ព័ត៍មានទាន់​ហេតុការណ៏
Search

ជប៉ុន​ប្រកាស​បន្ត​ពង្រឹង និង​ពង្រីក កិច្ច​សហប្រតិបត្តិការ​ជាមួយ​កម្ពុជា ដើម្បី​ថែរក្សា​សន្តិភាព ស្ថិរភាព

ភ្នំពេញ​ ៖ ​នេះ​ជា​ការ​លើកឡើង​របស់​លោក មី​កា​មី ម៉ាសា​ហ៊ី​រ៉ូ (Mikami Masahiro) ឯកអគ្គរាជទូត​ជប៉ុន​ថ្មី​ប្រចាំ​កម្ពុជា ខណៈ​ដែល​លោក​បាន​ចូល​ជួប​សំដែង​ការគួរសម និង​ពិភាក្សា​ការងារ​ជាមួយ​ឧត្ដមសេនីយ៍ឯក ហ៊ុន ម៉ា​ណែ​ត អគ្គ​មេបញ្ជាការ​រង​នៃ​កង​យោធពល​ខេមរភូមិន្ទ និង​ជា​មេបញ្ជាការ​កងទ័ពជើងគោក នៅ​បញ្ជាការដ្ឋាន​កងទ័ពជើងគោក នៅ​រសៀល​ថ្ងៃ​ទី​១៥ ខែ​វិច្ឆិកា ឆ្នាំ​២០១៩​។​

នៅក្នុង​ជំនួប​សន្ទនា​នោះ ក្នុងនាម​កងទ័ពជើងគោក លោក​ឧត្ដមសេនីយ៍ឯក ហ៊ុន ម៉ា​ណែ​ត បាន​សម្ដែង​ការស្វាគមន៍​ចំពោះ​លោក Mikami Masahiro ដែល​ត្រូវ​រាជរដ្ឋាភិបាល​ប្រទេស​ជប៉ុន តែងតាំង​ជា​ឯកអគ្គរាជទូត​ជប៉ុន​ប្រចាំ​នៅ​ព្រះរាជាណាចក្រ​កម្ពុជា។ ឧ​ត្ត​ម​សេនីយ៍​ឯក ហ៊ុន ម៉ា​ណែ​ត បាន​ថ្លែងអំណរគុណ​ដល់​ប្រទេស​ជប៉ុន ដែល​បាន​តែងតែ​ជួយឧបត្ថម្ភ​គាំទ្រ​ដល់​កម្ពុជា ចាប់តាំង​ពី​ទស្សវត្ស​ទី​៨០​មក និង​បាន​បញ្ជូន​កង​កម្លាំង​រក្សា​សន្តិសុខ​សន្តិភាព​មកកាន់​កម្ពុជា​ក្នុងការ​រៀបចំ​បោះឆ្នោត ដើម្បី​រួមចំណែក​ថែរក្សា​សន្តិភាព​ជូន​ដល់​ប្រជាជន​កម្ពុជា។ ក្រៅពីនេះទៀត ជប៉ុន​ក៏បាន​ជួយ​ដល់​កម្ពុជា​លើ​ការងារ​កសាង​ហេដ្ឋារចនាសម្ព័ន្ធ ការបណ្តុះបណ្តាល​ធនធាន​មនុស្ស និង​ការអភិវឌ្ឍ​សេដ្ឋកិច្ចកម្ពុជា​ឲ្យ​មានការ​រីកចម្រើន។

ជាមួយគ្នា​នោះ មេបញ្ជាការ​កងទ័ពជើងគោក​កម្ពុជា ក៏បាន​ថ្លែងអំណរគុណ​ចំពោះ​ប្រទេស​ជប៉ុន ដែល​តែងតែ​គាំទ្រ​ដល់​ដំណើរការ​អភិវឌ្ឍ​ប្រទេស​កម្ពុជា និង​គាំទ្រ​ការអនុវត្ត​លទ្ធិប្រជាធិបតេយ្យ​នៅ​កម្ពុជា​។ លោក​បន្តថា ផ្អែក​តាម​អនុស្សរណៈ​យោគយល់​គ្នា (MOU) និង​កិច្ចព្រមព្រៀង​ផ្សេងៗ​រវាង​ក្រសួងការពារជាតិ​ប្រទេស​ទាំងពីរ​កម្ពុជា​-​ជប៉ុន គឺ​នឹង​បើកឱកាស​ដល់​កងទ័ព​ជើងគោក​នៃ​ប្រទេស​ទាំងពីរ អាច​ពង្រីក​ទំនាក់ទំនង និង​កិច្ចសហប្រតិបត្តិការ​ជាមួយគ្នា​បន្ថែម​ទៀតផង​ដែរ​។​

លោក មី​កា​មី ម៉ាសា​ហ៊ី​រ៉ូ (Mikami Masahiro) ឯកអគ្គរាជទូត​ជប៉ុន ប្រចាំ​នៅ​កម្ពុជា បាន សម្ដែង​ការកោតសរសើរ និង វាយតម្លៃ​ខ្ពស់​ចំពោះ​ការរីកចម្រើន​យ៉ាង​ឆាប់រហ័ស​នៅ​ព្រះរាជាណាចក្រ​កម្ពុជា ហើយ​ឯកឧត្តម​សង្ឃឹមថា កម្ពុជា​នឹង​បន្តធ្វើ​ការអភិវឌ្ឍ​រីកចម្រើន​ទៅមុខទៀត និង មាន​សន្តិភាព​ល្អប្រសើរ​ទៅ​ថ្ងៃ​អនាគត​។ លោក​ឯកអគ្គរាជទូត​ជប៉ុន​បញ្ជាក់ទៀតថា ប្រទេស​ជប៉ុន នឹង​ពង្រឹង និង​ពង្រីក​កិច្ចសហប្រតិបត្តិការ​ជាមួយ​ប្រទេស​កម្ពុជា ដើម្បី​ថែរក្សា សន្តិភាព ស្ថិរភាព និង​រួមចំណែក​ជំរុញ​ដល់​ការអភិវឌ្ឍ​ប្រទេស​កម្ពុជា​ឲ្យ​មាន​ការ​រីកចម្រើន​ថែមទៀត។

សូម​បញ្ជាក់​ថា ជំនួប​សម្ដែង​ការគួរសម និង​ពិភាក្សា​ការងារ​រវាង​មេបញ្ជាការ​កងទ័ពជើងគោក​កម្ពុជា និង​ឯកអគ្គរាជទូត​ជប៉ុន​នា​ពេល​នេះ គឺ​ផ្ដោត​សំខាន់​លើ​ការ​ពង្រឹង និង​ពង្រីក​កិច្ចសហការ​នៃ​ប្រទេស​ទាំងពីរ​លើ​យោធា និង​វិស័យ​ផ្សេងៗ​ដើម្បី​សេចក្តីសុខ​របស់​ប្រជាជន និង​ការ​អភិវឌ្ឍ​នៃ​ប្រទេស​ទាំងពីរ៕

អត្ថបទ ៖ សុជាតា​



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 012 454 575 និង 012 499 114