ព័ត៍មានទាន់​ហេតុការណ៏
Search

គឿ​ម សុវណ្ណ​ឌឿ​ត ជួប គួ​ន សុវណ្ណ , សៅ ប៊ុនធឿន ជួប លីន វណ្ណៈ ជម្រុះ​សប្ដាហ៍​ទី​២​ ដណ្ដើម​ប្រាក់​លាន ​ទម្ងន់​៥៤​គ​.​ក្រ

ព្រឹត្តិការណ៍​ប្រកួត​ប្រដាល់​ជម្រុះ​ដណ្ដើម​ប្រាក់​១០​លាន​រៀល របស់​ក្រុមហ៊ុន​ស្រាបៀ​Ganz berg ក្នុង​ប្រភេទ​ទម្ងន់​៥៤​គីឡូក្រាម នៅលើ​សង្វៀន​ទូរទស្សន៍​អាស៊ីអាគ្នេយ៍ នៅ​យប់​ថ្ងៃ​សៅរ៍​ទី​១០ ​ខែ​វិច្ឆិកា​ ឆ្នាំ​២០១៨​នេះ ជាការ​ប្រកួត​សប្ដាហ៍​ទី​២ លើក​ទី​១​របស់​ គឿ​ម សុវណ្ណ​ឌឿ​ត , គួ​ន សុវណ្ណ , សៅ ប៊ុនធឿន និង លីន វណ្ណៈ។

សម្រាប់​ការប្រកួត​សប្ដាហ៍​ទី​២​នេះ ដែល​មាន​២​គូ នោះ គឺ​គឿ​ម សុវណ្ណ​ឌឿ​ត ក្លិប​មោងឬស្សី​មរតក​គុន​ខ្មែរ ត្រូវ​ជួប​ប្រកួត​ជាមួយ គួ​ន សុ​វណ្ណៈ ក្លិប​យុវ​វាល​ស្បូវ​ខណ្ឌ​ច្បារអំពៅ ហើយ​ សៅ ប៊ុនធឿន ក្លិប​តា​ព្រហ្ម​មានជ័យ ត្រូវ​ជួប​ប្រកួត​ជាមួយ​ លីន វណ្ណៈ ក្លិប​បូរី​រាជសីហ៍​មាន​រិ​ទ្ធ។​

រវាង ​គឿ​ម សុវណ្ណ​ឌឿ​ត និង គួ​ន សុវណ្ណ មិន​ធ្លាប់​ដែល​ប៉ះគ្នា​ទេ​កន្លងមក។ ពួកគេ​ទាំងពីរ សុទ្ធ​តែ​មាន​សមត្ថភាព​បច្ចេកទេស​ខ្ពស់​ដូចគ្នា ដែល​មិន​មាន​នរណា​ហ៊ាន​មើលស្រាល​គ្នា​នោះ​ទេ ក្នុង​ការ​ជួប​គ្នា​លើកដំបូង​នេះ។​

ចាំមើល តើ​ក្នុងការ​ប្រកួត​រវាង គឿ​ម សុវណ្ណ​ឌឿ​ត និង គួ​ន សុវណ្ណ លើក​នេះ តើ​អ្នកណា​រក​បាន​៣​ពិន្ទុ​នោះ​?។​ គឿ​ម សុវណ្ណ​ឌឿ​ត ប្រកួត​ចុងក្រោយ​នេះ គេ​វាយ​ចាញ់​ រឿន សុខលី ក្លិប​ការិយាល័យ​ទី​៥​ កងទ័ពជើងគោក ក្នុង​ទឹក​ទី​៣ ឯ​ការប្រកួត​លើកចុងក្រោយ​របស់​ គួ​ន សុវណ្ណ គឺ​វាយ​ឈ្នះ ​ប្រាក់​ ស៊ី​ណាត ក្លិប​តា​ឯក​ដំបង​ដែក​មាន​រិ​ទ្ធ​ខេត្ត​ព្រៃវែង​ដោយ​ពិន្ទុ។​

ចំពោះ ការជួបគ្នា រវាង​ សៅ ប៊ុនធឿន និង លីន វណ្ណៈ វិញ​នោះ ក៏​ពុំ​ធ្លាប់​ជួប​គ្នា​ដែរ​ពីមុនមក​។ ​ពីរ​នាក់​នេះ ទើប​ឡើង​ប្រកួត​ជា​លើក​ដំបង​ប៉ុណ្ណោះ សម្រាប់​ការប្រកួត​ជម្រុះ​ដណ្ដើម​ប្រាក់​លាន​នេះ។​

សម្រាប់​ការជួបគ្នា​លើក​ទី​១​នេះ ទោះជា​គេ​មិន​ហ៊ាន​ទស្សន៍ទាយ​មុន​ថា​នរណា​ជា​អ្នកឈ្នះ​នោះ ក៏​គេ​រំពឹងទុក​ថា​ សៅ ប៊ុនធឿន ជា​អ្នក​ដែល​មាន​ប្រៀប​ឈ្នះ​លើ​ លីន វណ្ណៈ ​ដែរ។​ ដូច្នេះ​ចាំមើល ការ​ប្រកួត​ជាក់ស្ដែង តើន​រណា​ជា​អ្នកឈ្នះ​នោះ?​។​

សៅ ប៊ុនធឿន ប្រកួត​លើកចុងក្រោយ​នេះ គេ​វាយ​ចាញ់​ ង៉ែត វុ​ធ ក្លិប​កងពលតូច​ទ័ព​ឆ័​ត្រ​យោង​៩១១​ដោយ​ពិន្ទុ។

ព្រឹត្តិការណ៍​ប្រកួត​ប្រដាល់​គុន​ខ្មែរ​គូ​ម៉ា​រ៉ា​តុង ដណ្ដើម​ប្រាក់​១០​លាន​រៀល​វគ្គ​៣​របស់​ក្រុមហ៊ុន​ស្រា​បៀ​Ganzberg ក្នុង​ប្រភេទ​ទម្ងន់​៥៤​គីឡូក្រាម មាន​អ្នក​ប្រដាល់​ចំនួន​០៨​នាក់ មកពី​សមាគម​-​ក្លិប​ចំនួន​៨ បាន​ចូលរួម​ប្រកួត​ក្នុង​ព្រឹត្តិការណ៍​នេះ​។

អ្នក​ប្រដាល់​ទាំង​០៨​រូបនោះ ត្រូវ​បែង​ចែកជា​ពីរ​ពូ​ល មួយ​ពូ​ល​មាន​៤​រូប ដែល​ក្នុង​ពូ​ល​A មាន​កីឡាករ ជី ឆៃលី សមាគម​កីឡាប្រដាល់​ក្រសួងការពារជាតិ​, វ៉ន វ៉ុ​ន ក្លិប​អេ​ភូ​ថង​កីឡា , សៅ ប៊ុនធឿន ក្លិប​តា​ព្រហ្ម​មានជ័យ និង គឿ​ម សុវណ្ណ​ឌឿ​ត ក្លិប​មោងឬស្សី​មរតក​គុន​ខ្មែរ​ខេត្ត​បាត់ដំបង​។

ចំណែក​ពូ​ល B មាន ម៉ន វ៉ា​ន្នី ក្លិប​ការិយាល័យ​ទី​៥ កងទ័ពជើងគោក​, ឡុង ខេត្ត ក្លិប​ខ្លារខិន​មាន​រិ​ទ្ធ​, លីន វណ្ណៈ ក្លិប​បូរី​រាជសីហ៍​មាន​រិ​ទ្ធ និង​កីឡាករ​ គួ​ន​ សុវណ្ណ ក្លិប​យុវ​វាល​ស្បូវ​ខណ្ឌ​ច្បារអំពៅ។​

ចំពោះ​រូបមន្ត​ នៃ​ការប្រកួត គឺជា​ការប្រកួត​ជម្រុះ​សន្សំ​ពិន្ទុ​ក្នុង​ពូ​ល ដោយ​ការប្រកួត​មួយ​លើកៗ​មាន​តែ២គូ។ ការប្រកួត​នេះ គឺ​ធ្វើតាម​រូបមន្ត​វិលជុំ​សន្សំ​ពិន្ទុ​ក្នុង​ពូ​ល ដោយ​អ្នក​ទាំង​៨ ត្រូវ​ជួបគ្នា​ទាំងអស់ ។​ ការប្រកួត​ជម្រុះ​ទម្លាក់ចោល​៦​នាក់​ចេញ ទុក​២​នាក់ ​ដែលមាន​ពិន្ទុ​លើស​គេ​ក្នុង​ពូ​ល​នីមួយៗ ពោល​គឺ​យក​លេខ​១​ពូ​ល​A និង​លេខ​១​ពូ​ល​B ដើម្បី​ឡើង​ទៅ​ប្រកួត​ផ្ដាច់ព្រ័ត្រ​ដណ្ដើម​យក​ប្រាក់​១០​លាន​រៀល​តែម្ដង។​

សូមបញ្ជាក់ថា សម្រាប់​វគ្គ​ផ្ដាច់ព្រ័ត្រ អ្នក​ដែល​ឈ្នះ​គឺ​ទទួលបាន​ប្រាក់រង្វាន់​១០​លាន​រៀល និង អ្នក​ចាញ់​បាន​២​លាន​រៀល។​

ព្រឹត្តិការណ៍​នេះ មាន​រយៈពេល​០៩​សប្តាហ៍ ដោយ​ចាប់ផ្ដើម​ពី​ថ្ងៃ​ទី​០៣ ខែ​វិច្ឆិកា នឹង​គ្រោង​បញ្ចប់​នៅ​ថ្ងៃទី​២៩ ខែ​មករា ឆ្នាំ​២០១៩៕