ផ្ទុះគ្រាប់បែកបណ្តាក់គ្នា បង្កចលាចល៥ស្រុក នៅភាគខាងត្បូងប្រទេសថៃ

ក្រុមផ្តាច់ខ្លួនបានបើកការវាយប្រហារផ្ទួនៗ ដោយបំផ្ទុះគ្រាប់បែកបណ្តាក់គ្នាធ្វើឲ្យចលាចលក្នុងស្រុកចំនួន៥ក្នុងខេត្ត Narathiwat ភាគខាងត្បូងប្រទេសថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Amarin TV, ក្រុមបះបោរបានបើកការវាយប្រហារតាំងពីរាត្រីថ្ងៃអាទិត្យទី៣១ខែសីហា ដល់រំលងអធ្រាត្រថ្ងៃចន្ទទី១ខែកញ្ញា។

គ្រាប់បែកដំបូងបានផ្ទុះលើផ្លូវហាយវ៉េលេខ៤០៥៦ ក្នុងស្រុក Su-ngai Padi នាវេលាម៉ោង៧:៥០នាទីយប់ថ្ងៃអាទិត្យ បណ្តាលឲ្យរបួសមនុស្ស២នាក់ និងខ្ទេចរថយន្តមួយគ្រឿង។ 

ក្រោយមកនៅម៉ោង១១:៥៥នាទីយប់ ក្នុងស្រុក Cha-nai ការផ្ទុះ២លើកទៀត បានអង្រួនវិហារឥស្លាម Dusongno និងផ្សារមួយកន្លែង។

នៅស្រុក Ba Cho គ្រាប់បែកបានផ្ទុះលើផ្លូវ Phetkasem ខាងមុខធនាគារ​កសិកម្មនិង​សហករណ៍​កសិកម្ម (BAAC) ប៉ុន្តែគ្មាននរណាម្នាក់រងរបួសនោះទេ។ 

នៅស្រុក Cho Airong នាវេលាម៉ោងប្រមាណ ១២:០៥រំលងអាធ្រាត្រ គ្រាប់បែកមួយគ្រាប់ទៀត បានផ្ទុះនៅមុខទូ ATM របស់ធនាគារដដែលនេះ។

នៅស្រុក Sri Sakhon វេលាម៉ោង១២និង៣០នាទី មានករណីផ្ទុះមួយទៀតកើតឡើងនៅទូ ATM ទល់មុខរដ្ឋបាលឃុំ Tambon Tamayung។

ការវាយប្រហារនោះបានគូសបញ្ជាក់ពីស្ថានភាពកាន់តែចលាចលនៅភាគខាងត្បូងប្រទេសថៃ ស្របពេលអំពើហិង្សាពីសំណាក់ក្រុមបេះបោរកាន់តែធ្ងន់ធ្ងរទៅៗហើយ។ 

យោងតាមតួលេខចុងក្រោយពីក្រុមស្រាវជ្រាវ Deep South Watch, គិតចាប់តាំងពីឆ្នាំ២០០៤មក មនុស្សស្លាប់នៅក្នុងអំពើហិង្សានោះ មានជាង ៧ ៥០០នាក់ ខណៈជាង ១៣ ៥០០នាក់ រងរបួស។ ក្នុងចំណោមមនុស្សស្លាប់ក៏រួមមានមន្ត្រីយោធានិងប៉ូលិស ផងដែរ៕

អត្ថបទ៖ សុខ សុវណ្ណ

ចុចអាន៖ ផ្ទុះគ្រាប់បែក ដាច់ជើងមនុស្សម្នាក់ ក្នុងការវាយប្រហារនៅខេត្តភាគខាងត្បូង ថៃ