ម៉ាឌូរ៉ូ ប្រកាស​ត្រៀម​ខ្លួន​ប្រយុទ្ធ ខណៈកងទ័ពអាមេរិក​តម្រង់​មីស៊ីល ១ ២០០គ្រាប់​​លើវ៉េណេស៊ុយអេឡា

ប្រធានាធិបតីវ៉េណេស៊ុយអេឡា នីកូឡាស ម៉ាឌូរ៉ូ បានព្រមានកាលពីថ្ងៃចន្ទ​ទី​១​ខែកញ្ញា​ថា លោក​​​បាន​ត្រៀម​ខ្លួន​​ប្រយុទ្ធ​​រួច​រាល់​ហើយ ប្រសិន​បើ​កងកម្លាំងដែល​សហរដ្ឋអាមេរិកដាក់ពង្រាយនៅតំបន់ការ៉ាប៊ីន បើកការវាយប្រហារលើប្រទេសរបស់លោក។

ថ្លែងនៅក្នុងសន្និសីទសារព័ត៌មាន លោក ម៉ាឌូរ៉ូ បានអះអាងថា នាវាយោធាអាមេរិកចំនួន​៨​គ្រឿងដែលបំពាក់ដោយមីស៊ីល​ចំនួន​១ ២០០​គ្រាប់​ ឥឡូវនេះកំពុងតម្រង់គោលដៅលើប្រទេសវ៉េណេស៊ុយអេឡា។ លោក​បាន​​ហៅការដាក់ពង្រាយនេះថា «ជាការគំរាមកំហែងដ៏ធំបំផុតដែលត្រូវបានគេមើលឃើញនៅលើទ្វីបរបស់យើងក្នុងរយៈពេល ១០០​ឆ្នាំចុងក្រោយនេះ»។

ថ្មីៗនេះ សហរដ្ឋអាមេរិកបានពង្រីកដែនសមុទ្ររបស់ខ្លួននៅក្នុងតំបន់ការីប៊ីន ដើម្បីប្រឆាំងបណ្តាញជួញដូរគ្រឿងញៀន ដោយមិនទាន់​មានសញ្ញា​បង្ហាញពីការ​ត្រៀម​លុកលុយដែន​​ដី​ណាមួយ​នោះទេ។ យ៉ាងណាក៏ដោយ រដ្ឋាភិបាលវ៉េណេស៊ុយអេឡាបានឆ្លើយតបដោយការចល័តទ័ពនៅតាមឆ្នេរសមុទ្ររបស់​ខ្លួន និងព្រំដែនកូឡុំប៊ី ខណៈពេលដែលលើកទឹកចិត្តជនស៊ីវិល​ឲ្យ​ចុះឈ្មោះក្នុងកងជីវពល។

លោក ម៉ាឌូរ៉ូ បាននិយាយថា «ប្រឈមមុខនឹងសម្ពាធយោធាអតិបរមានេះ យើងបានប្រកាសពីការត្រៀមខ្លួនជាអតិបរមាសម្រាប់ការការពារប្រទេសវ៉េណេស៊ុយអេឡា»។ លោក​បាន​ពណ៌នា​ការ​ដាក់​ពង្រាយ​របស់​សហរដ្ឋ​អាមេរិក​ថា​​«​ហួសហេតុ មិន​សម​ហេតុផល អសីលធម៌ និង​ជា​ឧក្រិដ្ឋកម្ម​ពិត​ប្រាកដ»។

យោងតាមមន្ត្រីការពារជាតិសហរដ្ឋអាមេរិក ការដាក់ពង្រាយរួមមាននាវាពិឃាត Aegis USS Gravely USS Jason Dunham និង USS Sampson រួមជាមួយនឹងនាវា USS Lake Erie។ វត្តមាននេះ​នឹងកើនឡើងជាមួយនឹងនាវា​វាយលុកចំនួន​៣​គ្រឿង​បន្ថែម​ទៀត​ ដែលរំពឹងថានឹងបរ​ចូលក្នុងតំបន់​នា​សប្តាហ៍នេះ ដោយដឹកនាវិក និងកងម៉ារីនជាង ៤ ០០០​នាក់។

រដ្ឋាភិបាល​ទីក្រុងវ៉ាស៊ីនតោន បានចោទប្រកាន់លោក ម៉ាឌូរ៉ូ ពីបទគ្រប់គ្រងក្រុមជួញដូរគ្រឿងញៀន ហើយថ្មីៗនេះបានបង្កើន​ប្រាក់​រង្វាន់ទ្វេដងសម្រាប់ការចាប់ខ្លួន​គាត់ដល់ ៥០​លានដុល្លារ។ លោក​ប្រធានាធិបតី ដូណាល់ ត្រាំ ដែលបានត្រឡប់ចូលកាន់តំណែងក្នុងខែមករា បានបញ្ជា​ឲ្យ​មន្ទីរបញ្ចកោណ ចាត់ទុកក្រុមឧក្រិដ្ឋជនអាមេរិកឡាទីនមួយចំនួន ជាអង្គការភេរវករ។ រដ្ឋបាល​របស់​លោក ត្រាំ ​អះអាង​ថា ក្រុមឧក្រិដ្ឋជនទាំង​នោះ​កំពុង​​បង្កើន​​ការ​ប្រើ​ប្រាស់​គ្រឿង​ញៀន​នៅ​លើ​ទឹ​ក​ដី​​​​អាមេរិក និង​អំពើ​ហិង្សា​ក្នុង​ទីក្រុង​តាម​រយៈ​ការ​ជួញ​ដូរ​ថ្នាំ fentanyl និង​កូកាអ៊ីន។

រដ្ឋមន្ត្រីការបរទេសវ៉េណេស៊ុយអេឡា លោក Yván Gil បានច្រានចោលយុត្តិកម្មរបស់សហរដ្ឋអាមេរិក ដោយលើកឡើងពីរបាយការណ៍របស់អង្គការសហប្រជាជាតិ ដែលបាន​លើកឡើង​ថា កូកាអ៊ីនភាគច្រើនពីកូឡុំប៊ី ឆ្លងកាត់មហាសមុទ្រប៉ាស៊ីហ្វិក មិនមែនវ៉េណេស៊ុយអេឡានោះទេ។ លោក​បាន​ព្រមាន​ថា សកម្មភាព​យោធា​របស់​សហរដ្ឋ​អាមេរិក​នឹង «​ធ្វើ​ឲ្យ​​តំបន់​ទាំងមូល​មាន​អស្ថិរភាព»។

យ៉ាង​ណា​មិញ មេបក្សប្រឆាំងរបស់ប្រទេសវ៉េ​ណេស៊ុយអេឡា លោកស្រី María Corina Machado បានស្វាគមន៍វត្តមានរបស់សហរដ្ឋអាមេរិក ដោយហៅវាថាជា «វិធីសាស្រ្តត្រឹមត្រូវ» ប្រឆាំងនឹងអ្វីដែលលោកស្រី​ពិពណ៌នាថាជា «សហគ្រាសឧក្រិដ្ឋកម្ម» របស់​លោក ម៉ាឌូរ៉ូ៕

ដោយ៖ ឈាង