ព័ត៍មានទាន់​ហេតុការណ៏
Search

គួច ខេ​វិ​ន បញ្ចេញ​សារ​ដាស់​ស្មារតី​កូន​ខ្មែរ​ឲ្យ​ភ្ញាក់រលឹក​លើ​ការ​អភិរក្ស​ថែរក្សា​មរតក​បេតិកភណ្ឌ​និង​វប្បធម៌

ភ្នំពេញ​ ៖​ ជាមួយគ្នា​នៃ​ភាព​ជោគជ័យ ​និង​ទទួលបាន​ការគាំទ្រ​លើ​ការផលិត​កម្មវិធី​ទូរទស្សន៍​ក្នុងឱកាស​ពិធីបុណ្យ​ភ្ជុំបិណ្ឌ​កាលពី​កន្លងមកនេះ ​ផលិតករ​កម្មវិធី​កម្សាន្ត​របស់​ស្ថានីយ​ទូរទស្សន៍​លោក គួច ខេ​វិ​ន ភ្លាមៗ​នេះ​បាន​ចេញមុខ​ថ្លែងអំណរគុណ​លើ​ការ​គាំទ្រ​របស់​ប្រជាពលរដ្ឋ​ខ្មែរ​គ្រប់​មជ្ឈដ្ឋាន​។​មិនតែប៉ុណ្ណោះ​លោក​ក៏បាន​បញ្ចេញ​សារ​មានបំណង​បំផុសស្មារតី​ដល់​កូន​ខ្មែរ​ទាក់ទង​ការចូលរួម​លើកស្ទួយ​មរតក បេតិកភណ្ឌ និង​វប្ប​ធម៌​ផងដែរ​។​

លោក គួច ខេ​វិ​ន បាន​លើកឡើងថា​ខ្ញុំបាទ​សូម​អរគុណ​ជា​អនេក​ដល់​មិត្ត​ក្នុង Facebook ដែល​តែងតែ​គាំទ្រ រៀងរាល់​កម្មវិធី​ទូរទស្សន៍ ដែល​ខ្ញុំ​ផលិត ហើយ​និង​បាន​ជួយ Share និង Like…​។ ជាក់ស្តែង​ដូចជា​រដូវ​បុណ្យ​ភ្ជុំ​កន្លងមក ដែលមាន​ក្រុម​ត្រកូល ខាត់ មាន​អ្នក Share និង​ចូលរួម​តាមដាន​ជាង 21k… ក្នុងពេល​តែ​៣​ថ្ងៃ​ជាមួយនឹង ភ្លេង បុរាណ​ខ្មែរ យ៉ាង​ពីរោះ​រណ្តំ​ចិត្ត​។​

ផលិតករ​កម្មវិធី​កម្សាន្ត​ដ៏​ល្បីឈ្មោះ​លោក គួច ខេ​វិ​ន បាន​បន្តថា ខ្មែរ​ពិតជា​សំបូរហូរហៀរ ទៅដោយ​មរតក បេតិកភណ្ឌ និង​វប្ប​ធម៌​ ក៏ដោយ​សារ តែ​ភាព​ហូរហៀរ​នេះ ហើយ​ទើប​បានជា​ធ្វើ​ឲ្យ​ខ្មែរ​ពិបាក​ថែ ពិបាក​រក្សា​…​ពិបាក​ចែកចាយ​ឲ្យ​កូនចៅ ជំនាន់​ក្រោយៗ រួច​ក៏​ទុក​ឲ្យ​គេ​លួច គេ​ប្លន់ ឲ្យ​គេ​រើសយក​ទៅធ្វើជា​សម្បត្តិ របស់គេ​ទៅវិញ​។ ចំណែក​ខ្លួន​ជា​ម្ចាស់​មរតក ដ៏​សំបូរបែប ក៏​បណ្តែតបណ្តោយ​កូនចៅ ឲ្យ​ទៅ​លួច​ចម្លង​វប្ប​ធម៌​ ជាតិ​គេ​ទាំង​ងងឹតងងល់​មក​ពង្វក់​ខ្មែរ ត​ជំនាន់​ហើយ​ថែមទាំង​នៅតែ​អួត​ក្អេងក្អាង ខុស​ទំនង​…​។​

លោក គួច ខេ​វិ​ន បាន​និយាយទៀតថា ​ប្រសិន​ជាមាន មនសិការ ជា​ខ្មែរ​ពិតតែ​បន្តិចបន្តួច រួច​លួច​ក្រឡេកមើល​ពួក ដែល​ធ្លាប់​លួច ធ្លាប់​ប្លន់ ធ្លាប់​រើសយក មរតក​វប្បធម៌​ខ្មែរ ទៅ​ថែ ទៅ​រក្សា ទៅ​ការពារ ទៅ​លើកស្ទួយ​នោះ អ្នក​នឹងមិន​ក្លាយទៅជា​ខ្មែរ​ដែល​ត្រូវ​បណ្តាសា​​របស់ បុព្វបុរស មហា​នគរ នោះឡើយ​។​

បន្ថែម​ពី​លើ​នេះ​លោក គួច ខេ​វិ​ន បាន​និយាយ​ថា​ ជំនួស​ឲ្យ​ពាក្យ​សោកស្តាយ តើ​អ្នក​បាន​ធ្វើ​អ្វីខ្លះ​ដើម្បី​រក្សា «​វប្បធម៌​» ជាតិខ្មែរ​? ប្រឈម​ទៅ​នឹង​ភាព​ធ្លាក់​ដុនដាប ដល់​កម្រិត​មួយ​ដែល​មិនល្អ នៃ​វប្បធម៌​រ​បស់​ខ្មែរ​ តើ​ក្រសួង និង​ស្ថាប័ន​ណាខ្លះ គួរ​ទទួលខុសត្រូវ និង​បញ្ឈប់​ភាព​លង់លក់​ដ៏​អាក្រក់ ទាំង​កណ្តាលថ្ងៃត្រង់​បែបនេះ​?៕