ព័ត៍មានទាន់​ហេតុការណ៏
Search

គន្លឹះ​សំខាន់​មួយចំនួន ដើម្បី​កាត់បន្ថយ​ហានិភ័យ ក្នុង​ការទិញ ដីធ្លី ផ្ទះសម្បែង ឬ​ដីឡូត៍ ដោយ​អ្នកជំនាញ​

ភ្នំពេញ​៖ វាគ្មិន​មកពី​ក្រសួង​រៀបចំ​ដែនដី នគរូបនីយកម្ម និង​សំណង់ បាន​ប្រាប់​គន្លឹះ​សំខាន់​មួយចំនួន ដែល​ប្រជា​ជាន​កម្ពុជា​គួរ​ដឹង ដើម្បី​កាត់បន្ថយ​ហានិភ័យ នៅពេល ទិញ ដីធ្លី ផ្ទះសម្បែង ឬ​ដីឡូត៍ នៅក្នុង​សិក្ខាសាលា​ស្តីពី នីតិវិធី​កាត់បន្ថយ​ហានិភ័យ ក្នុង​ការទិញ​លក់​អចលនទ្រព្យ ដែល​បាន​រៀបចំឡើង​ដោយ គ្រឹះស្ថាន​មីក្រូហិរញ្ញវត្ថុ FIRST FINANCE កាលពី​ថ្ងៃ​សៅរ៍ ទី​២០ ខែតុលា ឆ្នាំ​២០១៨ នៅ​សណ្ឋាគារ Raffles Hotel Le Royal ។​

​មូលហេតុ​ដែល​នាំ​ឲ្យ​មាន ការរៀបចំ​កម្មវិធី​នេះ​ឡើង ត្រូវបាន​លោកស្រី ជុន សុថា​នី អគ្គនាយិកា គ្រឹះស្ថាន​មីក្រូហិរញ្ញវត្ថុ FIRST FINANCE ប្រាប់ថា​៖ “​តាមរយៈ​បទពិសោធន៍​ជាង ១០​ឆ្នាំ​មកនេះ ក្នុងនាម​ជា​គ្រឹះស្ថាន​មីក្រូហិរញ្ញវត្ថុ​ដែល​ផ្តល់​កម្ចី​ទាក់ទង​នឹង​លំនៅដ្ឋាន​ខ្នាតតូច ដល់​ប្រជាជន​ដែលមាន​ចំណូល​ទាប និង​មធ្យម យើងខ្ញុំ​បាន និង​នៅតែ​ឃើញ​សាធារណៈជន​ជួបប្រទះ​នូវ​បញ្ហា​ជាច្រើន ក្នុង​ការទិញ​លក់​ដីធ្លី ឬ​ផ្ទះសម្បែង ដូចជា​ការទិញ​ដី ឬ​ផ្ទះ​ដែល​មិនមាន​ប្រវត្តិ​ច្បាស់លាស់ ឬ​ទិញ​ពី​ម្ចាស់​ដីឡូត៍ ឬ​បុរី​ដែល​មិនមាន​ច្បាប់​ត្រឹមត្រូវ ដី ឬ​ផ្ទះ​ដែលមាន​ប្លង់​ជាន់គ្នា ឬ​យល់ព្រម​ទទួលយក​ប្លង់​ទន់ នៅពេលដែល​ប្លង់​ដើម​ជា​ប្លង់រឹង ឬ​ព្រម​ទទួល​ការផ្ទេរសិទ្ធិ​ត្រឹម​ភូមិ​/​ឃុំ ដើម្បី​បញ្ចៀស​ការបង់ពន្ធ​ជាដើម​។ ទង្វើរ​ទាំងនេះ​អាចធ្វើ​ឲ្យ​ពួកគាត់​ជួប​នូវ​ហានិភ័យ​ក្នុងការ​បាត់បង់​សិទ្ធិ​គ្រប់គ្រង​អចលនទ្រព្យ​របស់គាត់​បាន​។​”

(រូបភាព៖ លោកស្រី ជុន សុថា​នី អគ្គនាយិកា គ្រឹះស្ថាន​មីក្រូហិរញ្ញវត្ថុ FIRST FINANCE)

​លោកស្រី ជុន សុថា​នី បាន​បន្តថា បញ្ហា​ទាំងនេះ អាច​កើតមានឡើង​ដោយសារ​ការយល់ដឹង លើ​ផ្នែក​ទិញ​លក់ ឬ​គ្រប់គ្រង​លើ​អចលនទ្រព្យ ឬ​ការផ្ទេរកម្មសិទ្ធិ​អចលនទ្រព្យ​ស្របច្បាប់ របស់​ពួកគាត់​នៅមានកម្រិត​នៅឡើយ​។ ដោយ​មើលឃើញ​នូវ​បញ្ហា​ទាំងនេះហើយ​ទើប ហ្វឺ​ស ហ្វា​យ​នែ​ន រួមជាមួយ​ដៃគូ​សហការ បាន​បង្កើត​យុទ្ធនាការ​ផ្សព្វផ្សាយ ដើម្បី​ផ្តល់នូវ​ចំណេះដឹង​បន្ថែម​ដល់​សាធារណៈជន ។​

​លោក សៅ រ៉ាវី ប្រធាន​នាយកដ្ឋាន​អភិរក្ស​សុរិយោដី នៃ​អគ្គនាយដ្ឋាន​សុរិយោដី និង​ភូមិសាស្ត្រ ក្រសួង​រៀបចំ​ដែនដី នគរូបនីយកម្ម និង​សំណង់ ប្រាប់​នូវ​គន្លឹះ​មួយចំនួន ដើម្បី​កាត់បន្ថយ​ហានិភ័យ ក្នុង​ការទិញ​លក់ ដីធ្លី ផ្ទះសម្បែង ឬ​​ដីឡូត៍ ត្រូវ​សិក្សា​ពី​ប្រវត្តិ ដី ធ្លី ផ្ទះសម្បែង ឬ​ដីឡូត៍ នោះ​ជាមុនសិន ដើម្បី​ឲ្យ​ដឹងថា អចលនទ្រព្យ​នោះ គ្មាន​ប្រវត្តិ​ពាក់ព័ន្ធ​ចំពោះ​ផ្លូវច្បាប់ ដូចជា ដី ធ្លី ផ្ទះសម្បែង ឬ​​ដីឡូត៍ ពុំមាន​ទំនាស់ ពុំ​ជាប់​ពាក់ព័ន្ធ​តាមផ្លូវ​ច្បាប់​ជាមួយ​តុលា មាន​ប័ណ្ណកម្មសិទ្ធិ​មានតម្លៃ​ក្នុង​ប្រើប្រាស់ មិនមែនជា​ប័ណ្ណ​មោឃភាព បន្ទាប់ពី​ក្បាលដី​នៅ​ត្រូវបាន​ស្ថិតនៅក្នុង​តំបន់​វិនិច្ឆ័យ​រួចហើយ ម្ចាស់​ដី​មិនបាន​ចូលរួម​។

(រូបភាព៖ លោក សៅ រ៉ាវី ប្រធាន​នាយកដ្ឋាន​អភិរក្ស​សុរិយោដី)

លោក​បាន​បន្តទៀតថា អ្នកទិញ ត្រូវ​សួរ អាជ្ញាធរ ឬ​ប្រជាជន​រស់នៅ​ក្បែរ​ដី​នោះ ឬ មន្ត្រី​សុរិយោដី បើទោះបីជា ដី​នោះបាន​ចុះបញ្ជី ឬ​មិនទាន់បាន​ចុះបញ្ជី​ក្ដី​។ ចំពោះ បុរី ផ្ទះល្វែង ឬ ​ដីឡូត៍ អ្នកទិញ ក៏​គួរ​គប្បី​ត្រូវ​សិក្សា និង​សួរនាំ​ព័ត៌មាន​ឲ្យ​បានច្បាស់លាស់ ដូចគ្នា​។ ចំពោះ​បុរី ធំៗ គេ​មានច្បាប់​ត្រឹមត្រូវ មានការ​ចុះបញ្ជី​អចលនទ្រព្យ ពេល​លក់​ឲ្យ​ទៅ​អតិថិជន គឺ​គេ​មាន​និតិ​វិធី​ក្នុងការ​ផ្ទេរកម្មសិទ្ធិ​ច្បាស់លាស់ បើ​មាន​ការបង់​រំ​លោះ បុរី គេ​មាន​មេធាវី ក្នុងការ​រៀបចំ​កិច្ចសន្យា និង​ឯកសារ​ផ្សេងៗ​ទៀត​។

​នៅក្នុង​សិក្ខាសាលា​ស្តីពី លោក លោក សៅ រ៉ាវី បានស្នើ​ឲ្យ​អ្នកទិញ ប្រុងប្រយ័ត្ន​ចំពោះ បុរី ដែល​ធ្វើការ​អភិវឌ្ឍ​ន៏ លក់​ទៅ​ឲ្យ​អតិថិជន តែ​មិនអាច​កាត់​ប្លង់​ធ្វើការ​ផ្ទេរកម្មសិទ្ធិ​បាន ក៏​ព្រោះតែ​ប្លងដី​របស់​បុរី​នោះ ត្រូវបាន​ម្ចាស់​បុរី យកទៅដាក់​នៅ​ធនាគារ ដើម្បី​យកលុយ​មក​ធ្វើការ​អភិវឌ្ឍ​ន៏​។ ចំពោះ ​ដីឡូត៍ ក៏​ដូចគ្នា ត្រូវ​សិក្សារ​ពី​ប្រវត្តិ​ដី​នោះ និង​សួរនាំ​ព័ត៌មាន​ពី​ការផ្ទេរកម្មសិទ្ធិ ព្រោះ​អ្នកខ្លះ​ដាក់​បដា​ធំៗ លក់​ថោកៗ តែ​ដី​នោះ ប៉ុន្តែ​ដី​នោះ​មិនមែន​របស់ខ្លួន​។ ការទិញ អចលនទ្រព្យ ដែល​ត្រូវបាន​ចុះបញ្ជី​ត្រឹមត្រូវ មាន​ឯកសារ​ត្រឹមត្រូវ​មានតម្លៃ​ប្រើប្រាស់​ស្របច្បាប់ មាន​ហានិភ័យ​ទាប​ជាង អចលនទ្រព្យ​ដែល​ពុំបាន​ចុះបញ្ជី​ច្បាស់លាស់​។​

​ជាមួយគ្នានេះ​ដែល ទីផ្សារ​ដីឡូត៍ ហាក់ដូចជា​កើនឡើង​យ៉ាង​ខ្លះ​រយៈពេល​ចុងក្រោយ​នេះ ដែល​អ្នកទិញ​គួរ​គប្បី​យល់ដឹង និង​ប្រុងប្រយ័ត្ន​។ ជាមួយគ្នានេះ អ្នកជំនាញ បាន​ឲ្យ​អ្នកទិញ​ដីឡូត៍ ត្រូវ​ប្រុងប្រយ័ត្ន​នូវ​រឿង​មួយចំនួន​នេះ ដូចជា​៖

១. ការ​កក់​ប្រា​ក់ដោយ​គ្មាន​ប្លង់ រហូតដល់​បង់ប្រាក់ ១០០% ទើប​ចេញ​ប្លង់​ស្របច្បាប់​ឲ្យ ដោយ​មានតែ​កិច្ចព្រមព្រៀង​គ្នា​រវាង​អតិថិជន និង​ក្រុមហ៊ុន ដោយ​គ្មាន​ការចូលរួម​ដឹងឮ​ពី​អាជ្ញាធរ​ដែនដី​។​

២. ម្ចាស់​ដីឡូត៍​សុំ​ដោះដូរ​ដី ដោយ​ហេតុផល​ផ្សេងៗ នៅពេលដែល​ដី​នោះ​មាន នឹងមាន​តម្លៃ​ខ្ពស់​នៅពេល​មាន​គម្រោង​អភិវឌ្ឍន៍ នៅក្បែរនោះ​ត្រូវបាន​ប្រកាស​។​

៣. មិន​មិន​បំបែក​ក្បាលដី ឲ្យ​ទៅ​អ្នកទិញ ដែល​កំពុង​កើតមាន​ច្រើន​នាពេល​បច្ចុប្បន្ននេះ​។​

៤. យក​ដី​អ្នកផ្សេង​មក​លក់ ឬ គ្រាន់តែ​កក់​លុយ​ម្ចាស់​ដី តែ ១០ ឬ ២០% ហើយ​ចាប់ផ្ដើម​ពុះ​ដី​នោះ​លក់​។​

៥. អ្នកលក់​ដីឡូត៍ បង់​រំ​លោះ ដោយ​អះអាងថា​គ្មាន​ការប្រាក់ តែ​គេ​បាន​បង្កប់​អត្រា​ការប្រាក់​ក្នុងនោះ​រួចទៅហើយ​។​

៦. គួរ​សិក្សា​ឲ្យ​បានច្បាស់លាស់ ព្រោះ​តំបន់​ដីឡូត៍​ពុះ​លក់​មួយចំនួន ជា​តំបន់​ដែល​មិន​ងាយ​អភិវឌ្ឍន៍​នោះទេ ដោយសារ​អ្នកទិញ​ភាគច្រើន រង់ចាំ​ទុក​លក់​យកចំណេញ និង​រង់ចាំ​មើលគ្នា ខណៈ​ដីឡូត៍​ទាំងនោះ មិនមាន​ហេ​ដ្ឋា​រចនា​ស​ម្ព័​ន្ឋ​ច្បាស់លាស់ និង​មិនមាន​ប្លង់​អភិវឌ្ឍន៍​ច្បាស់លាស់​៕​



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684