ព័ត៍មានទាន់​ហេតុការណ៏
Search

ឃើញ​គេ​និយាយ​ទូរស័ព្ទ​ ​ឆ្លៀតឱកាស​ឆក់​យក ត្រូវ​ប៉ូលិស​ចាប់​បាន​

ភ្នំពេញ​ ៖​ បុរស​ជា​ចោរឆក់​ទូរស័ព្ទ​ម្នាក់ ​ក្នុងចំណោម​២​នាក់ ​ត្រូវ​សមត្ថកិច្ច​ចាប់​ខ្លួន​បាន​ភ្លាមៗ ​ខណៈ​ពួកគេ​​ ​ធ្វើ​សកម្មភាព​​​ឆក់​យក​ទូរស័ព្ទ​គេ ដែល​កំពុង​តែ​និយាយ​​ ​ ពេល​​​ជិះ​ម៉ូតូ​តាម​ផ្លូវ​ជាមួយគ្នា កាលពី​ថ្ងៃ​ទី​០៦​ ខែ​វិច្ឆិកា ឆ្នាំ​២០១៨ តាម​បណ្ដោយ​ផ្លូវ​លេខ​១០១៩ ស្ថិត​ក្នុង​សង្កាត់​ឃ្មួញ​ ខណ្ឌ​សែន​សុខ​។​

​ប៉ូលិស​បាន​ឲ្យ​ដឹង​ថា ​ជនសង្ស័យ​ដែល​ចាប់ខ្លួនបាន​ខាងលើ ឈ្មោះ សុខ ថា ហៅ​ហុង អាយុ​៣២​ឆ្នាំ ទីលំនៅ​ភូមិ​ដួង សង្កាត់​សំរោង ខណ្ឌ​ព្រែក​ព្នៅ គ្មាន​មុខរបរ​ច្បាស់លាស់​​ និង​បក្ខពួក​គេ​ម្នាក់ទៀត​ដែល​រត់គេច​ខ្លួន​ ឈ្មោះ​ ឃ្លី​។​

​បើតាម​ការរៀបរាប់​របស់​ជនរងគ្រោះ ឈ្មោះ ឡុង ចិន្តា ភេទ​ស្រី ​អាយុ​២៦​ឆ្នាំ មុខ​របរ​កម្មករ​រោងចក្រ មាន​ទីលំនៅ​ភូមិ​ពោធិ​រ៉ា​ល ឃុំ​ភ្នំ​បាត ស្រុក​ពញាឮ ខេត្ត​កណ្តាល​ បាន​បញ្ជាក់​ថា នៅ​មុន​ពេល​កើតហេតុ​គាត់​ធ្វើដំណើរ​តាម​ផ្លូវ​លេខ​១០១៩ ខណៈ​នោះ​ឪពុក​របស់​នាង​បាន​ទូរស័ព្ទ​មក​ឲ្យ​ទៅ​ស្រុក។ ពេល​កំពុងតែ​និយាយ​ទូរស័ព្ទ​មាន​បុរស​២​នាក់​ដែល​កំពុងតែ​ធ្វើដំណើរ​ពីក្រោយ​នាង ​បាន​ជិះ​ម៉ូតូ​មក​អែប ​រួច​ឆក់​​​យក​ទូរស័ព្ទ​ពី​ដៃ​របស់​នាង គ្រានោះ​នាង​ស្រែក​ចោរៗ​ ហើយ​ចៃដន្យ​ប៉ូលិស​មូលដ្ឋាន​កំពុង​យាមល្បាត​តាម​ផ្លូវ​បាន​ប្រទះឃើញ ​ក៏​ប្រដេញ​តាម​បង្ក្រាប​ចាប់ខ្លួនបាន​ម្នាក់ ឯ​បក្ខពួក​គេ​ម្នាក់ទៀត​កំពុង​រត់​គេចខ្លួនបាត់​។​

​​ជនរងគ្រោះ​បាន​បញ្ជាក់​ថា ទូរស័ព្ទ​នាង​ ដែល​បក្ខពួក​ចោរ​បាន​ឆក់​យកទៅ​បាត់​នោះ​ម៉ាក​អាយ​ហ្វូ​ន​ស៊ិ​ច​ផ្លឹស ពណ៌​ទឹកប្រាក់​។

ចំណែក​ជនជាប់ចោទ​ឈ្មោះ សុខ​ថា បាន​សារភាព​ថា ​បក្ខពួក​រប​ស់​គា​ត់​ម្នាក់​ដែល​បាន​ចូលរួម​ឆក់​ហើយ​យ​គេចខ្លួន​បាត់​នោះ ​ឈ្មោះ ឃ្លី អាយុ​ប្រហែល​២៨​ឆ្នាំ មាន​ទីលំនៅ​ម្ដុំ​ភ្នំ​បាសិត ស្រុក​ពញាឮ​។​

​ប៉ូលិស​បាន​កំពុង​តាម​ស្រាវជ្រាវ​រក​ជនសង្ស័យ ឈ្មោះ ឃ្លី ដើម្បី​តាម​ចាប់ខ្លួន​យក​មក​ផ្ដន្ទាទោស​ជា​មួយដៃ​គូ​របស់​គេ​ដែល​ត្រូវបាន​ចាប់ខ្លួន ​ហើយ​ត្រូវ​មហាជន​វាយដំ​យ៉ាង​ដំណំ​ដោយ​កំហឹង ប៉ុន្តែ​ត្រូវបាន​ប៉ូលិស​ឃាត់​ទាន់​៕