ព័ត៍មានទាន់​ហេតុការណ៏
Search

មនុស្ស​បីនាក់​រងរបួស​ធ្ងន់-​ស្រាល ខណៈ​ជិះ​បុក​គ្នា​ពេញទំហឹង​នៅផ្លូវ​ជាតិ​លេខ​៣៣

កែប ៖ មនុស្ស​បីនាក់​បាន​រង​របួស​ធ្ងន់​-ស្រាល​ ខណៈ​ជិះ​ម៉ូតូ​បុក​គ្នា​ពេញទំហឹង​លើ​កំណាត់​ផ្លូវជាតិ​លេខ​៣៣ ទិសដៅ​ផ្ទុយគ្នា ដោយហេតុ​ការណ៍​ខាងលើ​ត្រូវ​បាន​សមត្ថកិច្ច​អះអាង​ថា ​បណ្ដាល​មកពី​បុរស​រង​គ្រោះ​ផឹក​ស្រា​ស្រវឹង​យ៉ាង​ជោកជាំ​ ទើប​បង្ក​ជា​ករណី​គ្រោះថ្នាក់​ធ្ងន់ធ្ងរ​បែបនេះ​។​

យោងតាម​សំដី​សមត្ថកិច្ច​បាន​ប្រាប់​ឲ្យ​ដឹង​ថា ហេតុការណ៍​នេះ​បាន​កើតឡើង​កាលពី​វេលា​ម៉ោង​៥​និង​៤០​នាទី​ទៀបភ្លឺ ថ្ងៃ​ទី​០៦​ ខែ​វិច្ឆិកា ឆ្នាំ​២០១៨ ត្រង់​ចំណុច​មុខ​មន្ទីរ​សុខាភិបាល​ខេត្ត​កែប ស្ថិត​ក្នុង​ភូមិ​កែវ​ក្រសាំង សង្កាត់​កែប ក្រុង​-​ខេត្ត​កែប​។​

ប្រភព​ពី​សមត្ថកិច្ច​ដដែល​បានបញ្ជាក់​ទៀតថា ការ​ប៉ះទង្គិច​គ្នា​រវាង​យានយន្ត​ទាំងពីរ​គ្រឿង ​គឺ​ផ្ដើម​ឡើង​ដោយសារ​អ្នកបើកបរ​សេព​គ្រឿង​ស្រវឹង ដោយ​មុនពេល​កើតហេតុ ភាគី​ម៉ូតូ​C125 ​ពណ៌​ខ្មៅ​ស៊េរី​ឆ្នាំ​២០១០ ពាក់​ស្លាក​លេខ ភ្នំពេញ 1AP-7077​ ជិះ​គ្នា​ពីរ​នាក់ អ្នកបើកបរ​មានឈ្មោះ ញ៉ែ​ត ទិ​ត្យ ភេទ​ប្រុស អាយុ​២២​ឆ្នាំ មុខរបរ​កសិករ រង​របួស​ធ្ងន់ រស់នៅ​ក្នុង​ភូមិ​អង្កោល ឃុំ​អង្កោល ស្រុក​ដំណាក់​ចង្អើរ ខេត្ត​កែប និង​អ្នក​រួមដំណើរ ឈ្មោះ កៅ ណា​ង ភេទ​ប្រុស អាយុ​២៦​ឆ្នាំ ​រងរបួស​ស្រាល មាន​ទីលំនៅ​ជាមួយគ្នា​។​ ដោយឡែក​ ភាគី​ម៉ូតូ​ZOOMER.X ពាក់​ស្លាក​លេខ កែប 1A-2879 បើកបរ​ដោយ​ឈ្មោះ ភូ អ៊​ង ភេទ​ប្រុស អាយុ​២០​ឆ្នាំ នគរបាល រង​របួស​ធ្ងន់​។​

ក្រោយពី​វាស់វែង​ មធ្យោបាយ​ទាំងពីរ​គ្រឿង​ត្រូវ​បាន​សមត្ថកិច្ច​នាំទៅ​រក្សា​ទុក​នៅ​ក្នុង​អធិការដ្ឋាន​នគរបាល​ក្រុងកែប​សម្រាប់ធ្វើ​ការ​ដោះស្រាយ​គ្នា​ជា​ក្រោយ​។​ ចំណែក​អ្នក​រង​របួស​ធ្ងន់-ស្រាល ត្រូវបាន​រថយន្ត​សា​ម៉ុ​យ​ដឹក​ទៅ​សង្គ្រោះ​នៅឯ​មន្ទីរពេទ្យបង្អែក​ខេត្ត​កែប​៕