BREAKING NEWS
Search

ការអនុវត្ត​ច្បាប់​ចរាចរណ៍​ផ្លូវគោក​ថ្ងៃទី​២​កក្កដា ​រក​ឃើញ​មធ្យោបាយ​ល្មើស​ ២ ៣៤៥​ គ្រឿង​

ភ្នំពេញ ៖ ការ​រឹត​បន្ដឹង​អនុវត្ត​ច្បាប់ ស្ដីពី​ច្បាប់​ចរាចរណ៍​ផ្លូវគោក កាលពី​ថ្ងៃទី​១ ខែ​កក្កដា ឆ្នាំ​២០២០ សមត្ថកិច្ច​នគរបាល​ចរាចរណ៍​រកឃើញ​មធ្យោបាយ​ល្មើស​ប្រមាណ ២ ៣៤៥​ គ្រឿង នេះ​បើ​យោង​តាម​របាយការណ៍ ដែល​កាសែត​កម្ពុ​ជាថ្មី ទទួល​បាន​ពី​នាយកដ្ឋាន​នគរបាល ចរាចរណ៍ និង សណ្ដាប់ធ្នាប់​សាធារណៈ នៃ​អគ្គស្នងការដ្ឋាន​នគរបាល​ជាតិ។

ក្នុងចំណោម​មធ្យោបាយ​ដែល​ល្មើសច្បាប់​ចរាចរណ៍​ទាំង ២ ៣៤៥ ​គ្រឿង​នេះ ក្នុង​នោះ​មាន​ម៉ូតូ ចំនួន​៩៩៧​គ្រឿង និង​យានយន្ត​ផ្សេងៗ​ទៀត រួមទាំង​រថយន្ត ១ ៣៤៨​ គ្រឿង។ សម្រាប់​រយៈពេល ២​ថ្ងៃ គិត​ចាប់ពី​ថ្ងៃទី​១ ដល់​ថ្ងៃទី​២ ខែកក្កដា ឆ្នាំ​២០២០ លទ្ធផល នៃ​ការ​រឹតបន្ដឹង​អនុវត្ត​ច្បាប់ ស្ដីពី ច្បាប់​ចរាចរណ៍​ផ្លូវគោក សមត្ថកិច្ច​នគរបាល​ចរាចរណ៍​រកឃើញ​មធ្យោបាយ​ល្មើសច្បាប់ សរុប ប្រមាណ ៤ ៥៣៦ ​គ្រឿង​នេះ ក្នុងនោះ​មាន ម៉ូតូ ចំនួន ១ ៩៥០ ​គ្រឿង និង​យានយន្ត​ផ្សេងៗ​ទៀត រួម​ទាំង​រថយន្ត សរុប​ចំនួន ២ ៥៨៦​ គ្រឿង។

សូម​ជម្រាប​ជូន​ឲ្យ​ដឹង​ថា ចាប់ពី​ថ្ងៃ​សុក្រ ១០​កើត ខែ​ពិសាខ ឆ្នាំជូត ទោស័ក ព​.​ស ២៥៦៣ ត្រូវ​នឹង​ថ្ងៃទី​១ ខែឧសភា ឆ្នាំ​២០២០ តទៅ កម្លាំង​នគរបាល​ចរាចរណ៍​នឹង​អនុវត្ត​ការពិន័យ​អន្តរការណ៍ ចំពោះ​អំពើ​ល្មើស​នឹង​ច្បាប់ ស្តីពី ចរាចរណ៍​ផ្លូវគោក តាម​អនុក្រឹត្យ​លេខ ៣៩ អនក្រ .​ប​.​ក ចុះ​ថ្ងៃទី​១៧ ខែ​មីនា ឆ្នាំ​២០២០ ស្តីពី​ការ​កែសម្រួល​អនុក្រឹត្យ​លេខ ៤៤ អនក្រ .​ប​.​ក ចុះ​ថ្ងៃទី​២១ ខែ​មីនា ឆ្នាំ​២០១៧ ស្ដីពី​ការពិន័យ​អន្តរការណ៍​ចំពោះ​អំពើ​ល្មើស​នឹង​ច្បាប់ ស្តីពី ចរាចរណ៍​ផ្លូវគោក ដែល​បាន​ដំឡើង​កម្រិត​ទឹកប្រាក់​ពិន័យ​ក្នុង​ចំនួន​ពី ៣ ( បី ) ទៅ ៥ ( ប្រាំ ) ដង។

សមត្ថកិច្ច​នគរបាល​ចរាចរណ៍ សូម​អំពាវនាវ​ដល់​ប្រជាពលរដ្ឋ​ដែល​ប្រើប្រាស់​ផ្លូវថ្នល់​ទាំងអស់ ត្រូវ​ចូលរួម​គោរព​ច្បាប់​ចរាចរណ៍​ផ្លូវគោក ដើម្បី​ការពារ​អាយុជីវិត​ខ្លួនឯង និង​អ្នកដទៃ ប្រកបដោយ​ឆន្ទៈ​ភ្ញាក់​រលឹក​ខ្ពស់ សំដៅ​លើកស្ទួយ​កិត្តិយស សេចក្ដីថ្លៃថ្នូរ និង​សណ្ដាប់ធ្នាប់​សង្គម​នៅ​ព្រះរាជា​ណា​ចក្រ​កម្ពុជា៕
​អត្ថបទ ៖ រ៉ា​វុ​ទ្ធ​

សូមចុចអាន ៖ ក្មេង​ស្ទាងកាង​ភូមិ ៣​ នាក់ ជិះ​ម៉ូតូ​ដេញ​វាយ​ជន​រងគ្រោះ ដល់គ្រោះថ្នាក់ស្លាប់



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 012 454 575 និង 012 499 114