អ្នកចូលចិត្តផឹក​ភេសជ្ជៈ​ប៉ូវ​កម្លាំង​រាល់​ថ្ងៃ ត្រូវ​ដឹង​ពី​ផល​ប៉ះពាល់​ទាំង​នេះ

មនុស្ស​មួយ​ចំនួន​ធំ​ពេល​មាន​អាការៈ​ងងុយ​ដេក អស់កម្លាំងពេល​កំពុង​ធ្វើការ ឬជាប់​បើកបរ​ផ្លូវ​ឆ្ងាយ ហើយ​គ្មាន​ពេល​សម្រាក ​បាន​​ជ្រើសរើស​យក​វិធី​​ផឹក​ភេសជ្ជៈ​ប៉ូវ​កម្លាំង​ផ្សេង​ៗជំនួស​វិញ។ ការ​ផឹក​ភេសជ្ជៈ​ប្រភេទ​នេះ​ច្រើន​មិន​ល្អ​ចំពោះ​សុខភាព​ឡើយ នេះ​បើ​តាម​ការ​លើក​ឡើង​របស់​វេជ្ជបណ្ឌិត ហ៊ាង រតនា ឯកទេស​ទូទៅ។

លោក​បាន​បញ្ជាក់​ថា មនុស្ស​កំពុង​តែ​ងងុយ​ដេក តែ​គ្រាន់​ផឹក​ភេសជ្ជៈ​ភ្លាម​អាច​មាន​សមត្ថភាព​ធ្វើឲ្យ​ស្វាង​ចែស ព្រោះ​ភេសជ្ជៈ​ទាំង​នោះ​មាន​ជាតិ​កាហ្វេអ៊ីន​ខ្ពស់​ដែល​ចូល​ទៅ​ទប់សកម្មភាព pineal gland ដែល pineal glandនេះ មាន​តួនាទី​ផលិត​មេឡាតេនីន​ធ្វើឲ្យ​ងងុយ​ដេក។ លោក​វេជ្ជបណ្ឌិតលើក​ឧទាហរណ៍​ងាយ​ៗ​មក​ថា ពេល​ងងុយ​ដេក ឬ​អស់​កម្លាំង​ហើយ​យើង​ផឹក​ភេសជ្ជៈ​ចូល​ក្នុង​ពោះ​ភ្លាម វា​អាច​ទប់​មេឡាតេនីន​បាន​ភ្លែត។

ភេសជ្ជៈ​ប៉ូវ​កម្លាំង​ក្រៅពី​មាន​ជាតិ​កាហ្វេអ៊ីន វា​ក៏​សម្បូរ​ជាតិ​ស្ករ​ច្រើនដែល​ធ្វើឲ្យ​យើង​មាន​កម្លាំង ស្វាង នៅ​តែ​មាន​សមត្ថភាព​ធ្វើការ ឬ​បើកបរ​រហូត​បាន។

ជា​ការ​ដាស់តឿន​លោក​វេជ្ជបណ្ឌិត​បាន​ណែនាំ​ឲ្យ​អ្នក​ងងុយ​ដេក កុំ​ជ្រើសរើស​ការ​ផឹក​ភេសជ្ជៈប៉ូវកម្លាំង​ច្រើន​ពេក ព្រោះ​វា​ប៉ះពាល់​ដល់​សុខភាព​ដូចជា មួម៉ៅ​ច្រើន គេង​មិន​លក់ បេះដូង​លោត​ញាប់ ឬ​សម្ពាធ​ឈាម​ឡើង​ខ្ពស់។ ពេល​មាន​អារម្មណ៍​អស់​កម្លាំង ឬ​នឿយហត់​ជាប់​លាប់​រហូត សូម​សាកល្បង​វិធី​ផ្សេង​ ក្រៅ​ពី​ផឹក​ភេសជ្ជៈ​ជំនួយដូចជា​ ផឹកទឹកឲ្យបានច្រើន លំហាត់​ប្រាណ​ខ្លី​ៗ លុបលាង​មុខ ផឹកទឹក​មាន​ជាតិ​រ៉ែ ខនិជ ឲ្យ​បាន​គ្រប់​គ្រាន់ ៕

 

អត្ថបទផ្ដល់សិទ្ធដោយ៖ Hello Krupet