ព្រោះ​សង្គ្រាម! សិស្សអ៊ុយក្រែន ១៧ ០០០​នាក់ចាប់ផ្តើមឆ្នាំសិក្សានៅសាលារៀន​ក្រោមដី

សិស្សប្រហែល ១៧ ០០០​នាក់នៅ Kharkiv ដែលជាទីក្រុងធំ​លំដាប់​ទីពីររបស់អ៊ុយក្រែន បានចាប់ផ្តើមឆ្នាំសិក្សាថ្មីនៅក្នុងអគារក្រោមដី ដែលត្រូវបានរចនាឡើង ដើម្បីការពារពួកគេពីការវាយប្រហារដោយមីស៊ីល និងយន្តហោះគ្មានមនុស្សបើករបស់រុស្ស៊ី។

យោង​តាម​ការ​ចុះ​ផ្សាយ​​កាល​ពី​ថ្ងៃ​ទី​២​កញ្ញា​របស់​ទីភ្នាក់ងារ​ព័ត៌មាន Reuters មកទល់ពេលនេះ ទីក្រុង Kharkiv បានបើកសាលារៀននៅក្រោមដីចំនួន​៧​ ដោយមានគម្រោងពង្រីកគំរូបែប​នេះ​បន្ថែម​ទៀត​​នៅឆ្នាំខាងមុខ។ អាជ្ញាធរក៏មានបំណងបំប្លែងស្ថានីយ៍រថភ្លើងក្រោមដីចំនួន​៦​ទៅជាថ្នាក់រៀន ដើម្បី​ឲ្យ​កុមារកាន់តែច្រើនអាចត្រឡប់ទៅ​រក​ការអប់រំដោយផ្ទាល់ជំនួស​ឲ្យ​ការ​សិក្សា​តាម​អនឡាញ។

អភិបាលក្រុង លោក Ihor Terekhov បាននិយាយថា «នេះគឺជាសាលាមួយក្នុងចំណោមសាលារៀនដែលនៅជិតបំផុតជាមួយព្រំដែនរុស្ស៊ី ដែលមានទីតាំងនៅជម្រៅ​​បីជាន់ក្រោមដី។ ជម្រៅគឺមានសារៈសំខាន់សម្រាប់សុវត្ថិភាព» ដោយបន្ថែមថា ទីតាំងធំបំផុតអាចផ្ទុកសិស្សបានរហូតដល់ ១ ៥០០​នាក់។

សូម​ជម្រាប​ថា សម្រាប់កុមារអ៊ុយក្រែនជាច្រើន ការត្រឡប់ទៅថ្នាក់រៀនធម្មតាវិញនៅតែមិនអាចទៅរួច។ តំបន់មួយចំនួននៅតែមានគ្រោះថ្នាក់ខ្លាំងពេក ដោយសារតែការវាយប្រហាររបស់រុស្ស៊ីជាបន្តបន្ទាប់។ ដើម្បីទទួលបានសិស្សកាន់តែច្រើនចូលថ្នាក់រៀនវិញ រដ្ឋាភិបាល​អ៊ុយក្រែនបានចាប់ផ្តើមសាងសង់សាលារៀននៅក្រោមដី​មិន​ត្រឹម​តែ​នៅ​ក្នុង​​ទីក្រុង Kharkiv ប៉ុណ្ណោះ​ទេ តែ​ក៏​ធ្វើ​ឡើង​នៅ​តំបន់​ជា​ច្រើន​​ទៀត​ដូចជា Zaporizhzhia, Kherson, Sumy, Dnipropetrovsk, Mykolaiv និង Chernihiv ជាមួយ​គម្រោង​បង្កើត​សាលា​រៀន​ក្រោម​ដី​ឲ្យបាន​សរុប​ចំនួន ១៥០​កន្លែង​នៅ​ត្រឹម​ចុង​ឆ្នាំ​២០២៥៕

ដោយ៖ ឈាង