ព័ត៍មានទាន់​ហេតុការណ៏
Search

ស្តេច​អារ៉ាប៊ីសាអ៊ូឌីត​ចាប់ផ្តើម​ដំណើរ​ទេសចរណ៍​ក្នុង​ប្រទេស​ដ៏​កម្រ​ ខណៈ​វិបត្តិ​ពាក់ព័ន្ធ​ករណី​លោក Khashoggi ពុះកញ្ជ្រោល​នៅ​បរទេស

ព្រះមហាក្សត្រ​ Salman របស់​អារ៉ាប៊ីសាអ៊ូឌីត​បានចាប់ផ្តើម​ដំណើរ​ទេសចរណ៍​ក្នុងប្រទេស​មួយ​ដែល​មិន​ធ្លាប់មាន​ពីមុនមក​កាលពី​ថ្ងៃ​អង្គារ​ស្រប​ពេលដែល​ប្រទេស​នេះ​កំពុង​ជួបប្រទះ​នឹង​វិបត្តិ​អន្តរជាតិ​លើ​ឃាតកម្ម​អ្នកសារព័ត៌មាន Jamal Khashoggi។

យោងតាម​ទូរទស្សន៍​ជាតិ​បាន​ផ្សាយ​ថា ព្រះមហាក្សត្រ​ព្រះជន្ម​៨២​វស្សា​អង្គ​នេះ​ត្រូវបាន​ចូលរួម​ដោយ​រាជទាយាទ Mohammed bin Salman ក្នុង​ពិធី​មួយ​នៅ​កណ្តាល​ខេត្ត Qassim ខណៈដែល​ទ្រង់​បានចាប់ផ្តើម​នូវ​អ្វីដែល​ប្រព័ន្ធ​ផ្សព្វផ្សាយ​របស់​អារ៉ាប៊ីសាអ៊ូឌីត​ហៅថា​ជា​ដំណើរ​ទស្សនកិច្ច​នៅ “​តំបន់​ជាច្រើន​” ក្នុងប្រទេស​មួយ​នេះ​។​

មេដឹកនាំ​អារ៉ាប៊ីសាអ៊ូឌីត​កំពុង​ស្វែងរក​ការគាំទ្រ​នៅក្នុង​ប្រទេស​បន្ទាប់​ពីអ្វី​ដែល​ត្រូវបាន​គេ​មើលឃើញថា​ជា​វិបត្តិ​ការទូត​ដ៏​អាក្រក់​បំផុត​ដែល​ប្រទេស​នេះ​មិន​ធ្លាប់​ប្រឈមមុខ​ចាប់តាំងពី​ការវាយប្រហារ​ភេរវកម្ម​នៅ​ថ្ងៃទី​១១​ខែកញ្ញា​ឆ្នាំ​២០០១​លើ​សហរដ្ឋអាមេរិក​ម​ក​។​

រដ្ឋាភិបាល​បាន​និយាយថា ព្រះមហាក្សត្រ​ក៏​គ្រោង​នឹងធ្វើ​ទស្សនកិច្ច​នៅ​តំបន់ Hail ភាគ​ខាងជើង​ផងដែរ​ក្នុង​ដំណើរ​ទស្សនកិច្ច​លើកដំបូង​របស់​ទ្រង់​ចាប់តាំងពី​ព្រះអង្គ​បាន​ឡើង​គ្រងរាជ្យ​បល្ល័ង្ក​ដែលមាន​ឥទ្ធិពល​បំផុត​នៅ​តំបន់​ម​ជ្ឈឹ​ម​បូព៌ា​ក្នុង​ឆ្នាំ​២០១៥​។​

ទីភ្នាក់ងារសារព័ត៌មាន Saudi Press Agency ផ្លូវការ​បាន​រាយការណ៍​ថា នៅក្នុង​ខេត្ត Qassim ព្រះមហាក្សត្រ​បាន​បញ្ជា​ឲ្យ​ដោះលែង​អ្នក​ជាប់ពន្ធនាគារ​ដែល​ជំពាក់​លុយ​គេ​មិនអាច​សង​បាន​ជាមួយ​បំណុល​រហូតដល់​ទៅ​១​លាន​រី​យ៉ា​ល់ (២៦៧,០០០​ដុល្លារ​អាមេរិក​) ហើយនឹង​ចាប់ផ្តើម​គម្រោង​អភិវឌ្ឍន៍​ជាង​៦០០​គម្រោង​ដែលមាន​តម្លៃ​១៦​ពាន់​លាន​រី​យ៉ា​ល់​ស្មើនឹង​៤.៣​ពាន់​លាន​ដុល្លារ​អាមេរិក​។​

ទោះបីជា​យ៉ាងណាក៏ដោយ គេ​មិន​ច្បាស់​ទេ​ថា​តើ​ព្រះអង្គម្ចាស់ Mohammed នឹង​អមដំណើរ​ទ្រង់​ឬ​យ៉ាងណា​សម្រាប់​ដំណើរ​ទស្សនកិច្ច​ដែល​នៅ​សេសសល់​ចំ​ពេលដែល​ប្រទេស​អារ៉ាប៊ីសាអ៊ូឌីត​កំពុង​ប្រឈមមុខ​នឹង​កំហឹង​ជា​អន្តរជាតិ​លើ​ករណី​ឃាតកម្ម​លោក Khashoggi កាលពី​ថ្ងៃទី​២​ខែតុលា​នៅក្នុង​ស្ថាន​កុងស៊ុល​របស់​ខ្លូន​ប្រចាំ​ទីក្រុង​អ៊ី​ស្តង់​ប៊ុល​។​

ប្រតិកម្ម​ជាស​កល​ជុំវិញ​ករណី​ឃាត​កម្មនេះ​បានធ្វើ​ឲ្យ​ខូច​រូបភាព​របស់​ព្រះអង្គម្ចាស់ Mohammed ព្រះជន្ម​៣៣​វស្សា​បើទោះបីជា​ប្រទេស​នេះ​បដិសេធ​យ៉ាងខ្លាំង​ថា ព្រះអង្គ​មិនបាន​ជាប់​ពាក់ព័ន្ធ​ក៏ដោយ​៕ AFP