អ្វីខ្លះទៅ ដែលអាចទាក់ទាញនាំឲ្យស្នេហា​កើតមាន​ឡើងបែបផ្លេកបន្ទោ?

ការចាប់អារម្មណ៍លើនរណាម្នាក់ ដែលមានភេទផ្ទុយ រហូតដល់នឹកមិនដាច់រូបរាង និងមានចិត្តស្នេហាឬចំណង់ផ្លូវភេទ ត្រូវបានចាត់គេទុកថា ជាប្រភេទនៃការទាក់ទាញផ្លេកបន្ទោ។

ដូច្នេះយើងនឹងមកដឹងទាំងអស់គ្នាថា តើមានភាពទាក់ទាញអ្វីខ្លះដែលអាចឲ្យបុរសនារីឈានដល់ដំណាក់កាលស្នេហា?

រូបសម្រស់៖ សម្ផស្សជាភាពទាក់ទាញដំបូងគេ មិនថាមនុស្សផ្ទុយភេទ ឬភេទដូចគ្នាទេ សុទ្ធតែមានការចាប់អារម្មណ៍។ រូបរាង និងមុខមាត់ជាអាវុធទីមួយដែលអាចសម្លាប់បេះដូងគេបានឬមិនបាន។

ស្នាមញញឹម៖ ស្នាមញញឹមជាមេរោគឆ្លងនាំឲ្យមានអារម្មណ៍ល្អ និងជួយព្យាបាលបញ្ហាផ្លូវចិត្តស្មុគស្មាញ។ មិនតែប៉ុណ្ណោះមនុស្សដែលមានស្នាមញញឹមជាប់លើផ្ទៃមុខ ឬឧស្សាហ៍សើច មានឥទ្ធិពលឆក់ទាញដួងចិត្តមនុស្សគ្រប់គ្នា ជាពិសេសមនុស្សផ្ទុយភេទឲ្យចូលចិត្តចង់នៅក្បែរ។

ទ្រព្យសម្បត្តិ៖ ប្រហែលជាអាចមានទស្សនៈយល់ឃើញថា លុយកាក់ និងសម្ភារនិយមមិនមែនជាការកំណត់និយមន័យនៃការផ្ដើមស្នេហានោះទេ។ ប៉ុន្តែ! ជឿទៅ បុរសនារីណាដែលមានទ្រព្យសម្ញែងខ្លួនរមែងលេចធ្លោជាងមនុស្សសាមញ្ញមិនសូវមានអ្វីប្រើប្រាស់មិនខានទេ។

ការតុបតែងខ្លួន៖ របៀបបតុបតែងខ្លួនតាំងពីក្បាលដល់ចុងជើងរួមមាន ម៉ូដសក់ ការស្លៀកពាក់ គ្រឿងអលង្ការ សុទ្ធសឹងត្រូវបានអ្នកដទៃចាប់ភ្លឹកមិនរំលងនោះទេ។ ប៉ុន្តែភាពទាក់ទាញតិចឬច្រើនអាស្រ័យលើនិស្ស័យចូលចិត្តពីរបៀបរៀបចំខ្លួនស្រដៀងគ្នាដែរ។

ភាពវៃឆ្លាត៖ ភាពវៀងវៃ រហ័សរហួន និងយល់កាលៈទេសៈ ទាំងនេះជាអ្វីដែលជាប់ចិត្តដិតអារម្មណ៍មនុស្សផ្ទុយភេទខ្លាំង និងអាចនាំឈានទៅដល់ការលង់ស្នេហ៍ដ៏ជ្រាលជ្រៅ។ មនុស្សមានភាពឆ្លាតវៃតែងតែអាចឆក់បេះដូងគេឲ្យលង់ស្រឡាញ់បានយ៉ាងងាយ។

ភាពស្និទ្ធស្នាល៖ មនុស្សខ្លះអាចស្គាល់គ្នារយៈពេលយូរ ប៉ុន្តែមិនបានចាប់ចិត្តលើគ្នានោះឡើយ។ ប៉ុន្តែក្រោយនៅជិតដិតគ្នាស្និទ្ធស្នាលកាន់តែច្រើន នោះអារម្មណ៍លង់ស្នេហ៍អាចនឹងកើតឡើងបានដែរ។

មនោសញ្ចេតនា​៖ មនោសញ្ចេតនាជាអារម្មណ៍ទោរទន់នៃភាគីម្ខាងដែលងាយនឹងចូលចិត្ត ហើយឆាប់លង់ស្នេហ៍គេដោយត្រឹមជួបគ្នាជាលើកដំបូង។ យើងអាចចាត់ទុកបុរសនារីទាំងនោះជាមនុស្សឆាប់ស្រឡាញ់និងឆាប់ធុញក៏ថាបាន។

ចំណង់ផ្លូវភេទ៖ កម្លាំងទាញសំខាន់មួយដែលនាំឲ្យមនុស្សឈានដល់ស្នេហាស្និទ្ធស្នាលគឺចំណង់តណ្ហា។ កុំថាតែមនុស្សមនុស្សប្រុសដែលចូលចិត្តរឿងលើគ្រែ សូម្បីតែស្រីៗក៏មានចំណង់ខ្លាំងដូចគ្នាដែរ ដែលវាជាធម្មជាតិដែលមិនអាចប្រកែកបាន។ គ្រប់គ្នាសុទ្ធតែគិតរឿងនេះពេលស្រឡាញ់គ្នា ហើយវាជាមូលហេតុមួយនាំឲ្យកើតមានស្នេហា៕

ប្រែសម្រួល៖ សន្យា

ប្រភព៖ Healthline

ចុចអាន៖  តាម​ប្រមាញ់បេះដូងនារីល្អម្នាក់មិនពិបាកទេប្រសិនដឹងវិធីសាស្ត្រទំាងនេះ

ចុចអាន៖  សៀវភៅ«ការឈឺចាប់»ស្នាដៃថ្មីសន្លាង​របស់អ្នកនិពន្ធ ម៉ីសន​សុធារី​ចេញ(Trailer)ផ្លូវការ​