ដំណឹងល្អ! វ៉ាក់សាំងជំងឺអេដស៍តម្លៃ៤០ដុល្លារ នឹងដាក់លក់លើទីផ្សារនៅឆ្នាំ២០២៧

ជាដំណឹងល្អនិងក្តីសង្ឃឹមសម្រាប់ពិភពលោក ដោយក្រុមហ៊ុនឥណ្ឌាចំនួន២គឺ Dr Reddy’s Laboratories និង Hetero Labs បានចាប់ដៃគ្នាប្រកាសផែនការផលិតនិងចែកចាយវ៉ាក់សាំងជំងឺអេដស៍ Lenacapavir ដែលនឹងដាក់លក់លើទីផ្សារក្នុងតម្លៃ៤០ដុល្លារអាមេរិក នៅឆ្នាំ២០២៧។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ NDTV កាលពីថ្ងៃព្រហស្បតិ៍ទី២៥ខែកញ្ញាឆ្នាំ២០២៥, វ៉ាក់សាំងនឹងលក់ក្នុងតម្លៃនេះសម្រាប់ការប្រើប្រាស់មួយឆ្នាំ ពោលគឺចាក់៦ខែម្តង ហើយវាត្រូវបានកំណត់តម្លៃជាពិសេសសម្រាប់ប្រទេសមានចំណូលទាបនិងមធ្យមចំនួន១២០ប្រទេស ដែលកំពុងផ្ទុះជំងឺអេដស៍ខ្លាំង។

វ៉ាក់សាំង Lenacapavir ​ផលិត​​​ឡើង​ដោយ​ក្រុមហ៊ុន​​​ឱសថ​សហរដ្ឋ​អាមេរិក Gilead ហើយតាមពិតទៅ វា​ត្រូវ​បាន​ដាក់​លក់រួចទៅហើយ ប៉ុន្តែ​​ក្នុង​តម្លៃ​ខ្ពស់​កប់​ពពក ៤២ ២៥០ដុល្លារ​នៅ​​​ប្រទេស​បារាំង អាមេរិក ន័រវែស និង​អូស្ត្រាលី។

នៅ​ក្នុង​ការ​ពិសោធន៍​កន្លង​ទៅ អ្នកវិទ្យាសាស្រ្តបា​ន​រក​ឃើញ​ថា វ៉ាក់សាំង Lenacapavir មាន​ប្រសិទ្ធភាពសឹងតែ​១០០% បង្ការ​ការ​ឆ្លង​មេរោគ​អេដស៍ បន្ទាប់​ពី​​សាកល្បង​ពិសោធន៍​លើ​ស្ត្រី​​​ជាង ៥​ពាន់​នាក់​នៅ​អាហ្វ្រិក​ខាង​ត្បូង។

យោងតាមទិន្នន័យរបស់អង្គការសុខភាពពិភពលោក (WHO), ជំងឺអេដស៍បានសម្លាប់មនុស្ស ៤៤លាននាក់ ហើយនៅតែឆ្លង ១.៣លាននាក់ជារៀងរាល់ឆ្នាំ។ យ៉ាងណាអ្នកជំនាញ រួមទាំងវេជ្ជបណ្ឌិត និងសកម្មជននានា បានដាក់ក្តីសង្ឃឹមយ៉ាងមុតមាំថា វ៉ាក់សាំងនេះអាចជាអាវុធដ៏មុតស្រួចក្នុងការប្រយុទ្ធប្រឆាំងជំងឺអេដស៍៕

អត្ថបទ៖ សុខ សុវណ្ណ

ចុចអាន៖ វ៉ាក់សាំង​ជំងឺ​អេដស៍​តម្លៃ​ជាង​៤ម៉ឺនដុល្លារ តាម​ពិតអាច​លក់​ថោក​ជាងមុន​ដល់ ១​ពាន់​ដង​ឯណោះ