បាក់ដីភ្នំនៅ ឈៀងម៉ៃ សង្កត់ផ្ទះច្រើនខ្នង ស្លាប់និងរបួសមនុស្សជាង ១០នាក់

ឥទ្ធិពលព្យុះសង្ឃរា Kajiki បានបង្កឲ្យមានភ្លៀងធ្លាក់ខ្លាំងរហូតដល់បាក់ដីភ្នំសង្កត់ផ្ទះពលរដ្ឋ៥ខ្នង ក្នុងខេត្ត ឈៀងម៉ៃ ប្រទេសថៃ បណ្តាលឲ្យមនុស្សស្លាប់និងរបួសជាង១០នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Khaosod, បាតុភូតធម្មជាតិដ៏រន្ធត់នេះ កើតឡើងនាវេលាម៉ោង២:៥០នាទីរំលងអធ្រាត្រឈានចូលថ្ងៃពុធទី២៧ខែសីហាឆ្នាំ២០២៥ ក្នុងភូមិ Pang Ung ឃុំ Mae Suek ស្រុក Mae Chaem។

មនុស្សម្នាក់បានស្លាប់និងម្នាក់ទៀតបាត់ខ្លួន ខណៈ១០នាក់របួសត្រូវបញ្ជូនទៅព្យាបាលនៅមន្ទីរពេទ្យក្នុងតំបន់ភ្លាមៗ ខណៈក្រុមជួយសង្គ្រោះបានទៅដល់កន្លែងកើតហេតុ ដើម្បីផ្តល់ជំនួយ។

សូមជម្រាបថា ព្យុះ Kajiki បានវាយប្រហារខេត្តចំនួន៥៨ នៅភាគខាងជើង ឦសាន កណ្តាល និងខាងត្បូងប្រទេសថៃ បណ្តាលឲ្យមានភ្លៀងធ្លាក់ខ្លាំង បង្កជាទឹកជំនន់ បំណាក់ដី និងបាតុភូតរន្ទះបាញ់។ 

លើសពីនេះ ឥទ្ធិពលរបស់វា បានបង្កជាគ្រោះទឹកជំនន់ ជន់លិចឧទ្យានជាតិ Namtok Phliu នៅក្នុងខេត្ត Chanthaburi ដែលជាខេត្តព្រំដែនជាប់ខេត្តប៉ៃលិននិងបាត់ដំបង របស់កម្ពុជា ទៀតផង ហើយតំបន់ខ្លះ ក៏ត្រូវបិទសាលាជាបន្ទាន់ដែរ ព្រោះតែស្ថានភាពអាសន្ន។

នៅខេត្ត Loei, ព្យុះ Takiji បានបង្កជាទឹកជំនន់ ជន់លិចធ្ងន់ធ្ងរ ខណៈទឹកទន្លេ Man និង Hueang ហក់ឡើងខ្ពស់ ធ្វើឲ្យពលរដ្ឋរស់នៅសហគមន៍តាមដងទន្លេត្រូវជម្លៀសទៅកាន់ទីទួលសុវត្ថិភាព។

តំបន់ដែលរងគ្រោះខ្លាំងបំផុតគឺស្រុក Na Haeo និង Dan Sai ដោយនៅទីនោះតំបន់ខ្លះត្រូវទឹកជន់លិច ជម្រៅត្រឹមចង្កេះ កាត់ផ្តាច់ផ្លូវ រំខានដល់ការធ្វើដំណើរនិងដឹកជញ្ជូន។

រីឯនៅខេត្ត Mae Hong Son, ភ្លៀងធ្លាក់យ៉ាងគំហុក ក៏បង្កជាជំនន់ផងដែរក្នុងតំបន់មួយចំនួនដោយជន់លិចដីស្រែចម្ការ ថែមទាំងកាត់ផ្តាច់ផ្លូវធ្វើដំណើរទៀតផង។

ស្រុក Mae Sariang ជាកន្លែងរងគ្រោះជាងគេ ព្រោះទឹកជំនន់ក៏លិចផ្ទះសម្បែងពលរដ្ឋផងដែរ ខណៈអាជ្ញាធរចេញការព្រមានឲ្យប្រុងប្រយ័ត្នចំពោះគ្រោះបំណាក់ដី និងលំហូរភក់ចុះពីភ្នំ៕

អត្ថបទ៖ សុខ សុវណ្ណ

ចុចអាន៖ អ្នកជិតខាងកម្ពុជាទាំង៣ សុទ្ធតែរងគ្រោះធ្ងន់ធ្ងរនិងលិចលង់ ដោយសារឥទ្ធិពលព្យុះ Takiji