ព័ត៍មានទាន់​ហេតុការណ៏
Search

មន្ទីរពេទ្យ​បង្អែក​ខេត្ត​សៀមរាប នឹង​ត្រូវ​ទទួល​បាន​ការ​សាងសង់​អគារ​អ្នក​ជំងឺ​ថ្មី​២​ខ្នង

សៀមរាប ៖ មាន​អ្នកជំងឺ​ដ៏​ច្រើន​លើសលប់ បាន​មក​ទទួល​សេវា និង សម្រាក​ព្យាបាល​ជំងឺ នៅ​មន្ទីរ​ពេទ្យ​បង្អែក​ខេត្ត​សៀមរាប ទាំង​អ្នក​នៅ​ក្នុង​ខេត្ត​សៀមរាប និង​បណ្ដា​ខេត្ត​នានា​នៅ​ជុំវិញ​។ មូលហេតុ​ដែល​បាន​លើក​បង្ហាញ​នោះ គឺ​ដោយសារ​តែ​មន្ទីរពេទ្យបង្អែក​ខេត្ត​សៀមរាប មាន​ការ​ផ្តល់​សេវា​មួយ​ចំនួន​ ដែល​មន្ទីរពេទ្យ​បង្អែក​ខេត្ត​ផ្សេងៗ​មិនទាន់​មាន​ដូចជា សេវា​លាង​ឈាម និង ការវះកាត់​ធំៗ​ជាដើម​ និង​កត្តា​សមត្ថភាព​បច្ចេកទេស​ជំនាញ ក្រមសីលធម៌​វិជ្ជាជីវៈ។​

នេះ​បើ​យោង​តាម​សេចក្ដីរាយការណ៍ របស់​លោក​វេជ្ជបណ្ឌិត ក្រុស សារ៉ាត់ ប្រធាន​មន្ទីរ​សុខាភិបាល​ខេត្ត​សៀមរាប ជាមួយនឹង​វត្តមាន រដ្ឋមន្ត្រី​ក្រសួងសុខាភិបាល ( លោក​វេជ្ជបណ្ឌិត ម៉ម ប៊ុនហេង ) ក្នុង​ឱកាស​ចុះ​ពិនិត្យមើល ការ​ផ្ដល់​សេវា​សុខភាព​នៅ​មន្ទីរពេទ្យ​បង្អែក​ខេត្ត​សៀមរាប រសៀល​ថ្ងៃទី​១៤ ខែ​វិច្ឆិកា ឆ្នាំ​២០១៨ នេះ។

លោក ក្រុស សារ៉ាត់ បន្ថែម​ថា មន្ទីរពេទ្យ​បង្អែក​ខេត្ត​សៀមរាប មាន​ផ្ដល់​សេវា​សុខភាព​ជូន​ប្រជា​ពលរដ្ឋ​ដោយ​មិន​រើសអើង ជាពិសេស ​គឺ​អ្នកក្រ​ក្រោម​ការអនុវត្ត​មូលនិធិ​សមធម៌ សម្រាប់​ជួយ​ដល់​ពួកគាត់។​

លោក​រដ្ឋមន្ត្រី ម៉ម ប៊ុនហេង បញ្ជាក់​ថា ក្នុង​ស្ថានភាព​កំណើន​អ្នកជំងឺ​មក​ទទួល​សេវា​ និង​សម្រាក​ព្យាបាល​ជំងឺ​ច្រើន លើស​ចំនួន​គ្រែ​ដែល​មន្ទីរពេទ្យ​មាន ក្រសួងសុខាភិបាល​មាន​គម្រោង​នឹង​ពង្រីក​បន្ថែម​លទ្ធភាព​របស់​មន្ទីរពេទ្យ​បង្អែក​ខេត្ត​សៀមរាប ទាំង​ហេដ្ឋារចនាសម្ព័ន្ធ ធនធានមនុស្ស និង​សម្ភារៈ​បច្ចេកទេស​ផង​ដែរ ដើម្បី​ប្រែក្លាយ​មន្ទីរពេទ្យ​បង្អែក​ខេត្ត​សៀមរាប ឲ្យ​ទៅជា​មន្ទីរពេទ្យ​ទំនើប​មួយ​នៅ​កម្ពុជា ឆ្លើយ​តប​បាន តម្រូវ​ការ​ផ្ដល់​សេវា​ជូន​ប្រជាពលរដ្ឋ។

ឯកឧត្ដម​បញ្ជាក់​ថា ឆាប់ៗ​នេះ ​អាគារ​ធំៗ​ចំនួន​២ នឹង​ត្រូវ​បាន​សាងសង់ និង សម្ភារៈ​បរិក្ខារ​ពេទ្យ​ទំនើប​មួយ​ចំនួន​ នឹង​ត្រូវ​បាន​បញ្ជូន​មកដល់ ដែល​ជា​ជំនួយ​របស់​ប្រទេស​ជប៉ុន និង​កូរ៉េ។

ក្រសួង​ នឹង​ផ្ដល់​គ្រែ​ពេទ្យ សម្រាប់​អ្នកជំងឺ​សម្រាក​ព្យាបាល​នៅ​មន្ទីរពេទ្យ​បង្អែក​ខេត្ត​សៀមរាប បន្ថែម​មួយ​ចំនួន​ទៀត ក្នុង​ឆាប់ៗ​នេះ។

នៅ​ក្នុង​មន្ទីរពេទ្យ​បង្អែក​ខេត្ត​សៀមរាប​បច្ចុប្បន្ន​នេះ ក្នុង​១​ខែ មាន​អ្នកជំងឺ​មក​សម្រាក​ព្យាបាល​ប្រមាណ​ ២.០០០​នាក់ ទទួល​ពិនិត្យ​ពិគ្រោះ​ជំងឺ​ប្រមាណ​ជា ៦.០០០​នាក់ និង​វះកាត់​តូច-ធំ​ប្រហែលជា​ចំនួន​៥០០​នាក់។

ចំនួន​អ្នក​ជំងឺ​ដែល​មន្ទីរពេទ្យ​ទទួល​ និង​ផ្តល់​សេវា​ជូន​នេះ គឺ​លើសពី​ចំនួន​គ្រែ​ដែល​មន្ទីរពេទ្យ​មាន ចំនួន​៣០០​គ្រែ​ប៉ុណ្ណោះ ដែល​អ្នកជំងឺ​ខ្លះ​ត្រូវ​សម្រាក​ផ្ទាល់​នៅលើ​កម្រាល​ការ៉ូ ។​
នេះ​បើតាម​ការ​ឲ្យ​ដឹង​ពី​សំណាក់ លោក ប៉ែន ផលគុណ ប្រធាន​មន្ទីរពេទ្យបង្អែក​ខេត្តសៀមរាប ក៏ប៉ុន្តែ​លោក​សង្ឃឹមថា ៖ មិន​លើសពី​៣​ឆ្នាំ​ទៀត​នោះទេ មន្ទីរពេទ្យបង្អែក​ខេត្តសៀមរាប និង​ក្លាយទៅជា​មន្ទីរពេទ្យ​ទំនើប​មួយ​នៅ​កម្ពុជា ទាំង​ផ្នែក​ព្យាបាល​ជំងឺ​ទូទៅ និង​ផ្នែក​វះកាត់ ដោយសារតែ​មន្ទីរពេទ្យ​មួយ​នេះ​មាន​សម្ភារៈ​បរិក្ខា​ពេទ្យ​ទំនើបៗ ក្រោម​ជំនួយ​មកពី​ជប៉ុន និង​កូរ៉េ ៕