Boonsin Padklang៖ យោធាមិនធ្វើរដ្ឋប្រហារឡើយ ព្រោះកងទ័ពជាទាហានអាជីព មិនលូកលាន់នយោបាយ

ក្រោយមានពាក្យចចាមអារ៉ាមអំពីការធ្វើរដ្ឋប្រហារក្នុងប្រទេសថៃស្របពេលនយោបាយកំពុងច្របូកច្របល់ មេភូមិភាគ២ Boonsin Padklang បានបញ្ជាក់យ៉ាងច្បាស់ថា យោធានឹងមិនធ្វើរដ្ឋប្រហារឡើយ។ នេះបើតាមការផ្សាយរបស់ Khaosod នៅថ្ងៃអង្គារទី២ខែកញ្ញាឆ្នាំ២០២៥។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅឯសាកលវិទ្យាល័យ Thammasat, លោក Boonsin និយាយថា កងទ័ពនឹងមិនធ្វើរដ្ឋប្រហារទេ ដោយទុកឲ្យយន្តការនយោបាយជាអ្នកគ្រប់គ្រងចុះ ហើយលោកសុំមិនជ្រៀតជ្រែកក្នុងនិន្នាការនយោបាយ ឡើយ កងទ័ពនៅតែរក្សាជំហរជាទាហានអាជីព។

ទន្ទឹមនោះ មេភូមិភាគ២រូបនេះ ជំរុញឲ្យនាយករដ្ឋមន្ត្រីថ្មី មកជួយដោះស្រាយបញ្ហាមួយចំនួនជាមុនសិនក្នុងរយៈពេល៣-៤ខែនេះ។

សូមជម្រាបថា មានពាក្យចចាមអារ៉ាមនិងការរំពឹងទុកជាច្រើនអំពីលទ្ធភាពនៃការធ្វើរដ្ឋប្រហារយោធាឡើនៅក្នុងប្រទេសថៃ បន្ទាប់ពីមានព្រឹត្តិការណ៍នយោបាយថ្មីៗដែលទាក់ទងនឹងលោកស្រី ផែថងថាន ស៊ីណាវ៉ាត្រ និងគណបក្ស ភឿថៃ។

ប្រទេសថៃមានប្រវត្តិយូរលង់ក្នុងការធ្វើរដ្ឋប្រហារយោធា ដែលកើតឡើងរាប់សិបដងរួចមកហើយ។ ដោយសារតែបទពិសោធន៍នេះ ប្រជាជនតែងគិតថា កងទ័ពអាចនឹងចេញមុខអន្តរាគមន៍ នៅពេលស្ថានការណ៍នយោបាយមិនប្រក្រតី។

សូមជម្រាបថា ថៃមានការធ្វើរដ្ឋប្រហារប្រហែល ២០លើក ក្នុងនោះ ១៣លើកជោគជ័យ ប៉ុន្តែ៣លើកទៀត ត្រូវបរាជ័យ។

រដ្ឋប្រហារយោធាចុងក្រោយបង្អស់ក្នុងប្រទេសថៃ បានកើតឡើងនៅថ្ងៃទី ២២ ខែឧសភា ឆ្នាំ ២០១៤ ដឹកនាំដោយលោក Prayut Chan-o-cha។ រដ្ឋប្រហារនេះត្រូវគេស្គាល់ថាជា «រដ្ឋប្រហារដោយក្រុមប្រឹក្សាជាតិដើម្បីសន្តិភាព និងសណ្ដាប់ធ្នាប់ (NCPO)»៕

អត្ថបទ៖ សុខ សុវណ្ណ

ចុចអាន៖ មេភូមិភាគ២ ថា ការដកតំណែង ផែថងថាន មិនប៉ះពាល់ដល់កងទ័ពនៅព្រំដែនទេ