សម្ដេច​តេជោ ហ៊ុន សែន អំពាវនាវ​ឱ្យប្រជា​ពលរដ្ឋ​ប្រញាប់​ទៅប្ដូរ​លុយ​ថៃ​ យកលុយរៀល

ប្រមុខរដ្ឋស្ដីទី សម្ដេចតេជោ ហ៊ុន សែន ​បានអំពាវនាវ​ឱ្យប្រជាពលរដ្ឋប្រញាប់ទៅប្ដូរប្រាក់ថៃ យកប្រាក់រៀល ឬដុល្លារ ចៀសវាងការខាតបង់នៅពេលខាងមុខ។​

​នៅលើផេកហ្វេសប៊ុកផ្លូវការរបស់សម្ដេចលើកឡើងថា៖ «ខ្ញុំចង់ជម្រាបទៅបងប្អូនពិសេស​បងប្អូន​នៅជិត​ព្រំដែនថៃ សូមប្រញាប់ប្ដូរប្រាក់បាតថៃ ជាមួយប្រាក់រៀល ឬដុល្លារ ព្រោះពេល​ខាងមុខ​បងប្អូន នឹងរងការខាតបង់ធ្ងន់ធ្ងរ និងអាចក្លាយជាចំណុចដែលគេយកធ្វើជា​ចំណុចខ្សោយ​ដែល​គេគំរាមដូចករណីអគ្គិសនី អ៊ីនធឺណិត និងប្រេងឥន្ធនៈកាលពីពេលមុន។ ឈប់ប្រើប្រាក់បាត​មកប្រើប្រាក់រៀល គឺជួយពង្រឹងនូវរូបិយវត្ថុរបស់ជាតិយើង»។

ធនាគារជាតិកាលពីពេលថ្មីៗនេះ បានផ្ដល់ការណែនាំដល់គ្រឹះស្ថានធនាគារ និងហិរញ្ញវត្ថុ និងអាជីវករប្ដូរប្រាក់ឱ្យផ្ដល់សេវាប្ដូរប្រាក់បាតក្នុងអត្រាទីផ្សារ ដើម្បីសម្រួលដល់ការប្ដូរលុយបាតថៃ សម្រាប់ប្រជាពលរដ្ឋដែលមកពីប្រទេសថៃ។

បច្ចុប្បន្នធនាគារ អេស៊ីលីដា បានអនុវត្តតាមការជូនដំណឹងនេះ ហើយគ្រឹះស្ថានធនាគារ និងហិរញ្ញវត្ថុ និងអាជីវករប្ដូរប្រាក់ផ្សេងៗ នឹងបន្តអនុវត្តការប្ដូរប្រាក់នេះ ដើម្បីការពារផលប្រយោជន៍របស់ប្រជាពលរដ្ឋ។

ធនាគារជាតិអំពាវនាវឱ្យគ្រឹះស្ថានធនាគារ និងហិរញ្ញវត្ថុ និងអាជីវករប្ដូរប្រាក់ចូលរួមសហការទទួលប្ដូរប្រាក់បាតទៅប្រាក់រៀលក្នុងអត្រាទីផ្សារ ដោយស្មារតីសាមគ្គី និងជួយគ្នាក្នុងកាលៈទេសៈនេះ។

សម្ដេចតេជោ ​ហ៊ុន សែន ​បានបន្ថែមថា យើងមិនដែលបាន​ទៅសុំទំនិញថៃ​មកលក់ក្នុង​ទីផ្សារ​យើងទេ គឺយកលុយទៅ​ទិញ សូមអ្នកដឹកនាំថៃ កុំយល់ច្រឡំ និងប្រមាថកម្ពុជាបន្តទៀត។ យើងដឹងថា ពួកអ្នកជាអ្នកមានជាងកម្ពុជា តែអ្នកក៏ត្រូវយល់ថា យើងក៏បានយកលុយទៅ​ទិញទំនិញថៃ ទើបធ្វើឱ្យប្រជាជនថៃមានទីផ្សាររកប្រាក់ចំណូល។

សូមប្រជាជនថៃ​ដែលធ្លាប់លក់ទំនិញមកកម្ពុជា កុំខឹងកម្ពុជាដែលជាអតិថិជនដ៏ធំត្រូវបាត់​បង់ដែល​នេះមិនមែនជាកំហុសរបស់កម្ពុជានោះទេ៕