សហគ្រាសសិរិហ្វាម ដាក់គោលដៅបង្កើនការផលិតទឹកមៀន​ ទឹកស្វាយ ដើម្បីឆ្លើយតបតម្រូវការទីផ្សារក្នុងស្រុក

សហគ្រាសស្ថិតនៅខេត្តបន្ទាយមានជ័យមួយ ដាក់គោលដៅបង្កើនការផលិតទឹកមៀន ទឹកស្វាយកែវរមៀត និងប្រភេទដំណាប់កញ្ចប់ ដើម្បីឆ្លើយតបតម្រូវការទីផ្សារ ខណៈប្រជាជនខ្មែរកាន់តែឱ្យតម្លៃផលិតផលក្នុងស្រុកកាន់តែច្រើនឡើងៗ។

លោក អ៊ួន ឈាន ជាម្ចាស់សហគ្រាសសិរិហ្វាម ប្រាប់កម្ពុជាថ្មី ថា សហគ្រាសរបស់លោកកំពុងនឹងត្រៀមដាក់គោលដៅបង្កើនការផលិតភេសជ្ជៈ ចេញអំពីផ្លែមៀន និងស្វាយកែវរមៀតបន្ថែមទៀត ដើម្បីធ្វើយ៉ាងណាឆ្លើយតបទៅនឹងតម្រូវការទីផ្សារ។

រយៈពេលចុងក្រោយនេះ លោក អ៊ួន ឈាន មើលឃើញថា សន្ទុះនៃការគាំទ្រផលិតផលខ្មែរ កាន់តែផុសផុលច្រើនឡើងៗពីមួយថ្ងៃទៅមួយថ្ងៃ។​ ជាក់ស្ដែងនៅថ្ងៃតាំងពិព័រណ៍ផលិតផលខ្មែរ រយៈពេល៣ថ្ងៃ កន្លងទៅ លោក អ៊ួន ឈាន សង្កេតឃើញថា ប្រជាជនខ្មែរ បានបង្ហាញនូវស្មារតីរួមមួយក្នុងការគាំទ្រផលិតផលខ្មែរ ដែលនេះអាចចាត់ទុកជាសញ្ញាល្អមួយ សម្រាប់ ម្ចាស់សិប្បកម្ម សហគ្រាស និងរោងចក្រក្នុងស្រុកទាំងអស់អាចមានឱកាសសម្រាប់ការផលិតរបស់ខ្លួន។

ក្រឡេកទៅមើលពីសង្វាក់ផលិតកម្មនៅក្នុងសហគ្រាសសិរិហ្វាមវិញ បច្ចុប្បន្នសហគ្រាសអាចមានសមត្ថភាពផលិតភេសជ្ជៈកែ​ច្នៃជាច្រើនមុខ ដែលកំពុងមានវត្តមាននៅក្នុងទីផ្សារប្រទេសកម្ពុជា ផលិតផលទាំងនោះមានដូចជា៖ ទឹកមៀន ទឹកស្វាយកែវរមៀត និងដំណាប់ស្វាយ ដំណាប់ម្នាស់ ដែលសុទ្ធសឹងតែផលិតកើតចេញពីដំណាំរបស់កសិករនៅស្ថិតនៅខេត្តបន្ទាយជ័យ និងខេត្តប៉ៃលិន។

លោក អ៊ួន ឈាន បានបញ្ចាក់ដែរថា នៅឆ្នាំបន្តបន្ទាប់ សហគ្រាសសិរិហ្វាម ក៏នឹងគ្រោងទិញផ្លែមៀន និងស្វាយកែវរមៀតពីកសិករឱ្យបានក្នុង១ឆ្នាំ ១០០តោន ដើម្បីយកមកកែច្នៃធ្វើភេសជ្ជៈដែលមានស្ដង់ដាត្រឹមត្រូវ ដើម្បីដាក់លក់នៅលើទីផ្សារ ផងដែរ។

យ៉ាងណាមិញ ម្ចាស់សហគ្រាសរូបនេះ បានឱ្យដឹងទៀតដែរថា នៅពេលខាងមុខនេះ សហគ្រាសសិរិហ្វាមរបស់លោក ក៏នឹងគ្រោងបង្កើតរូបមន្តថ្មីបន្ថែមទៀត នោះគឺទឹកលម៉ើ និងទឹកត្រយ៉ូងចេក ដែលផលិតផលថ្មី២មុខនេះ នឹងមានការគាំទ្រដូចទៅនឹងភេសជ្ជៈដែលសហគ្រាសផលិតបានកន្លងមក ផងដែរ។

គួរឱ្យដឹងថា សហគ្រាសសិរិហ្វាម ជាសហគ្រាសកែច្នៃផ្លែឈើក្នុងស្រុកមួយ ដែលបានបង្កើតឡើងនៅក្នុងឆ្នាំ២០២២។ បច្ចុប្បន្នសហគ្រាសមានទីតាំងស្ថិតនៅភូមិវាលហាត់ ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ៕

អត្ថបទ ៖ សួស​ សិត