ព័ត៌មានអន្ដរជាតិ

ក្រោយថាក់ស៊ីន រួចទោសប្រមាថស្តេច, ពេលនេះ ផែថងថាន ក៏ជឿថា ខ្លួនអាចវិលមកកាន់តំណែងនាយករដ្ឋមន្ត្រី វិញដែរ

បានផុស

១១ ខែ មុន

នៅ

ថ្ងៃពុធ ២៧ សីហា ២០២៥

ដោយ

តាមសេចក្តីរាយការណ៍របស់ Bangkok Post, លោកស្រី ផែថងថាន ស៊ីណាវ៉ាត្រ បានបង្ហាញជំនឿចិត្តយ៉ាងមុតមាំថា ខ្លួងនឹងឈ្នះសាលក្រមតុលាការ ហើយវិលត្រឡប់មកកាន់អំណាចជានាយករដ្ឋមន្ត្រីវិញ នៅចុងសប្តាហ៍នេះ។

លោកស្រី ផែថងថាន ស៊ីណាវ៉ាត្រ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃទី២៩ខែសីហាឆ្នាំ២០២៥ តុលាការធម្មនុញ្ញថៃ នឹងប្រកាសសាលក្រមលើសំណុំរឿងរបស់លោកស្រី ពាក់ព័ន្ធការបែកធ្លាយសារសំឡេងតាមទូរស័ព្ទជាមួយសម្ដេចតេជោ ហ៊ុន សែន ប្រធានព្រឹទ្ធសភាកម្ពុជា ដែលបង្កឲ្យមានភាពចលាចលផ្នែកនយោបាយពេញប្រទេសថៃ។

យ៉ាងណា តាមរយៈវីដេអូក្នុងកិច្ចប្រជុំគណៈរដ្ឋមន្ត្រីប្រចាំសប្តាហ៍កាលពីថ្ងៃអង្គារ, ផែថងថាន ជឿជាក់ថា លោកស្រីនឹងត្រឡប់មកធ្វើការក្នុងនាមជាយករដ្ឋមន្ត្រីវិញ ក្រោយការសម្រេចរបស់តុលាការ។

សូមជម្រាបថា ផែថងថាន ត្រូវបានព្យួរពីតួនាទីនៅថ្ងៃទី១ខែកក្កដាឆ្នាំ២០២៥ ដោយរង់ចាំការស៊ើបអង្កេតរបស់តុលាការធម្មនុញ្ញ ហើយក្រោយមកលោកស្រី បាត់វត្តមាននៅវិមានរដ្ឋាភិបាលអស់រយៈពេល៣សប្តាហ៍ជាប់ៗគ្នា។

ដ្បិតត្រូវបានព្យួរតួនាទី ប៉ុន្តែលោកស្រី ផែថងថាន នៅតែស្ថិតក្នុងតំណែងគណៈរដ្ឋមន្ត្រីក្នុងនាមជារដ្ឋមន្ត្រីក្រសួងវប្បធម៌ដដែល ខណៈបច្ចុប្បន្នឧបនាយករដ្ឋមន្ត្រី ភូមិថាម វិឆាយ៉ាឆៃ កំពុងកាន់តំណែងជានាយករដ្ឋមន្ត្រីស្តីទី។

ការបង្ហាញទំនុកចិត្តយ៉ាងមុតមាំរបស់ ថែថងថាន ក្នុងការវិលមកកាន់អំណាចវិញនេះ គឺបន្ទាប់ពីលោកស្រីមើលឃើញសញ្ញាល្អ ដែលឪពុករបស់ខ្លួនគឺលោកថាក់ស៊ីន ត្រូវតុលាការសម្រេចឲ្យរួចទោសពីបទប្រមាថព្រះមហាក្សត្រ កាលពីសប្តាហ៍មុន។

ហេតុផលដែលតុលាការមិនចោទប្រកាន់លោកថាក់ស៊ីន ព្រោះថា តុលាការមិនបានរកឃើញថា បទសម្ភាសន៍ដែលអតីតនាយករដ្ឋមន្ត្រីថៃរូបនេះផ្តល់ឲ្យប្រព័ន្ធផ្សព្វផ្សាយកូរ៉េខាងត្បូង កាលពីឆ្នាំ២០១៥ គឺជាការសំដៅទៅព្រះមហាក្សត្រ Bhumibol Adulyadej (រាមាទី៩) ដោយចំៗឬប្រើប្រាស់ពាក្យរាជានិយមណាមួយនោះទេ ប៉ុន្តែផ្ទុយទៅវិញ បទសម្ភាសនោះគឺសំដៅទៅលើបុរសទីបីដូចជាគាត់, ទីប្រឹក្សា, ទាហាន និងមនុស្សនៅក្នុងរង្វង់ព្រះបរមរាជវាំងជាដើម៕

អត្ថបទ៖ សុខ សុវណ្ណ

ចុចអាន៖ លោកស្រី ផែថងថាន បាត់មុខពីវិមានរដ្ឋាភិបាលរយៈពេល៣សប្ដាហ៍ជាប់ៗគ្នា