ព័ត៍មានទាន់​ហេតុការណ៏
Search

មន្ទីរ​សាធារណការ​ខេត្ត​ព្រះវិហារ​ មាន​ម៉ាស៊ីន​កាត់​ស្មៅ កាត់​មែក​ឈើ​ស្វ័យប្រវត្តិ ដោយ​ក្នុង​មួយថ្ងៃ​អាច​សម្រេច​កិច្ច​ការងារ​របស់​ខ្លួន​បាន​ចាប់ពី​៧​ទៅ​១០​គីឡូម៉ែត្រ​

ព្រះវិហារ​ ៖ ដើម្បី​ឲ្យ​តាម​បណ្ដោយ​ផ្លូវជាតិ​នានា មាន​សោភណភាព ​និង​កាត់បន្ថយ​បាន​នូវ​ហេតុការ​ណ៍​គ្រោះថ្នាក់​ចរាចរណ៍ ដោយ​យថាហេតុ មន្ទីរ​សាធារណការ​ និង​ដឹកជញ្ជូន​ខេត្ត​ព្រះវិហារ​ បាន​យក​ចិត្ត​ទុក​ដាក់​លើ​ការងារ​ជាច្រើន រួម​នឹង​ការ​កាត់​លះ​មែក​ឈើ​នៅ​តាម​ផ្លូវ​សំខាន់ៗ​ផង​ដែរ ដោយ​ប្រើ​ប្រាស់​ម៉ាស៊ីន​ស្វ័យប្រវត្តិ លឿន​រហ័ស​ទាន់​ចិត្ត។​

ជាក់ស្ដែង នៅ​ដើមខែ​វិច្ឆិកា ឆ្នាំ​២០១៨​នេះ ក្រុមការងារ​សម្អាត​រុក្ខជាតិ​របស់​មន្ទីរ​សាធារណការ និង​ដឹកជញ្ជូន​ខេត្ត​ព្រះវិហារ បាន​សម្អាត​រុក្ខជាតិ​(​កាត់​ស្មៅ​)​នៅ​តាម​បណ្ដោយ​ផ្លូវជាតិ​លេខ​សំខាន់ៗ ជា​ច្រើន​ខ្សែ នៅ​ក្នុង​ភូមិសាស្ត្រ ខេត្ត​ព្រះវិហារ​។​

លោក សំ លាង​ទ្រី ប្រធាន​មន្ទីរ​សាធារណការ និង​ដឹកជញ្ជូន​ខេត្ត​ព្រះវិហារ​បាន​ឲ្យ​ដឹង​ថា ការងារ​ថែ​ទាំ ជួសជុល​ផ្លូវ​ និង​ការ​កាត់​លះ​មែក​ឈើ​នៅ​តាម​ផ្លូវ​សំខាន់ៗ​មួយចំនួន​នៅ​ក្នុង​ខេត្ត​ទាំងមូល មន្ទីរ​សាធារណការ និង​ដឹកជញ្ជូន​ខេត្ត​ព្រះវិហារ បាននិងកំពុង​អនុវត្ត​ជាប្រចាំ ដើម្បី​លើក​សោភណភាព និង​សម្រួលការ​ធ្វើ​ចរាចរ​​ជូន​ប្រជាពលរដ្ឋ​ក្នុង​ការ​ធ្វើដំណើរ​។​

លោក​ សំ លាង​ទ្រី បានបញ្ជាក់​ផងដែរ​ថា ម៉ាស៊ីន កាត់​ស្មៅ កាត់​មែក​ឈើ​ស្វ័យប្រវត្តិ​នេះ មន្ទីរ​សាធារណការ និង​ដឹកជញ្ជូន​ខេត្ត​ព្រះវិហារ​បាន​កុម្ម៉ង់​ទិញ​ពី​ប្រទេស​បារាំង ដោយ​កាត់​ស្មៅ និង​មែក​ឈើ​បាន​ម្ដង បាន​១​ម៉ែត្រ ហើយ​ផ្លូវ​មួយ​ខ្សែ យើង​ត្រូវ​កាត់​ដោយ​ម៉ាស៊ីន​នេះ​ចំនួន​២​ជើង សងខាង មាន​ន័យ​ថា​២​ម៉ែត្រ​ម្ខាង ស្មើនឹង​៤​ម៉ែត្រ។

លោក​បន្ត​ឲ្យ​ដឹង​ទៀត​ថា ម៉ាស៊ីន កាត់​ស្មៅ​ និង​មែក​ឈើ​ស្វ័យប្រវត្តិ​នេះ ក្នុង​មួយថ្ងៃ​អាច​សម្រេច​កិច្ច​ការងារ​របស់​ខ្លួន​បាន​ចាប់ពី​៧​ទៅ​១០​គីឡូម៉ែត្រ ខុស​ពី​ម៉ាស៊ីន​កាត់​ស្មៅ​តូចៗ ច្រើនដង និង​ចំណេញ​ទាំង​ពេលវេលា​ និង​កម្លាំង​មនុស្ស​៕​