ព័ត៍មានទាន់​ហេតុការណ៏
Search

ចូលរួម​រំលែក​ទុក្ខ​ផង! ព្រឹទ្ធាចារ្យ​ចាប៉ី​ដងវែង​ លោកតា ប្រាជ្ញ ឈួន ទទួលមរណភាព​ហើយ​

ភ្នំពេញ ​៖ ​ពិតជា​រឿង​ដ៏​សោកសៅ​ និង​ក្រៀមក្រំ​បំផុត​ ក្រោយពី​ទទួល​បាន​ដំណឹង នៃ​ការ​ទទួល​មរណភាព​របស់​ព្រឹទ្ធាចារ្យ​ចាប៉ីដងវែង​ដ៏​ល្បាញ​ល្បី​របស់​កម្ពុជា​ លោកតា ប្រាជ្ញ ឈួន នា​ថ្ងៃ​ទី​១៧ ខែ​វិច្ឆិកា ​ឆ្នាំ​២០១៨​នេះ​។​

ស្រប​ពេល នៃ​ដំណឹង​មរណភាព​នេះ​ដែរ​ គឺ​មាន​មហាជន​ជាច្រើន​បាន​សម្ដែង​ការចូលរួម​រំលែក​ទុក្ខ​ដ៏​ក្រៀមក្រំ​ជាមួយ​ក្រុម​គ្រួសារ ​នៃ​សព​។​ គិត​មក​ទល់​ពេល​នេះ​ លោកតា ប្រាជ្ញ ឈួន មាន​វ័យ​៨៣​ឆ្នាំ​ហើយ ខណៈ​ដែល​លោកតា​បាន​ចូល​សង្គ្រោះ​បន្ទាន់​នៅ​មន្ទីរ​ពេទ្យ​កាល់ម៉ែត ​កាលពី​ថ្មីៗ​កន្លងមក​នេះ​។​

សូមបញ្ជាក់ថា គិត​រហូត​មកទល់ពេលនេះ​ អាជីព​ជា​អ្នក​ចាប៉ី​របស់ លោកតា​ ប្រាជ្ញ ឈួន ​គឺមាន​រយៈ​ពេល​ជិត៧០​ឆ្នាំ​មកហើយ ​ដោយ​ក្នុងនោះ​លោកតា​បាន​បន្សល់ទុក​នូវ​ស្នាដៃ​ផ្នែក​ចាប៉ី​ជាច្រើន​សម្រាប់​កូន​ខ្មែរ​ជំនាន់​ក្រោយ​ស្ដាប់​។​

កិត្តិសព្ទ​របស់ ​លោកតា​ព្រឹទ្ធ​ភី​រម្យ ប្រាជ្ញ ឈួន ដែល​ជា​អ្នកប្រាជ្ញ​ផ្នែក​ចាប៉ីដងវែង​នោះ ​មិន​ត្រឹមតែ​ល្បី​ខ្ទរខ្ទារ​សម្រាប់​តែ​ប្រទេស​កម្ពុជា​ប៉ុណ្ណោះ​ទេ​ គឺ​ថែមទាំង​ធ្វើ​ឲ្យ​អ្នក​ចាប៉ី​ជំនាន់​ក្រោយ​រក្សា​ និង​ចង​ចាំ​មិន​ភ្លេច​នូវ​ស្នាដៃ​របស់​លោកតា​ផង​ដែរ​។

យ៉ាងណាមិញ​ កម្ពុជា​ថ្មី​ សូម​ចូលរួម​រំលែក​ទុក្ខ​ដ៏​ក្រៀមក្រំ​ជាមួយ​ក្រុម​គ្រួសារ​លោកតា​ព្រឹទ្ធ​ភី​រម្យ ប្រាជ្ញ ឈួន ខណៈ​រដ្ឋមន្ត្រី​ក្រសួង​ព័ត៌មាន ​ក៏​នឹង​អញ្ជើញ​ចូលរួម​រំលែក​ទុក្ខ​នា​រសៀល​នេះ​ផង​នោះ​៕​