Toyota គ្រោងវិនិយោគ​ ៣៦០ លាន​ដុល្លារ លើផលិតកម្មរថយន្តកូនកាត់នៅវៀតណាម​

ក្រុមហ៊ុន Toyota Motor Vietnam (TMV) គ្រោង​នឹង​ដាក់ការវិនិយោគថ្មីតម្លៃជាង ៣៦០ លាន​ដុល្លារ ដើម្បីធ្វើទំនើបកម្មរោងចក្រនៅវៀតណាម សម្រាប់​ផលិតកម្មរថយន្តកូនកាត់ (ស៊ីសាំង និងសាកថ្ម)។

ការវិនិយោគនេះ ត្រូវបាន​ប្រកាសឡើងក្នុងអំឡុង​ពិធីប្រារព្ធខួប​ ៣០ ឆ្នាំ នៃប្រតិបត្តិការរបស់ Toyota នៅវៀតណាម ដែល​រៀបចំឡើងនៅទីក្រុងហាណូយ កាលពី​សប្ដាហ៍មុន។

ក្នុងពិធី​នោះ ប្រធានក្រុមហ៊ុន TMV លោក Nakano Keita ​បាន​ថ្លែងថា៖ «TMV នឹងធ្វើទំនើបកម្ម​ទីស្នាក់ការ​កណ្តាល និងរោងចក្រថ្មីរបស់យើង ហើយចាប់ផ្តើម​ផលិតកម្ម​រថយន្តអគ្គិសនីកូនកាត់ក្នុងតម្លៃជាង ៣៦០ ដុល្លារ។ យើងនឹងបន្ត​ជាអ្នកបង្កើតភាពរីករាយដ៏សំខាន់ ដោយផ្តល់នូវ​អព្យាក្រឹតកាបូនប្រកបដោយនិរន្តរភាពដល់អតិថិជនជាទីស្រលាញ់របស់យើង​ក្នុងប្រទេសវៀតណាម​»។

លោកបាន​លើកឡើងទៀតថា ក្នុងរយៈពេល ៣០ ឆ្នាំកន្លងមក Toyota បាន​ដើរតួយ៉ាងសំខាន់ក្នុងការអភិវឌ្ឍឧស្សាហកម្មរថយន្តវៀតណាម។ យ៉ាងណាមិញ​ ព័ត៌មាន​ដូចជាសមត្ថភាព​ផលិតកម្មមិនទាន់ត្រូវបាន​បញ្ចេញនៅឡើយទេ។

គួរគូសបញ្ជាក់ថា Toyota គឺជាម៉ាករថយន្តដំបូងគេដែលផលិតរថយន្តជាង ៧០០ ០០០ គ្រឿង ក្នុងប្រទេសវៀតណាម ​ជាមួយនឹងរថយន្តជាង ១ លានគ្រឿងត្រូវបានចែកចាយដល់អតិថិជន​។ ក្រុមហ៊ុន​ជប៉ុន​មួយ​នេះ​រក​ចំណូល​បាន​ជិត ១ ​ប៊ី​លាន​ដុល្លារ​ក្នុង​ការ​នាំ​ចេញ​​គ្រឿង​បន្លាស់រថយន្ត​ ដែលផលិតនៅវៀតណាម​៕