ព័ត៍មានទាន់​ហេតុការណ៏
Search

ក្បួន​ជនអន្តោប្រវេសន៍​ទៅដល់​ព្រំដែន អាមេរិក- ម៉ិ​ក​ស៊ិ​ក​

ក្បួន​ជនអន្តោប្រវេសន៍​អាមេរិក​កណ្ដាល​ដែរ​ធ្វើដំណើរ​ទៅ​សហរដ្ឋអាមេរិក​បាន​ប្រមូលផ្តុំ​គ្នា​នៅលើ​ព្រំដែន​អាមេរិក – ម៉ិ​ក​ស៊ិ​ក​កាលពី​ថ្ងៃ​ព្រហស្បតិ៍​បន្ទាប់ពី​ធ្វើដំណើរ​អស់​រយៈពេល​ជាង​មួយខែ​ដោយ​មិន​ញញើត​នឹង​ការដាក់​ពង្រាយ​កងទ័ព​អាមេរិក​រាប់ពាន់នាក់រ​បស់​លោក​ប្រធានាធិបតី Donald Trump នៅក្បែរ​ព្រំដែន​។​

ជនអន្តោប្រវេសន៍​ប្រហែល​៨០០​នាក់​ដែល​ជិះឡាន​ក្រុង​ចំនួន​២២​គ្រឿង​គឺ​បាន​ទៅដល់​នៅពេល​ព្រឹក​ព្រលឹម​ក្នុង​ទីក្រុង Tijuana ហើយ​បាន​ដើរ​ចេញពី​ផ្លូវ​ហាយវ៉េ​ចូលទៅក្នុង​ទីក្រុង​នេះ​។​

ពួកគេ​បាន​ចូលរួម​ជាមួយ​ក្បួន​នៃ​មនុស្ស​ជាង​៧៥០​នាក់​ផ្សេងទៀត​ដែល​បានធ្វើ​ដំណើរ​ទៅមុខ​និង​បាន​ទៅដល់​ទីក្រុង​នេះ​ក្នុង​រយៈពេល​ប៉ុន្មាន​ថ្ងៃ​ថ្មីៗ​នេះ​។​

ក្បួន​មនុស្ស​ទាំងស្រុង​ដែលមាន​ជនអន្តោប្រវេសន៍​ប្រមាណ​៥,៥០០​នាក់​ត្រូវបាន​គេ​រំពឹងថា​នឹង​បន្តទៅ​ដល់ទី​ក្រុង Tijuana នៅ​ប៉ុន្មាន​ម៉ោង​ខាងមុខនេះ​ដោយសារតែ​ឡានក្រុង​ដែល​រៀបចំ​ដោយ​អង្គការ​សប្បុរសធម៌ អ្នក​បរិច្ចាគ​ឯកជន​និង​អាជ្ញាធរ​មូលដ្ឋាន​ខណៈ​ក្រុម​ចុងក្រោយ​បំផុត​បាន​ទៅដល់​ទីក្រុង​នេះ​នៅ​ថ្ងៃ​សុក្រ​។​

នៅ​ទូទាំង​ព្រំដែន កងទ័ព​ជិត​៦,០០០​នាក់​ដែល​ត្រូវបាន​ដាក់ពង្រាយ​ដោយ​លោក Donald Trump កំពុង​ជាប់រវល់​នឹង​ការសាងសង់​របាំង​បេតុង​និង​របង​បន្លា​លួស​ដើម្បី​រារាំង​នូវ​អ្វីដែល​ប្រធានាធិបតី​អាមេរិក​រូបនេះ​ពិពណ៌នា​ថា​ជា “​ការឈ្លានពាន​”​។​

អ្នកក្រុង Tijuana រាប់រយ​នាក់​បាន​តវ៉ា​កាលពី​យប់​ថ្ងៃ​អង្គារ​នៅ​សួន Friendship Park ដែលជា​កន្លែង​ជន​ចំណាកស្រុក​បាន​បោះជំរំ​នៅតាម​របង​ព្រំដែន​ម៉ិ​ក​ស៊ិ​ក​និង​សហរដ្ឋអាមេរិក​។​

អ្នកឆ្លើយឆ្លង​ព័ត៌មាន​របស់ AFP ម្នាក់​បាន​និយាយថា អ្នក​តវ៉ា​ខ្លះ​បាន​គប់​ដុំថ្ម​ទៅលើ​ជន​ចំណាកស្រុក​ហើយ​ថែមទាំង​សំដៅលើ​កុមារ​ផងដែរ​បន្ទាប់ពី​ច្រៀង​ចម្រៀង​ជាតិ​ម៉ិ​ក​ស៊ិ​ក​និង​ស្រែក​ពាក្យស្លោក​ប្រឆាំង​ជនអន្តោប្រវេសន៍​។​

ជនអន្តោប្រវេសន៍​ភាគ​ច្រើន​បាន​រត់គេច​ពី​ភាពក្រីក្រ​និង​ចលាចល​នៅក្នុង​តំបន់ត្រីកោណ​ភាគ​ខាងជើង​របស់​តំបន់​អាមេរិក​កណ្តាល​ដែលមាន​ដូចជា​ប្រទេស​អែល​សាល់​វ៉ា​ឌ័​រ ហ្គា​តេ​ម៉ា​ឡា​និង​ហុន​ឌូ​រ៉ា​ស​ដែលជា​កន្លែង​អំពើ​ហឹ​ង្សា​ឃោ​ឃៅ​បាន​ជំរុញ​ឲ្យ​មាន​អត្រា​ឃាតកម្ម​ខ្ពស់បំផុត​នៅលើ​ពិភពលោក​៕ AFP