត្រៀមទទួលសិស្សប្រឡងបាក់ឌុប

នៅរសៀលថ្ងៃទី២៦ ខែសីហា ឆ្នាំ២០២៥ លោក ថេង សុថុល អភិបាលនៃគណៈអភិបាលខណ្ឌ៧មករា បានដឹកនាំមន្ត្រីពាក់ព័ន្ធ និងក្រុមហ៊ុន មីហ្សូដា បានចុះពិនិត្យ និងសម្អាតអនាម័យក្នុងបរិវេណ វិទ្យាល័យបាក់ទូក ដើម្បីត្រៀមទទួលសិស្សានុសិស្ស ប្រឡងបាក់ឌុបនៅថ្ងៃទី២៨ និង២៩ ខែសីហា ខាងមុខនេះ។

លោកអភិបាលបានលើកឡើងថា ការចុះរៀបចំសម្អាតអនាម័យក្នុងបរិវេណសាលា និងសម្ភារៈបរិក្ខារក្នុងសាលាគឺមានសារៈសំខាន់ណាស់ ដើម្បីផ្តល់នូវភាពងាយស្រួល និងផាសុកភាពដល់សិស្ស ជាពិសេស បន្ទប់ប្រឡងត្រូវមានភ្លើងអគ្គិសនី និងកង្ហារគ្រប់គ្រាន់។

លោកអភិបាលក៏បានអរគុណចំពោះគណៈគ្រប់គ្រងវិទ្យាល័យបាក់ទូក ដែលបានរៀបចំហេដ្ឋារចនាសម្ព័ន្ធក្នុងសាលាឲ្យមានភាពល្អប្រសើរ ដោយបន្ទប់ថ្នាក់រៀននីមួយៗមានការបំពាក់ភ្លើងអគ្គិសនី និងកង្ហារគ្រប់គ្រាន់ បន្ទប់ទឹកមានអនាម័យល្អ ស្របតាមតម្រូវការ។

ក្នុងនាមរដ្ឋបាលខណ្ឌ លោក ថេង សុថុល បានផ្តល់ការលើកទឹកចិត្ត និងជូនពរដល់សិស្សានុសិស្សទាំងអស់ ដែលត្រូវចូលរួមប្រឡងបាក់ឌុបឆ្នាំនេះឲ្យទទួលបានជោគជ័យ និងលទ្ធផលល្អគ្រប់ៗគ្នា៕

អត្ថបទ៖ សំណាង