ព័ត៍មានទាន់​ហេតុការណ៏
Search

អនុរដ្ឋមន្ត្រី​ការបរទេស​អាមេរិក​ថា ទំនាក់ទំនង​យើង​មាន​សក្ដានុពល​ដ៏​ធំធេង​ណាស់ ហើយ​ចង់ឃើញ​ទំនាក់ទំនង​នេះ រីក​ស្គុះស្គាយ​ត​ទៅមុខទៀត

ភ្នំពេញ ​៖ ការ​លើកឡើង​របស់លោក John Sullivan អនុរដ្ឋមន្ត្រី​ការបរទេស​សហរដ្ឋអាមេរិក នេះ ខណៈ​លោក​ជួបពិភាក្សា​ការងារ​ជាមួយ​ឯកឧត្តម​ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស​កម្ពុជា កាលពី​ថ្ងៃទី​១៥ ខែវិច្ឆិកា ឆ្នាំ​២០១៨ នៅឯ​កិច្ចប្រជុំ​កំពូល​អាស៊ាន​លើក​ទី​៣៣ នា​ប្រទេស​សិង្ហ​បុរី​។

នៅ​ក្នុង​ឱកាស​ជួបពិភាក្សា​ការងារ​ជាមួយ​ឯកឧត្តម​ឧបនាយករដ្ឋមន្ត្រី ប្រាក់ សុខុន លោក John Sullivan អនុរដ្ឋមន្ត្រី​ការបរទេស​អាមេរិក បាន​លើកឡើងថា ការលើកស្ទួយ​ទំនាក់ទំនង​ទ្វេភាគី គឺជា​អាទិភាព​មួយ​របស់​សហរដ្ឋអាមេរិក ហើយ​ស្វាគមន៍​ចំពោះ​ការសម្រេច​របស់​រាជរ​ដ្ឋា​ភិ​បាល​កម្ពុជា​ក្នុងការ​ចាប់ផ្ដើម​ឡើងវិញ​នូវ​កម្មវិធី​ស្វែងរក​អដ្ឋិធាតុ​ទាហាន បាត់​ខ្លួន​អាមេរិក​ក្នុងសម័យ​សង្គ្រាម​នៅ​កម្ពុជា ក៏ដូចជា​ការរីកចម្រើន​ជឿនលឿន លើ​បញ្ហា​មួយចំនួន​ដូចជា ការដាក់​លោក កឹម​សុខា ឲ្យ​ស្ថិតនៅ​ក្នុងការ​ឃុំឃាំង ក្រៅ​ពន្ធនាគារ​ជាដើម។

លោក​បន្ត​ថា អាមេរិក​នៅមាន​ការ​បារម្ភ​ចំពោះ​បញ្ហា​ខ្លះទៀត ពាក់ព័ន្ធ​នឹង​សិទ្ធិ​នយោបាយ សង្គម​ស៊ីវិល និង​សារព័ត៌មាន ។

តាម​លោក John Sullivan “​បញ្ហា​ជា​កង្វល់​ធំ​បំផុត​នៅពេលនេះ គឺពាក់ព័ន្ធ​នឹង​ព័ត៌មាន ដែល​បាន​លើកឡើងថា នឹងមាន​មូលដ្ឋាន​យោធា​បរទេស​នៅ​កម្ពុជា។ បើ​មានរឿង​បែបនេះ កើតឡើង​មែន​នោះ​វា​នឹង​ប៉ះពាល់​យ៉ាងធ្ងន់ធ្ងរ ដល់​ទំនាក់ទំនង​ទ្វេភាគី​”​។ ជាមួយគ្នា​នោះ លោក​អនុរដ្ឋមន្ត្រី ក៏បាន​លើកឡើង​ផង​ដែរ​ថា អាមេរិក​បានរួម​ចំណែក ដល់​ការអភិវឌ្ឍន៍​សេដ្ឋកិច្ចកម្ពុជា​តាមរយៈ ការផ្តល់​ការអនុគ្រោះ​ពន្ធ GSP និង​ជួយ​ដល់​ផ្នែក​សកម្មភាព​មីន ដោយ​គាំទ្រ​ដល់​គោលដៅ ធ្វើ​ឲ្យ​កម្ពុជា​អស់​មាននៅ​ឆ្នាំ​២០២៥ ។ លោក​បន្តថា ទំនាក់ទំនង​យើង​មាន​សក្ដានុពល​ដ៏​ធំធេង​ណាស់ ហើយ​ចង់ឃើញ​ទំនាក់ទំនង​នេះ រីក​ស្គុះស្គាយ​ត​ទៅមុខទៀត ។

ជា​ការ​ឆ្លើយតប​ឯកឧត្តម​ឧបនាយករដ្ឋមន្ត្រី ប្រាក់ សុខុន បាន​ថ្លែង​ថា ឆ្លងកាត់​ជំនួប​ជាមួយ ថ្នាក់ដឹកនាំ​អាមេរិក​ជាច្រើន មានការ​ឯកភាព​គ្នា​មួយ ដែល​ចង់​រក្សា​ឲ្យ​បាន​នូវ បណ្ដាញ​ទំនាក់ទំនង​រវាង​ប្រទេស​ទាំងពីរ នឹង​បន្ត​កិច្ចសហប្រតិបត្តិការ លើ​វិស័យ​នានា​ផ្ដល់​ដោយ ផ្ដោតលើ​ផលប្រយោជន៍​រួម។ លោក​បន្ត​ថា ទំហំ​ពាណិជ្ជកម្ម​បន្ត​រីកចម្រើន ហើយ​សូម​អរគុណ​ចំពោះ ការផ្តល់​ភាពអនុគ្រោះ​ថ្មីៗ​សម្រាប់​ការនាំចេញ ទៅកាន់​អាមេរិក​នូវ​សម្ភារៈ ធ្វើដំណើរ​ដែល​ឆ្នាំនេះ​អាច នឹង​ហក់​រហូតដល់ ៥០០​លាន​ដុល្លារ​អាមេរិក។ ឯកឧត្តម​ឧបនាយករដ្ឋមន្ត្រី ប្រាក់ សុខុន បន្ថែម​ថា រាជរដ្ឋាភិបាល​កម្ពុជា​បានសម្រេច ចាប់ផ្ដើម​កម្មវិធី​ស្វែងរក​អដ្ឋិធាតុ​ទាហាន​បាត់​ខ្លួន​អាមេរិក ក្នុង​សង្គ្រាម​នៅ​កម្ពុជា តាម​សំណើ​របស់​សមាជិក​ព្រឹទ្ធសភា​អាមេរិក​គឺ​លោក​នឹង​សំណើ របស់​ភាគី​ពាក់ព័ន្ធ​ផ្សេងទៀត​។​ បើទោះបីជា​អាមេរិក​មិនទាន់​លើកលែង​ការ​រឹតត្បិត​ផ្នែក​ទិដ្ឋាការ លើ​មន្ត្រី​ខ្លះ​ក៏ដោយ។

ឯកឧត្តម​ឧបនាយករដ្ឋមន្ត្រី ប្រាក់ សុខុន សង្កត់ធ្ងន់​ថា “​ចំពោះ​បញ្ហា​ទាក់ទង និង​ព័ត៌មាន​ស្ដីពី​ការ​រៀបចំ​មូលដ្ឋាន​កងទ័ពជើងទឹក នៅ​តំបន់​ឆ្នេរសមុទ្រ​កម្ពុជា​នោះ គឺជា​ពាក្យ​ចចាមអារ៉ាម ដែល​កើត​ចេញពី​ការកើនឡើង​នៃ ទំហំ​វិនិយោគ​របស់​ចិន នៅ​តំបន់​នោះ​តែប៉ុណ្ណោះ។ រដ្ឋធម្មនុញ្ញ​របស់​ក​ម្ពុ​ជា មិន​អនុញ្ញាត​ឲ្យ​មាន​មូលដ្ឋាន​យោធា​បរទេស នៅ​លើ​ទឹកដី​របស់​ខ្លួន និង​មិន​អនុញ្ញាត​ឲ្យមាន​មូលដ្ឋាន​យោធា​របស់ខ្លួន នៅ​បរទេស​ឡើយ លើកលែងតែ​ក្នុង​ក្របខ័ណ្ឌ អង្គការសហប្រជាជាតិ​ដូច​ការ​បញ្ជូន​កងទ័ព​យើង ទៅ​ចូលរួម​បេសកកម្ម​រក្សា​សន្តិភាព របស់​អង្គការសហប្រជាជាតិ។ រាជរដ្ឋាភិបាល​កម្ពុជា នឹងមិន​រំលោភ​រដ្ឋធម្មនុញ្ញ​នោះឡើយ​”។

ជាមួយគ្នា​នោះដែរ​ឯកឧត្តម​ឧបនាយករដ្ឋមន្ត្រី ប្រាក់ សុខុន ក៏បាន​សំដែង​នូវ​ការស្វាគមន៍ ជាមុន​ចំពោះ​លោក Patrick Murphy ជា​អនាគត​ឯកអគ្គរដ្ឋទូត​អាមេរិក​ប្រចាំ​កម្ពុជា ក្នុងករណី​មានការ​គាំទ្រ​ពី​ព្រឹទ្ធសភា​៕